IBRANI 13 - Allah Wene Fano Wene Hupla Inane

Allah endawimo fanorogo hilingiti logogun wene

¹ Nerugwi nagaila'lak. Allah againafuri hinebe misigat mene hangge nendawi-hendawirogo hilingiti lagep mene andi, a'nogo hinom hundigat hilingiti logoino o.

² It afuni ekhe nen he, malaikat inebe ap pok hangge inobakhe nigik woginafukwasik inahenengge wanhukwa andi nen he, ap pok hinoba wagu halok he, hinobakhe nene herakfisigi'lek woginafi logoino o.

³ It ekhe inenggi hele warek were'ma, hinendawimo nen he, ”Nit ogo re, ninomat ninenggi hele warek hangge welago,” iluk, it inoba ebetik, it ekhe yi weak ti weak hilinginafunem hit hinendawimo nen he, ”Nit ogo re, kweangma yoma oan were'ma a'nogoat hilingninabugun aro,” iluk, it inoba ebetik, ikhi logoino o.

⁴ Ap inom, hemi inom, inobabut yanani nilik nikharek mene inom, Allah nen wene inoba fembik weagerinabigin andi nen he, aben hemi iginafarek andi, afuni mondogaren esinet fuluk, hesanggeat fakfisigi'lek hemiap waganek mene lombok inom fano nogo ikhi logogun o.

⁵ Allah nen ninebe lombok faget ikhi logolik: ”An nen hat nenggi kobokhogo herakhobagagik, hebe hale'ma hobagagik igin lego,” iluk isikhe andi nen he, hit uang hinendawinggen tulemetfuluk logogubo. We, endebat werek andi, hit hinendawimo nen he, ”Yi elok werek,” iluk anggogoin o.

⁶ A'nogo anggikhi logolik, hinendawimo nen, Allah nen he, ”Henggi obokhogo herakhobagagin lego,” isikhe andi nen he, ninendawinggen hambukhogo logolik mel ikhi logogun, ”Neisena Enupogot he, an lebetniikherek mene o. Halok he, afuni nen an ninggi'nogo hilingnabugun nogo, An nailo lego,” iluk ikhi logogun andi.

⁷ Hinogogwi attak kwelakhinarek welagaukwa mene nen, Allah ane yagahisasukwa mene andi, inoba eberek logoino o. It inendawinggen Allah oba himbiret fuluk, inebe ineluk logolik inom, wa'lasuogeluk inom, hilingiti lagaukwa mene andi futfuluk, hit it inobabut waganogo hinendawinggen Allah oba himbiret fikhi logoino o.

⁸ At Yesus Kristus ebe re, o attagen, yogondagen, etok mondok welagarek andi hak, hobuk a'nogoat etok mondok logogin o.

⁹ A'nogo logogin andi nen he, it afuni ekhe nen yi wene ti wene hunogoat meneba lalhinabinogo. Nen, it afuni attagat inambe nenggarek mene faget esinet fuluk hilingiti lagaukwa andiba fano agi'le'ma re, ninendawinggen andiba wurik asugun elo'lego. We, Allah obabut fano nen wo'nisikherek andiba ninendawinggen fano wurik asugun o.

¹⁰ Allah awi su mene wuri'mo it ap Allah eisewerek Yahudi mene nen wam Allah faget warogo helep som wurik oba fikhi lagaukwa andi hak, niren Allah faget fisikhi lago mene andi, it ap andi nen na wesugun elo'lego.

¹¹ O andoma it ap Allah eisewerek inoe kain en it mondogat weak hilingiti lagaukwa mene Allah nen sebelogo legetfisoageluk, wam warogo amep waluk o Allah onggwarek awi hulumo andoma kwikhi lagaikhe meneat he, wam ebe nek he, leget enda'ma endu noli wulifi lagaukwa.

¹² A'nogo hilingiti lagaukwa andi nen, at Yesus onggwarek amep oba againafuri weak hilingitarek mene horogo, inebe Allah faget fisageluk leget pa'leget ambe palek abel endakwe wa'lagaikhe andi.

