HAKIM–HAKIM 7 - Allah Wene Fano Wene Hupla Inane

Hun Gideon nen afuni Midian mene mabenet fisasikhesik inoatikhe wene

¹ A'nogo hilingitikhesik, hobuk inenggi ekhe sambul at Gideon agoromi mondogat inom huberat siakhogo lagaukwasik, afuni Midian mene tom More a'ma tonggoma andoma inawi tenda wusi wagaukwasik i Yordan elesi higit andoma werek kwelek, it Gideon mene i ambut higit i ekhe enu Harod elesimo abel utara fikhit andoma inawi tenda wusi lagaukwa.

² A'nogo wusi lagaukwama, Tuhan nen Gideon mel yagatikhe: ”Hat hagoromi inebe mondok hokho-pokhorogo werek. Hobuk it inomame asimbik inendawimo nen anggikhi logolik he, ninonggwarek ninomameba ninomame agagu, iluk inendawimo anggambik, An legeisogo nobagagi'lek hilingisinogo nen he, hit hinebe hokho-pokhorogo hilingik kwelek afuni Midian mene hinenggiba fugu aplere nabiro.

³ Arigini'mo re, hat hagoromi inoba wene yi'nogo yagaisan: Ap ekhe endawimo nen, An nailo, iluk anggikhe halok, tom Gilead oba yoma herakfuluk aiba weak-weak lagain halok fano, iluk yagaisano,” iluk isikhemo yagaisasikhe. A'nogo yagaisasikhemo, afuni inebe 22.000 nen inambotkwe wagaukwama, inebe 10.000 nek kamo isukwa.

⁴ A'nogo hilingitukwama, At Tuhan nen Gideon oba mel yagatikheat: ”Hat hagoromi yoma inebe hokhorogoat. Ma re, hat hobaget An nen hilinginabigin nen he, ima woginarek lan o. A'nogo woginarek lagunem An nen he, ’At yi hat hemberek lano,’ iluk yagaheti halok, elok lagain o. A'nogo meneat he, An nen, ’At yi hat hemberek lagain lek,’ iluk yagaheti halok lagain legaro,” iluk yagatikhe.

^5-6 A'nogo yagatikhemo, at Gideon nen ap omanogo woginarek he, ima lagaikhemo, At Tuhan he, mel yagatikhe: ”Ap yoma i mene ameli nen ninggerek hak, inenggi nen yalelhigik nunggu halok he, it ineindep awi yagaisogo nogoin mene inoba nen inale'ma tegelogo fisano o,” iluk yagatikhe. A'nogo yagatikhemo, i nunggunem kwelagisasikhe re, afuni inebe hokhorogo re, ineindep awi yagaisogo nasukwama re, inenggi nen yalelhigik nasukwa mene re, we, inebe endebat 300 nen hilinglagaikhe.

⁷ A'nogo hilinglagaikhemo, Tuhan nen Gideon mel yagatikhe, ”Ap inebe 300 mene i inenggi nen yalelhigik nengga mene yiba nen, An nen hat fikhalogo hobagaluk, afuni Midian mene andi re hat henggiba fagain o. Ma re, ap fenakwe yoma re inambotkwe inaiba lombok loagen, lakfisan o,” iluk yagatikhe.

⁸ A'nogo yagatikhemo, at Gideon nen afuni Israel mene fenakwe omanogo mondogat inambotkwe lakfisa wagik, inebe 300 aremnogo nek herakfisigik, isikhe. A'nogo lakfisa wagunem, it ap inebe 300 mene omanogo nen, it ap inambotkwe wesugun mene omanogo inamburu kwemangge inom, inampinggong trompet anethugu mene omanogo inom wanhukwa. It afuni Israel mene o tenda wutukwasik logolik, a'nogo hilingitukwa andi sambul he, ap Midian mene re inawi tenda wurogo it Israel mene werek oba omanogo nen a'makwe tonggoma werek kwelek hilingitukwa.

