HAKIM–HAKIM 8 - Allah Wene Fano Wene Hupla Inane

Ap Midian mene mabenet fisasukwasik inoatukwa wene

¹ Ap Efraim mene a'nogo wagaukwasik Gideon mel yagatukwa: ”Haren ap Midian mene inoasi wesigiluk waga logolik, nit yaganisigi'lek wagen andi nenahalok! Ninggi'nogo nen haren nit ninoba a'nogo hilingninafen?,” iluk at Gideon wene weakhogo wenagetukwa.

² A'nogo wenagatukwa meneat he, at Gideon nen mel yagaisasikhe: ”An nen hilingiti mene andi, hiren hilingitep mene andi emberek walhamo re, an hilingiti mene andi mondok elo'lego. An nagoromi mondogaren hokhorogoat hilingita andi elo'lek meneat he, hit endebat hilingitep andi nek he, mondok esin o.

³ Ma re, at Allah nen afuni Midian mene inogogwi inebe pire Oreb inom, Zeeb inom, hit hinenggiba fikhemo re, inebe hiren inoatep mene andi, an hilingiti mene faget agaukhogo fogetnabugun anggegep a? Lego. We, hirat agaukhogo fogethinabugun o,” iluk at Gideon nen a'nogo yagaisasikhemo, ina'mage lek agaikhe.

⁴ Andi sambul he, at Gideon agoromi inebe 300 nen omanogo inom he, i Yordan palogo weak-weagat wulifukwasik, inomame lek agaikhe meneat he, inaselei mene muginarek mondok lagaukwaat.

⁵ A'nogo laga lagaukwasik huli o Sukot asi lagaukwa. Lagaukwasik, at Gideon nen afuni o kota andoma mene mel yagaisasikhe, ”An nagoromi inomame lek agu kwelegat, afuni Midian mene inogogwi inenupogot Zebah inom, Salmuna inom, muginarek wagalago andi nen he, sumburu endebat halok ekhe wogisani o,” iluk kino yagaisasikhe.

⁶ A'nogo yagaisasikhe meneat he, it afuni o Sukot andoma inogogwi kaindek en he, mel yagatukwa: ”Ah! Hiren ap Zebah inom, Salmuna inom, oan fakfisigi'lek welagep meneat he, sumburu kino yaganisegen andi, ebe nena mene faget hagoromi sumburu wogisogin? Elo'lego,” iluk yagatukwa.

⁷ A'nogo yagatukwama, at Gideon nen he, mel yagaisasikhe: ”Fano yaganetep! Hobuk neisena Tuhan nen ap Zebah inom, Salmuna inom, an nenggiba foumo, mabenetfisigi halok, an nen alok aik weak mene o leimo welagarek meneba yei lambisogengge hinoasi wesigin o,” iluk yagaisasikhe.

⁸ A'nogo yagaisaluk, pikhit laga lagaikhesik, huli o Penuel huli asi lagaikhe. O andoma nen ogo re, sumburu agoromi faget kino yagaisasikheat. A'nogo meneat he, it afuni Penuel mene nen ogore it Sukot mene nen yagatukwa hagat yagatukwa.

⁹ A'nogo isukwa andi nen, at Gideon nen mel yagaisasikhe: ”An selegat lambik hobuk nambotkwe wesigin anggikhi lagi o. Ma re, andi sambul an waga logolik o kota helep leget haningisogo kwelabek mene yoma meisalogo potfisagain o,” iluk yagaisasikhe.

¹⁰ At Gideon nen a'nogo yagaisasikhe andi sambul he, at Sebah inom, Salmuna inom, inagoromi tentara mene esa logalek inaiba o leimo mo wulibi wagarek higit andoma mene attak esa logalek wagaukwa mene omanogo, it Israel mene nen inebe 120.000 nen inoatukwama, we, 15.000 nen hangge nek hilinglagaukwasik o enu Karkor lagaukwasik welagaukwa.

¹¹ A'nogo were'ma, at Gideon a'nogo inombo'neat laga lagaikhesik, o Nobah inom, Yogbeha inom andoma abel mo liabi wagarek higit, o leimo afuni inafe wonghogo were'ma, it inaselei mene omanogo inoba ferekhogo sebelinabi kwisikhe.