^13-14 A'nogo wa'lagaikhe andi nen, nit kweangma yoma mondok logogun lek. We, nit hobuk o mondok logogun oba herati lago andi nen he, at Yesus afuni nen inane aik weak asegen wokhikhi yagati lagaukwa andi hak, nit a'nogo yaganisugu kwelek, at oba leget abel endakwe wulifi logouwogo.

¹⁵ Andi nen he, at Yesus ninom hundik logolik, niren he, ”Allah neisena,” iluk wam warogo at faget wogeti logou hak, hundik-handik ninambeba Allah enu hokhorogo fogeratu mondok logouwogo.

¹⁶ A'nogo hilingiti logolik, afuni ekhe fano hilinginafik, leberisigik, ikhi logouwok. A'nogo hilingiti logogun andi re, Allah endawimo fanorogo anggo waretarek andi hak hilingiti logogunmo re, oba ninonggot asugun mondok lego.

¹⁷ Hobuk Allah nen he, hit hinogogwi mel yagaisagain: It inendawinggen faget ninggi'nogo hilingiti lagepsik, iluk yagaisugunem, it inendawimo nen he, ”Nit ninoba lombogat onggo yagasugun higi,” iluk, fanorogo kwelakhinarek mondok welagaikharek andi nen he, it inawe a'ma soma iluk inane hologo hilingiti logoino o. A'nogo hilingiti logogun halok he, it inendawimo inagaiyekhogo, hit faget hilingiti logogun andi. Meneat he, hiren it inane hologo hilingiti logogun lek halok he, it inendawimo weak logolik, hit faget we tulemat hilingiti logogun o.

¹⁸ Niren yi wene ti wene fanorogo nek hilingiti logouwogeluk anggikhi logolik ninendawimo nen he, ”Nit wene ninoba lek. Ninendawimo selek,” iluk anggikhi lago andi nen he, nit faget samban ikhi logoino o.

¹⁹ Ikhi logolik, ebe esin he, an nebe Allah nen weak-weak hit hinoba nambotkwe laknobagai wesuageluk samban ikhi logobagaigeluk yagahisigi andi o.

Allah nen fanorinabuageluk samban isukwa wene

²⁰ Nineisena Allah lambulogo ninobagaikherek mene a'nogo nen, ninoe Enupogot Yesus wa'lagaikhemo nen ebe elugetfesikhe. At ebe amep wulagaisogo watukwa andiba, Allah nen wene mondok logogin mene warogo wo'ninafikhesik, nit mondogat Yesus nen anggo domba higit kwelakninarek logouwageluk ebe menfesikhe andi.

²¹ Hit Allah endawimo amolo anggikherek mene nek fano hilingisubagaigen he, yi mene ti mene fano mene mondogat wokhisoak. A'nogo wokhisugunem, nit ninom mondogaren Allah endawimo fanorogo hilingiti logouwageluk, ninobabut aren wo'nisagain andi ebe re, Yesus Kristus nen wo'nisoago. At Kristus andiat fogeratu mondok logouwogo. Ebe asuak u hak, ”Amin,” igi andi.

Wene wurep kobokhogo yagaisasukwa wene

²² Nerugwi nagaila'lak. Wene horogat hit komorogo lisu palogo hinoba lakfei wagi andi, hinaberali agi'lek hinesanggo hologo logoino o.

²³ Nen, ninagot Timotius a'nogo re, ebe arat hele fikhalogo wulakfagama nen hinelurogo logobagaigeluk yagahisigi o. At ebe weak-weak an nea waga halok he, an hobuk hit hisa waga logolik nemberek wesugun o.

²⁴ Hiren he, it ap hinogogwi hit kwelakhinarek welagaikharek mene mondogat inom, Allah againafuri fena mondogat inom, ”Hai wathinafe,” iluk yagaisano o. Nen, ninerugwi ninagaila'lak o Italia welagaikharek mene nen hai wathinafa aro.

²⁵ Nerugwi nagaila'lak. Allah obabut fano a'nogo nen hit mondogat fethinarek logouwago.