⁹ A'nogo lakfisa wagaikhesik, nogo ugunem hubanggo Tuhan nen Gideon mel yagatikhe, ”Gideon. Hebe siakhogo menla'luk he, afuni Midian mene inawi tenda wuri'mo inoba wulibinogen, pin o. Pegen halok he, An nen afuni Midian mene andi hat henggiba fagain o.

¹⁰ A'nogo meneat he weim kugu aple hailo aga halok he, hamingmingengge Pura ayonggo fembik he, hemberek hinaselei mene inawi tenda wuri'mo pino o.

¹¹ Pumo re, hinaselei mene inane ugunem hesanggo holimbik andemat hailo lek asimbik, hobabut inoba wulibigin mene hilinglasigin o,” iluk yagatikhe. A'nogo yagatikhemo, at Gideon Pura emberek inaselei mene inawi tenda wuri'mo era'lu horokhogo pisukwa.

¹² Pisukwa re, ap Midian mene inom, Amalek mene inom, ap ekhe inaiba o leimo mo liabi wagarek higit andoma mene inom, omanogo inebe pulue andogorek welagarek hangge inebe tonggoma andoma ya logalek ta logalek welagaukwa. Nen, inanggo unta re, mondok hokhorogo ial i esanggokwe welagarek andi hangge welagaikheat.

¹³ A'nogo were'ma, at Gideon andoma pisikhe hak he, it ap Midian mene ekhe abi hasikhe mene are ekhe mel yagatunem, at Gideon esanggo holhikhe: ”An nabi wokhugunemen he, roti misik ekhe hombunu mene limbil-limbil he, nit ninawi tenda wuri'mo pi wagasik he, o tenda misik ekheba tunghogo re, o a'nogo kweangma tandam esi pugunem higi o,” iluk yagatikhe.

¹⁴ A'nogo yagatunem, at agailak a'nogo nen he, ”Eige! nailo e. Habi andi re, ap Yoas amlogo Gideon Israel mene a'nogo enggarok waluk pi wesigin mene faget hegen o. At Allah nen nit Midian mene ninagoromi tentara mondogat ninom at Gideon enggimo fikhemo hilingisigin mene faget hegen,” iluk yagatunem at Gideon esanggo holhikhe.

¹⁵ At Gideon nen, ap andi abi hasikhe mene agailak andi yagatunem, aren he, ”Ebe yi'nogo mene faget hegenma,” iluk yagatikhe mene andi esanggo holhikhesik he, eindep awi yagaisogo Allah fogeratikhe. A'nogo fogera'luk, ambotkwe ap Israel mene inawi tenda wutukwaba omanogo lagai wagaikhesik he, mel yagaisasikhe: ”Nineisena Tuhan nen ap tentara Midian mene weim yabuogeluk wagaikha mene andi, nit ninenggiba arat fikhemo werego. Halok menlasimbik fik-foukhogo hilingi'ni o,” iluk yagaisasikhe.

¹⁶ A'nogo yagaisasikhesik, agoromi inebe 300 nen omanogo esa henagan logalogo fisasikhe. A'nogo fisasikhesik, it inebe lombok he trompet misik inom iwak kweang mene hilingik meneba esage ibilhu mene elema kwelabegengge misik inom inebe lombok wogisilik lagaikhe.

¹⁷ A'nogo wogisasikhesik, mel yagaisasikhe: ”Nit afuni Midian mene inawi tenda wuri'mo andoma pogo halok he, hineilenggen an noba fanorogo logoino, an nen ekhe hilingiti halok he, hiren ogo a'nogoat hilingi'no.

¹⁸ An nebe inom, ap esa an ninom logoin mene inom, pinggong anethogo halok he, hit hinambinggong anethano aro. A'nogo anethikhi logolik, hinane a'mit sup ikhi logolik mel ino: ”Nineisena Tuhan faget, ninoe Gideon faget,” ilik wulifi logolik, o tenda wurik andoma maset ha lano, iluk yagaisasikhe.

