IMAMAT 15 - Allah Wene Fano Wene Hupla Inane

Afuni inoba emetlagu halok hilingiti logogun wene

¹ Tuhan nen Musa inom Harun inom wene melalek yi inoba fesikhe.

² Afuni inunggulenu Israel mene halok, ap ekhe nen agap enggalimo mene kurele wulibi wagu halok he ap andi ebe re emerek mene logogin.

³ Andi mondogat he wulibi wagu mene faget inom nen fena elonggoma werek mene faget inom.

⁴ Ap andi nen hu'lasigin oba halok inom nogogin oba halok inom ogo mondogat emetlasigin.

^5-8 Ap misik ekhe nen ap ariginik mene a'nogo senhugu halok inom, at nogoguba omanogo senhugu halok inom, at hu'laguba omanogo obali'mo hu'lagu halok inom, athe wesi subet hikhe halok inom, ap andi asu sobalogo kume waraluk, at ebe emerek werek kwelek enek mo ubuk ikhi logogin.

⁹ Ap agap enggalimo meneba nen kurele wulibi wagu mene a'nogo nen wam sapi amboloba lageluk talogo hu'lagu meneba hu'lasigin halok ogo, nen amunggeba halok ogore mondogat emerek enek aga logogin.

¹⁰ Ap misik ekhe nen ap a'nogo obali'mo hu'lasigin meneba endep ekhe fakhagain halok he at ebe emerek werek kwelek enek mo ubuk ikhi logogin. Nen, it ekhe nen angge a'nogo legeisogo waluk lagu halok he at asu i sobalogo kume waraluk ebe emerek werek kwelek enek mo ubuk ikhi logogin.

¹¹ Nen, ap agap enggalimo mene kurele wulibi waga logogin mene a'nogo nen at attak enggi sobalhigi'legengge nen ap amu mene senisugu halok he, ap aren senisugu mene a'nogo asu iba sobalaluk kume warogo werek kwelek enek mo ubuk ikhi logogin.

¹² Belanga ap andi nen sen hugu mene halok he eraphogo herak fisikhi logogun, at enggi nen yi mene ti mene senetu halok he iba sobalhi logogun.

¹³ Nen, ap a'nogo fano agu halok he aren enggi linggene sabiren ekhe inom nenanggot hikhi logogin. A'nogo nenanggot haluk enek he aren asu iba sobalaluk ebe inom i elesi wulifuba kume waramo nek he, at ebe mondok emerek lek mene asigin.

¹⁴ Linggene sirek meneba re, ap a'nogo nen sue abiang ket souge mene ogo, athe sue merpati ket souge mene ogo pirerogo waluk it imam inambit o Tuhan Awi Sabumo omanogo wogisa waga logogun.

¹⁵ Wogisa wagunem it imam omanogo nen sue misik ekhere at aweak lek hilingisogo fouwageluk, nen ekhere aren nolengge nolhu mene iluk wogeti logogun. A'nogo hilingiti logogun oba ap a'nogo ebe pugunsek logouwageluk it imam en Tuhan elokhoma fanoet fikhi logogun andi.

¹⁶ Ap misik ekhe nen agap enggalimo meneba amusu wulibi wagu halok he, ap andi ebe kume wasigin oba nen, at ebe emerek werek kwelek enek mo ubuk ikhi logogin.

¹⁷ Yi mene ti mene su kain meneba ogo, nen agap meneba kwagongge mene ogo ap amusu andi nen senhikhe mene halok he, yi mene ti mene andoma re mondogat emerek werek kwelek enek mo ubuk ikhi logogin.

¹⁸ Ap ekhe hemi inom seberogo nogoluk halok, it inebe kume warogoin oba nen he inebe emerek werek kwelek enek mo ubuk ikhi logogin.

¹⁹ He misik ekhe aren amep tugi misik oba lagu mene a'nogo hilingitu halok he, at ebe enggi linggene 7 nen emerek logogin. Nen, ap ekhe nen at he andi senhagain halok he ap agap senhagain mene andi emerek werek kwelek enek mo ubuk ikhi logogin.

²⁰ He mene ekhe at amep laga logolik we nena meneba ekhe fakhagain halok ogo, nen talogo nogogin halok mene ogore mondogat emerek logogin.

^21-23 Ap ekhe nen at he a'nogo amep laga logolik hurek welagaba senhikhe halok ogo, nogokhi lagaba senete halok ogo asu iba sobalaluk ebe kume warogo emerek werek kwelek enek mo ubuk ikhi logogin.

²⁴ Ap misik ekhe nen he amep laga logogin meneba inom sebesugun halok he, ap andi enggi linggene sabiren emerek logogin, nen at nogokhi logogin oba ogore emeregat logogin.

²⁵ Tugi misik ekheba he ekhe amep lagu mene a'nogo taganhogo asi laluk, laguat werek halok ogo, athe amep a'nogo lagu mondok werek halok ogo, he andi re attak amep laga logolik welaga higithogo amep laga logogin sambul andem inom ebe emerek logogin.

²⁶ Amep lagu sambul andem at nogoikheba halok ogo, at hu'lagaba halok ogo mondogat emetlasigin.

²⁷ Ap sa nen at obalik andiba senhugu halok he, at ebe emerek logogin. At asu iba sobalaluk ebe kume warogo emerek werek kwelek enek mo ubuk ikhi logogin.

²⁸ He a'nogo amep mondogat palagu halok at enggi linggene 7 nen nenangot hikhi logolik logombik halok enek he, at a'nogo ebe pugunsek mene hilinglasigin.

²⁹ Wela'lugen enggi 8 meneba halok enek he aren sue abiang ket souge mene ogo, athe sue merpati ket souge mene ogo pirerogo waluk o Tuhan Awi Sabumo solombonma omanogo it Allah elokhoma hilingitu mene wogisa waga logogun.

³⁰ Waluk wagunem it imam omanogo nen sue misik ekhere at aweak lek hilingisogo fouwageluk, nen misik ekhere warogo nolengge noletu mene iluk fugunem, a'nogo hilingisugun andiba it imam en he a'nogo faget Tuhan elokhoma nen pugunhogo fikhi logogun andi.

³¹ Tuhan nen Musa mimingiti logolik, afuni inunggulenu Israel mene nen Tuhan Awi Sabu salek mene a'nogo emetfeinogo re, ki huli nen it emerek logogun nen ningginik sambul halok we logogun, iluk futfikhi logouwakhogo yagaisa lan. Nen, iren Tuhan Awi Sabu andi emetfogoin halok he it inebe wa'lasugun.

³² Iluk a'nogo it ap inagap inenggalimo meneba ourek logolik kurele wulibi wagu halok inom, amusu wulibi wagu halok inom,

³³ it hemi inamep tugi folelhu sambul wagarek mene a'nogo wagu halok hilingiti logogun aple inom, ap ekhe nen he amep lagu kwelek inom nogogu halok hilingiti logogun aple inom, faget wene melalek a'nogo yagaisasikhe andi.