IMAMAT 11 - Allah Wene Fano Wene Hupla Inane

Yi mene ti mene eluk welagarek mene nenggarek mene inom nenggarek lek mene inom faget yagaisasikhe wene.

¹ Tuhan nen wene lenggalek yi it Musa inom Harun inom inoba fesikhe, fikhi logolik he,

^2-3 ”It afuni inunggulenu Israel mene re, yi mene ti mene kweang ambuema eluk werek mene andoma eisok segelet aksek mene inom, inambe nalugen nekhengge luk hemelogo sagalogo ninggerek mene inom, andoma re fano mene hilingi'mo ninggi logogun fano.

^4-6 Wam unta inom, paik enu pelanduk inom, paik kelinci inom andi re inambema nalugen nekhengge luk hemelogo sagalogo ninggerek, nen ineisok segelet aksek le'ma re andi saliogengge mene hilingi'mo na fuk.

⁷ Wam he na fugat. Wam he eisok segelet aksek oba nen at amburu naluk nekhengge luk hemelogo hobuk ninggerek le'mare, wam andi re saliogengge mene werek.

⁸ Wam andi re saliogengge mene hilingi'mo eino inom na fuk nen ebe warek mene ogo sen ha fugat.

⁹ Hit he yi ikan ti ikan amurul wilibik mene inom afunggu werek mene inom yinik hunik mene andoma ninggi logogun fano.

^10-12 Yi mene ti mene ima eluk werek mene oba nen amurul inom, afunggu inom wilibik lek mene re mondok saliogengge hilingi'more ninggi logogun lek. Nen, warek fili oba ogo seneti logogun legat.

^13-19 Yi rue ti rue andoma inanggele'ma nen saliogengge hilingi'mo ninggi logogun lek mene re yi: Sue fogonoe inom, sumu-sumu hak mene inom, sue findi-findi hak mene enu amu-amu arue inom, sue nasar inom, sue gagak inom, sue siomayo hak mene inom, sue walu hak mene amu-amu arue inom, sue kasa inom, kundik inom andoma ninggi logogun mondok lek.

²⁰ Eluk-elugengge mene agerabul wulibik andoma mondok saliogengge mene ninggi logou fuk,

²¹ Oba nen he pokhigik lagarek mene nek he ninggi logogun fano.

²² Arigini'mo re pulue inom, senal inom, pulue agap kerengga palek mene inom enek he ninggi logogun fano.

²³ Oba nen he eluk-elugengge agerabul wilibik mene inom kweang kwe pililoterek mene inom enek he saliogengge mene.

^24-28 Ap misik ekhe nen eluk-elugengge ekhe mene-ekhe mene warek fili misik ekhe fakhagain halok ap a'nogo ebe emerek werek kwelek enek he, mo ubuk ikhi logogin mene re yi: Yi mene ti mene inenggi a'lip wilibik mene inom, it ineisok a'lip aksek oba nen inambe nenggarek mene nekhengge luk hemelogo ninggerek mene inom, yi mene ti mene enggi eisok enggaminogo werek oba nen kelinci enggiagut hak mene inom andoma. Mene athe, ap ekhe nen he yi mene ti mene andi mene warek fili ekhe waluk laluk halok ogo, aren asu sobalikhi logogin oba nen he at ebe nek he emerek werek kwelek enek mo ubuk ikhi logogin.

^29-30 Kweang ombaik mene inom, hokho ombaik inom, endep ombaik inom, parisok inom, yagaise ekhe mene-ekhe mene mondogat inom, Tabi hak mene enu landak inom, yibukhe inom, ilo peruk inom, sioplo inom, sogobenggen inom, mondogat andi re wesa mene.

³¹ Ap ekhe nen yi mene ti mene andi fakhikhe halok ogo nen warek fili fakhikhe halok ogore at ebe emerek werek kwelek enek mo ubuk ikhi logogin.

³² Nen, yi mene ti mene andi warek fili nen ogo athe amu mene ekhe amboloba pugu halok ogo, amungge andi emeregat logogin. Amungge andi re nena mene faget hilingitungge andi hilingik kwelek, e meneba hilingik mene hea, su karung meneba hea, hilingik kwelek misik mene andi iba kwelagaisogo fikhi logogun, a'nogo fugunem misik mene andi nek emerek werek kwelek mo arat ubuk ikhi logogin.

³³ Nen, warek fili andi re belanga kweang meneba hilingik mene elonggoma pugu halok yi mene ti mene belanga andi elema werek mene omanogo mondogat emetlaga logogin. Nen, belanga andi re halokhogo hugisogoin fano.

³⁴ Nunggu mene belanga andiba elema nen fakhagain halok he, emetlasigin, nen i belanga andi elema werek mene ogore emetlasigin at.

³⁵ Yi mene ti mene warek fili misik ekhe amu meneba pugu halok, emetlaga logogin. Nen, endu nonggalhuba obalik kweang meneba hilingikmo inom, wulinggin wagane'ma pikhe halok inom, mondogat emetlasigin andi nen halokhogo hugisano.

³⁶ Yi mene ti mene amu mene re warek fili nen senhugu halok mondogat emetlaga logogin oba nen he, we i mogo inom nen i elesi agai mene inom enek he lek.

³⁷ Warek fili andi re, enggen awi folugun mene iluk werek meneba pugu halok enggen andi re emetlasigin lek, we fano horek logogin.

³⁸ Oba nen he enggen andi re i elema salfuluk were'ma nen warek fili a'nogo oba pugu halok he andi mondogat emetlasigin.

³⁹ Ap sa nen ekhe yi mene ti mene wesa werek mene andi warek filiba senhagain halok, at andi emerek werek kwelek enek mo ubuk ikhi logogin.

⁴⁰ Ap en warek fili andi waluk lagu halok ogo nen nagain halok ogore asu i sobalagain oba nen he, ebere emerek werek kwelek enek mo ubuk ikhi logogin.

^41-42 Eluk-elugengge ekhe mene-ekhe mene mondogat kweang amboloba logoum-logoum warogo welagarek mene inom, eisok enggaminogo wulibik mene halok inom, eisok hokhorogo wulibik mene halok inom he, mondogat wesa hilingi'mo nogoin mondok lek.

⁴³ Hit hinonggwaregen eluk-elugengge andi mene nogoin oba emetfakhogoin andi wesa.

⁴⁴ An hineisena Tuhan Allah nebe An namuat welagimo, An nebe mondok horek welagi andi hakhogo hirogo mondok horek meneat logoni.

⁴⁵ An horek mene welagi hak hirogo horegat logoni. An nebere Tuhan, hit o Mesir en wokhinarek wulibi wagagi mene a'nogo Anaro.

⁴⁶ Eluk-elugengge yi mene ti mene sue, paik, wam, ima eluk welagarek mene inom, kweanggwe lebeterek mene inom, faget inawene melalek fesikhe mene re andi.

⁴⁷ Hiren he yi mene ti mene andoma weak mene re ki, nen fano mene re ki, iluk elokhe penetik, nenggarek mene re ki, nen nenggarek lek mene re ki, iluk elokhe, penetik ikhi logoino,” iluk yagaisasikhe.