¹⁹ A'nogo yagaisasikhesik, at Gideon ebe inom, agoromi inom, o hup enggen tulem inaselei mene inawi tenda wuri'mo huliba andoma pisukwa. A'nogo pisukwa re, ap Midian mene yerinarek ineil attak welagaukwa mene oloba kugu kwelek, inobali'mo ket mene wulibi wagaukwa hak pisukwa. A'nogo pisukwasik o tenda wuri'mo walinget hasukwasik, at Gideon agoromi inom esa logalek pisukwa mene omanogo inambinggong anethigik, inaesage kweang mene hilingik engge omanogo serelhigik ibilhik isukwa.

²⁰ A'nogo hilingitukwama, it ap esa pire ekhe logalek aremnogo a'nogoat hilingitukwa. It mondogat a'nogo hilingiti logolik, esage ibilogo inenggi harekwe wankhukwasik, inenggi ebekwe pinggong fisogo logolik anethigik, isukwa. A'nogo ikhi logolik, inane a'mit sup ikhi logolik mel isukwa: ”Nineisena Tuhan awein, ninoe Gideon awein, whou wilifilagoa,” iluk inane a'mit sup isukwa.

²¹ It inebe mondogat he ap Midian mene inawi tenda wurikwe omanogo maserogo o ebe lombok kagalek logolik welagaukwa. A'nogo weregen he, it inaselei mene weim yabuogoluk wagaukwa mene omanogo mondogat ina'manggen lagaukwasik, inane kwerik heise yanalek-tanalek pugulhukwa.

²² A'nogo pugulhu kwelek, at Gideon ebe inom, agoromi trompet anethugu werek kwelek, At Tuhan nen selei mene it-it wat-wat asuageluk hilingfisasikhemo, karok oba wat-wat lagaukwa. A'nogo hilingitukwasik pugulogo o Zerera higit yatmaat o Bet-Sita inom, o kota Abel-Mehola o Tabat horokhogo andoma inom lagaukwa.

²³ A'nogo lagaukwama, Gideon nen ap inunggulenu Naftali mene inom, Asyer mene inom, inunggulenu Manasye mene i Yordan aik elikwe mo liabi wagarek higit andoma welagaikharek mene inom, aik yi kwe mo ubukhogo kwi lagarek higit andoma welagaikharek mene inom, inayonggo fesikheat. A'nogo inayonggo fesikhemo, ap tentara Midian mene omanogo mugisasukwa.

²⁴ A'nogo mugisikhi logolik, at Gideon nen ap Israel mene o Efraim tomkwe ekhema-ekhema mondogat welagaikharek mene inoba weim yonggo yi'nogo lakfisasikheat: ”Ap Midian mene andi inoasuogen he, hinebe pi wisimbik, kwe elugunkwe, i Yordan inom, i endep-endepkwe mondogat inom, huli o Bet-Bara yatmaat andoma kagalek hinenggi fago logobagaigen weak-weak pi we'no o. A'nogo were'ma, ap Midian mene ekhe ineluk wulibinogo iluk kagalek logoino o,” iluk weim yonggo lakfisasikheat. A'nogo lakfisasikhemo lagaukwasik, yagaisasukwama re, ap Efraim mene nen he, yonggo fesukwasik, esa logalogo re, kwe elugunkwe i Yordan ima inom, i mage-magengge mene mondogat inom, sebelik-sebelik huli o Bet-Bara yatmaat andoma inenggi fago welagaukwa.

²⁵ A'nogo were'ma, iren afuni Midian mene inogogwi kaindek inebe pire, inenu re Oreb inom, Zeeb inom senfisasukwa. A'nogo senfisasukwasik, Oreb ebe helep enu Oreb salhukwaba andoma nen watukwa. Nen, at Zeeb enek he anggur amusu keralharek oba enu Zeeb salhukwaba andoma nen watukwa. A'nogo inoarik-inoarik, ap Midian mene a'nogo muginarek fisa lagaukwasik, ap Oreb inom, Zeeb inom, inungguloak palogo re at Gideon ebe i Yordan palogo wulifikhesik aik elikwe mo liabi wagarek higit andoma were'ma wogosi wulifukwa.