IBRANI 8 - Allah Wene Fano Wene Hupla Inane

At Yesus nit faget Allah eisewerek kain welagarek wene

¹ Nit wene ikhi lago andi esin he yi o, nit ninoe kain Allah eisewerek ogo andi higit werek. At ebe re, nineisena Enupogot Allah welagarek oba era'lu kainat werek.

² A'nogo werek andi, Allah awi su mene afuni nen elama faget wutukwaba werek fuk. Lego. We, Allah onggwarek awi ebe mene wutikheba andoma logolik nit faget hilingiterego.

³ It ap Allah eisewerek inogogwi kaindek inebe lombok menfisagarek andi re, yi mene ti mene Allah wogetik, inanggo waretik, ikhi logouwageluk menfisagarek andi hak, nit ninoe kain Allah eisewerek andi re, yi mene ti mene ekhe nit faget Allah wogosuageluk werego.

⁴ Wene Allah nen komotninafikhe wene andi higithogo re, yi mene ti mene Allah faget wogeti logogun mene, it ap Allah eisewerek mene inebe werek andi nen he, at Yesus ebe kweangma yoma logoilepma re, Allah eisewerek logoilep lego.

⁵ Allah nen he, ”Nawi su mene elama faget wutnobagain o,” iluk Musa yagatikhemo, ebe wusigeluk ugunem he, hobuk mel yagatikhe: ”An nemberek tom oba logolik, an nawi yi'nogo wutnobagagin o, iluk ilirengge walhogo inukhiigi a'nogo higithogo mondok wu'nogen he, hendawimo eberek mondok logoino o,” iluk yagatikhe andi hagat, it ap Allah eisewerek kweangma yoma logolik, ebe pogoroba werek mene oba litik, alik wanhik, agarek andi.

⁶ A'nogo hilingiti logolik, it he, elo'lek alik waganek mene hilingitarek meneat he, Allah nen, ”Hit fano hilinghinabigin,” iluk abok yaganisasikhe wene oba louksek, at Yesus ebe Allah inom, nit afuni ninom, hulisanem logolik, wene Allah nen ket mene warogo wo'ninafikhe higithogo ebe meneat esin mondok hilingiterek andi.

⁷ Wene attak Allah nen, ”Fano hilinghinabigin,” iluk wene warogo wo'ninafikhe andiba higira'le'ma re, wene andi obali'mo, ”Fanothinabigin,” iluk hobuk ilep legaro.

⁸ Meneat he, Allah againafuri wene andi fisogo logolik, elo'legat hilingiti lagaukwama mel yagaisasikhe: ”Afuni Israel mene inom, Yehuda mene inom, an nen wene ket mene warogo woginabigin oba weregaro, iluk eberogoat yagahisigi o.

⁹ An nen hit hinombalak o Mesir en nenggi fagaisogo woginarek wulibi wesigeluk ikhi logolik, Yi'nogo hilinghinabigin, iluk wene warisasigi andi hak fuk. Hunogo aro. An nen it wene warisasigi mene andi hologo higithogo hilingiti'lek andi nen he, it inebe nabit, iluk kobokhogo fisasigi andi.

¹⁰ Hobuk afuni Israel mene wene ket mene warogo woginabigin iluk igi andi, ebe yiaro: An nen wene komorinafirek wene andi inendawimo eberek mondok logouwageluk wogisigik, inendawinggenma lisu palogo fisigik, iluk he, an it ineisena logogin. Nen, it an nagainafuriat logogun o.

¹¹ It inaluendek inom, yenggerugwi inom, mondogat ineisena an nebe inelu logogun andi nen he, it inogogwi inagoromi inom, inerugwi inagaila'lak inom, yagaisikhi logolik, Hineisena Allah andi hinelu a'ni o, iluk yagaisogoin lego. We, inonggwarek inamunenat nebe inelu aga logogun o.

¹² It weak hilingitarek mene andi, an nen sebelogo legetfisaluk, hobuk nendawimo eberek logogin lego,” iluk yagaisasikhemo lisu palek werek.

¹³ Aren, ”Wene ket mene warogo woginabigin,” iluk isikhe andi re, wene fageat mene legetfeigeluk isikhe. Yi mene ti mene fageat mene eil weak agunem weak-weak herakfisagarek andi hak, wene attak mene legetfeigeluk isikhe andi.