¹² A'nogo kwikhi logolik, ap pire afuni Midian mene inogogwi inenupogot Sebah inom, Salmuna inom, a'nogo heise poloksek wulifukwa meneat he, at Gidion nen muginarek laga lagaikhesik fakfisa lagaikhe. A'nogo fakfisa lagaikhemo, inagoromi tentara mene esa logalek omanogo pugulik-pagalik isukwa.

¹³ At Gideon weim a'nogo yakfuluk ambotkwe waga logolik, kwe o Heres lagagarekwe nen wagaikhe.

¹⁴ Waga logolik, ap alage mene o Sukot en lagunem fakfesikhe. Fakfesikhesik, ”Afuni Sukot mene inogogwi kaindek inenu yaganom o,” iluk yagatikhemo ap a'nogo nen he, ap kaindek inebe mondogat 77 nen inenu lombok lisu waganogo Gideon wogotikhe.

¹⁵ A'nogo waganogo wogotikhemo, at Gideon afuni o kota Sukot mene inogogwi kaindek omanogo inoba wagaikhesik he, mel yagaisasikhe: ”An nen Sebah inom, Salmuna inom oan fakfisigi'lek andi nen, hiren he, hat lebetheogoin ninabit, iluk egep a'nogo lek nogo? Eberogoat egep a'nogo hinendawimo eberek welagebo. A'nogo egep andi sambul he, an nagoromi sumburu mondok nele nen inomame lek agaikhasik werek kwelegat he, hiren he, hat hagoromi sumburu wogisogoin ninabit, iluk egep anggigi. Meneat he, yethani! Ap Zebah inom, Salmuna inom, a'nogo inebe yoma o,” iluk yagaisasikhe.

¹⁶ A'nogo yagaisasikhesik, yei alok mene inom, aik mene inom, o leimo welagarek mene wanhikhesik, afuni o kota Sukot mene inogogwi omanogo yei lambisogengge fuk-fakhogo inoatikhe.

¹⁷ A'nogo inoatikhesik, o Penuel a'nogoat, leget pa'leget helep mene oba lou'louk wurik a'nogo meisalogo potfisigik, afuni o kota andoma ap mene halok inebe felelenghogo inoatik, isikhe.

¹⁸ A'nogo hilingitikhesik, hobuk ap Zebah inom, Salmuna inom, mel yagaisasikhe: ”Hiren ap o Tabor en inoatep andi inelokhonggen ningginik mene inoatep,” iluk heinok wogisasikhemo, iren he, ”Inelokhonggen he, hat hinom higit, ap kaindek inenupogot inagainafuri inelokhonggen hangge mene inoato o,” iluk yagatukwa.

¹⁹ A'nogo yagatukwama, at Gideon nen he, ”Andi an nogogwi nagoromiat, ninagaisawi misigen tagongge mene ta'ninafikhe mene re, inoatebo. Hiren it andi inoa'lep le'ma, an nen ogore, neisena Tuhan eluk mondok welagarek mene enu hombuk palogo, hit hinoasigin legat iluk, yagahisele o,” iluk yagaisasikhe.

²⁰ A'nogo yagaisasikhesik, Gideon amlogo manggusa mene enu Yeter mel yagatikhe: ”Ap emberek yi haren inoasin o,” iluk yagatikhe meneat he, at Yeter ebe oan alage andi nen he, inoasigiluk karok lisogo wanhi'lek ailo nen kamo isikhe.

²¹ A'nogo kamo isikhemo, it ap Zebah inom, Salmuna inomen Gideon mel yagatukwa, ”Yogo. Hat hebe abat halok he, hat honggwarek henggi nenat ninoasin he,” iluk yagatukwa. A'nogo yagatukwama, at Gideon nen it inoatikhesik he, afuni inalilingge wanharek hak, inanggo unta alilingge wam aik hangge mene alonggopma kelik welagaikhe mene omanogo mondogat helasikhe.

²² A'nogo helasikhemo, it afuni Israel mene nen Gideon mel yagatukwa: ”Haren, nit afuni Midian mene nen inenggiba fetninarek were'ma, telninafen andi nen, hat hebe nit ninoe fetninarek logombik he, hamlogo nen fetninarek logombik, hobuk at amlogo homba nen ogo fetninarek logouwagaro,” iluk yagatukwa.

