HOSEA 14 - Allah Wene Fano Wene Hupla Inane

¹ ”Samaria re An noba eilnafesik nane sagalogo hilingitu nen he, unggum hela higit obaat helagain o. Afuni holhu mene aren mene andoma re weim elema nen wa'lasugun. Inomalik ketago mene re wulil tagalogo legerinafik, hemi omalik ina'ma mene re inalabut pelangetik, ugun o,” iluk ikhe.

Hosea nen afuni Israel mene inobabut hebelasuageluk Allah ayonggo fesikhe wene

² A'nogo isikhemo, an nen afuni Israel mene yagaisikhi logolik mel isigi, ”Hit afuni Israel mene yi. Hinebe nineisena Tuhan Allah oba hinambotkwe we'ni o! Hit weak hilingiti lagep oba, hineisok peikhogo hinebe warikhi lagep.

³ Andi nen he, hinebe hinambotkwe Tuhan oba we'luk he, wam, yi mene ti mene At obaget fisa hak, samban yi'nogo ikhi logoino: ”Tuhan neisena, nit hat hane sagalogo fogosik weak hilingiti lago mene yi sagalogo legetfisanogen iluk, yagaheti lago mene yi ninane hesanggo holin o. Ninane holhen halok, niren wene wathetugu higithogoat fogethafi logogun o.

⁴ Ap Asyur mene nen telninabugun he lego. Nen wam kuda weim yabi lagaikharek mene andi nen telninabugun he legaro. Niren tugwi kembu ninonggwarek ninenggi nen agauwak hilingiti lago meneba yagati logolik, allah nineisena, iluk yagatorek andi hak, ikhi logogun legaro, neisena. Tuhan, Hat he afuni suarek mene hendawirinafendek mene o, neisena, iluk ayonggo fikhi logoino,” iluk yagaisasigi.

Tuhan nen Israel mene ineluk ket mene wokhisagain iluk abok yagaisasikhe wene

⁵ A'nogo yagaisasigimo, nineisena Tuhan nen he mel ikhe: ”An nagainafuri nane sagalogo hilingiti lagaikha mene andoma, An nen hobuk it inoba na'mage het-pet igin lek andi nen he, inambotkwe woginarek wesimbik, nendawinggen oba nenat nendawirinabigin o.

⁶ An nen afuni Israel mene faget he, o meiso nen kweang puk amusu mondok lek mene sakhotfikherek andi hak, fanot fisagain o. A'nogo hilinginafunem, yi mene ti mene enggen ukwalagarek andi hak sik-pik igik, e wombi hangge mene enu cemara omanggen kweang elema mondok ninghogo yaterek andi hak hilinglagik, ugun o.

⁷ It inebe hobuk yi mene ti mene yago mene ilit sabelheresik asimit ekhema-ekhema legeisogo fikherek andi hak hilinglasimbik, inebe fano logogun. A'nogo logolik, inebe e zaitun fano welagarek andi hak welagik, e cemara amben fano andi hangge hilinglagik, ugun.

⁸ It hobuk inambotkwe noba wesimbik, nawe a'ma logogun. Logolik, inebe gandum yabumo yago mene muli fano agarek andi hak hilinglagik, anggur fano mene yabumo yago welagarek andi hak hilinglagik, e anggur amusu o Libanon mene enu fano lagarek hak inenu yi awi ti awi wialarik lagik, ugun.

⁹ Hobuk afuni Israel mene nen tugwi kembu fogeratarek mene omanogo herak fisogoin. A'nogo herakfisugunem, An nen it ferinarek logolik, iren nayonggo fugunem inane nesanggo holhi logogin. E engga hokho mene a'ma kun welagarek andi hak, it inebe An nawe a'ma fano sebelinarek logogin. A'nogo were'ma, yi agayo ti agayo enggen iterek hak, yi mene ti mene fano mene andi ero Anat andi nen he, Anenat wogisikhi logogin, iluk An Tuhan nen nane arat igi o,” iluk yaganete.

Wene wurep oba yagaisasikhe wene

¹⁰ Nineisena Tuhan nen, ”Yi'nogo hilingiti logoino, ti'nogo hilingiti logoino,” iluk yaganisikherek wene andi re, higit mondok andi nen he, afuni inobabut higithogo hilingitarek mene nen wene andi hologo higithogo hilingitarego. A'nogo meneat he, it ekhe inobabut wene andi sagalogo herakfisaluk hilingitarek mene andi re, ineisok peikhogo pile pagarego. Andi nen wene andi re it inendawinggen wenggelek mene nen he, futfigik, hinungguloak kagalek mene nen he, eberek welagik, ikhi logouwak.