²³ A'nogo yagatukwama at Gideon nen he, mel yagaisasikhe: ”A'nogo lego. An hit hinoe logolik, fethinarek logogin lego. Nen, an namlogo hit hinoe logolik, fethinarek logogin mondok legaro. We, Tuhan nenat fethinarek logogin o,” iluk yagaisasikhe.

²⁴ A'nogo yagaisasikhesik, wene ekhe mel yagaisasikhe: ”A'nogo meneat he, an nen wene misik ekhe kinongge kino yagahisak. Ninaselei mene inalilingge inesanggoma kelik mene wanhep mene andi, hinebe lombogen mondogat an wo'nesi we'ni o,” iluk yagaisasikhe. A'nogo yagaisasikhemo, afuni Midian mene inetokhogo it ekhe o leimo ilingage pililirekwe welagaikharek mene nen hilingitarek hakhogo, inalilingge emas mene inesanggoma kelhare'ma kelik were'ma wanhukwasik were'ma a'nogo isikhe andi.

²⁵ A'nogo yagaisasikhemo, afuni Israel mene nen he, mel yagatukwa: ”Fano. Nit ninendawimo fanoba nek hat wokhesugun o,” iluk yagatukwasik, su kain talfesukwasigen, inebe lombok inaselei mene inalilingge inesanggo bene eisele'ma wanhukwa mene omanogo mondogat fei wagaukwa.

²⁶ A'nogo wogetukwa andi, we, inalilingge emas mene inesanggoma mene nek enggin he, 20 kilo asu hangge hilinglagaikhe. Inalilingge ekhe inalonggopma ugu mene inom, su elokhonggen kibi-kibi warek hangge mene ap kaindek inenupogot Midian mene laberek welagaukwa mene inom, inanggo unta alilingge alonggopma ugu mene inom, enggin walhigi'lek. We, emas mene inesanggoma kelharek mene andi nek walhasikhe.

²⁷ A'nogo wogosi wagaukwama walhasikhesik, at Gideon nen emas andi mene tugwi kembu ekhe tugwi wutarek andi hak wutikhesik, at aiba kota Ofra andoma fesikhe. A'nogo wurogo fesikhemo afuni Israel mene inendawinggen tugwi kembu andi oba himbiretfuluk fogerasi laga logolik, Allah oba inonggoret fuluk welagaukwa. At Gideon a'nogo hilingitikhemo hilingiti lagaukwa andiba, at Gideon againafuri inom paik hele fugunem ke'nok ikherek andi hak ke'nok isukwa andi.

²⁸ Afuni Israel mene nen afuni Midian mene arat mabenet fisasukwama, iren hobuk inomame asu mondok lek agaikhe andi. A'nogo hilinglagaukwasik oba nen, at Gideon nen afuni Israel mene ferinarek logolik, ebe eluk oba fano mondok weim lek liolek 40 tahun welagaukwa.

At Gideon ebe wa'lagaikhe wene

²⁹ At Gideon weim a'nogo yakfuluk, at aiba ambotkwe wagaikhesik andoma welagaikhe.

³⁰ Andoma logolik, agagwi mondok hokhorogo andi nen, againafuri re, ap inebe 70 nen welagaukwa.

³¹ Nen, agwe amingmingengge mene o Sikhem welagaikheat. Logolik, aren eak ap ekhe takhasikhemo, eisena nen enu Abimelekh salhikhe.

³² A'nogo taginafikhesik, Yoas amlogo Gideon a'nogo ebe umur arat yaman agaikhesik wa'lagaikhe. A'nogo wa'lagaikhemo, at ebe warek he, afuni inunggulenu Abiezer mene inaiba kota o Ofra Gideon eisena Yoas salhukwaba andomaat salhukwa.

^33-34 At Gideon ebe wa'lagaikhesik oba re, afuni Israel mene ineisena Allah oba lombokhogo welagaukwa legat. At Allah nen inaselei mene, it inera'lukwe welagaukwa mene nen inoasuogeluk ugunem telinafi lagaikhe mene a'nogo oba himbirik logolik fogerati'lek herakfisaluk, nineisena Baal-Perit ebe andi aro, iluk inandugwi kembu wurogo fogeratik, oba himbiret figik ikhi lagaukwa.

³⁵ A'nogo hilingiti logolik, at Gideon eluk oba afuni Israel mene ferinarek logolik, fano hilinginafi lagaikhe mene andi onggo, iren at Gideon againafuri fano hilinginafi lagaukwa mondok legat.