HAKIM–HAKIM 4 - Allah Wene Fano Wene Hupla Inane

He Debora inom, ap Barak inomen hilingitukwa wene

¹ Ap Ehud ebe wa'lagaikhesik oba nen, afuni inunggulenu Israel mene nen Tuhan ane sagalogo weak hilingiti lagaukwaat.

² A'nogo hilingiti lagaukwama, Tuhan nen afuni o Kanaan mene inoe raja enu Yabin o kota Hazot welagaikhe mene nen mabenet fisoageluk, it Israel mene herakfisasikhe. At kain Yabin agot weim anini weak mene enu re, Sisera. Ebe o kota Haroset-Hagoyim andoma welagaikhe.

³ At kain Yabin angge kereta weim yafu mene posiemanggen meneba hilingik menere 900 nen welagaikhe. Were'ma, aren afuni Israel mene 20 tahun ferinarek logolik mondok wiik-weakhogo hilinginafi lagaikhe andi nen, iren he, ”Nineisena Tuhan telninabin o,” iluk inane hokhorogo yagati lagaukwa.

⁴ Andem sambul he, ap Lapidot agwe enu Debora, Allah ane yagaisikhi lagaikhe mene andi nen, afuni Israel mene wene inoba figik, kotik, ikhi lagaikhe.

⁵ A'nogo hilingiti logolik, afuni inunggulenu Efrayim mene inawi tom ebene o Rama honggolek, Betel honggolek, tulem honggole'ma andoma, e kurma ekhe eroma hundik-handik hu'lasi laluk welagaikhe. A'nogo were'ma, afuni Israel mene unggum inoba mene, aren pilingisogo tegesuagaluk oba waga lagaukwa.

⁶ At andoma logolik, inenggi ekhe sambul he, afuni nen ap Abinoam amlogo Barak andi aiba kota enu Gedes, afuni inunggulenu Naftali mene were'ma andoma wene mel yagasi loagaluk lakfisasikhe: ”Afuni Israel mene ineisena Tuhan Allah nen hat yi'nogo hilingisuageluk yagahete: Afuni inunggulenu Naftali mene inom, Zebulon mene inom, ap inebe 10.000 nen andogorogo fisambik, tom Tabor oba woginarek lano o.

⁷ Lamo, An nen kain Yabin agot weim anini mene Sisera agoromi kereta kuda nen lisogo weim yabi lagarek mene nen hinoasi wesuogeluk, it inebe i Gison ima wagaikhesik werego. A'nogo meneat he, hinom weim yafunem, it mabenet fisanogen iluk henggiba fagain o, iluk yagahete,” iluk yagasi loagaluk lakfisasikhemo yagasi lagaukwa.

⁸ A'nogo yagatukwama wagaikhesik, at Barak en he Debora wene onggo yi'nogo yagatikhe: ”Hat hebe ninom logoin halok he, an ninomat logoin o. A'nogo meneat he, hat kamo igin halok he, an ninomat kamo ugun o,” iluk yagatikhe.

⁹ A'nogo yagatikhemo, at Debora nen mel yagatikhe: ”Fano. An ninom logoin o. Mene re, hobuk hat agaukhogo fogethabugun lek a'naga hendawimo eberek logoino. At ap Sisera andi, he ekhe nen wasuageluk Tuhan nen enggiba fagain andi,” iluk yagatikhe. A'nogo yagatikhesik, at Barak inom Debora inom emberek o Kedes lagaukwa.

¹⁰ A'nogo louwogeluk, at Barak en ap inunggulenu Zebulon mene inom, Naftali mene inom, andogorinafikhesik, Debora emberek lagunem, ap inebe 10.000 mene inombo'ne o Kedes lagaukwa.

¹¹ Andem sambul he, at Heber unggulenu Keni mene afuni at unggulenu mene herakfisaluk wulifikhesik, o tenda meneba e hei eroma o Zaanaim, Kedes horokhogo andoma wusi lagaikhesik welagaikhe. (Afuni inunggulenu Keni andi re, ap enu Hobab Musa ombasi andi nen tagomangge mene.)

¹² Afuni nen he, ”Barak tom Tabor oba waga,” iluk isukwama at Sisera esanggo holhikhesik he,

¹³ weak-weak angge kereta weim yafarek mene posiemanggen meneba hilingik mene ebe mondogat he 900 nen omanogo agoromi tentara mene esa logalek omanogo inom andogorogo fisasikhesik he woginarek o Haroset-Hagoyim en i Kison ima wagaukwa.

¹⁴ A'nogo wagaukwama, at Debora nen Barak mel yagatikhe: ”Yogo, heisena Tuhan nen yagaheri'lagonggere lan. Aren yogondak yi sambul he at Sisera andiba nen homamet feigiluk werek. Ma re, lano,” iluk yagatikhe. A'nogo yagatikhemo, at Barak agoromi tentara mene inebe 10.000 nen inom tom Tabot oba nen pisukwa.

¹⁵ Pisukwasik, Sisera lak inoasuogeluk inoba wulifukwa. A'nogo wulifukwama, Tuhan nen Sisera angge kereta weim yafarek mene omanogo waluk nikhi lagaukwa mene inom, agoromi tentara esa ekhe logolek mondogat inom, inobabut nong-honget fisasikhe. A'nogo nong-honget fisasikhemo, at Sisera a'nogo angge kereta ba nen kweangma pi wagaikhesik, heise eisok oba hela wagaikhe.

¹⁶ A'nogo wagaikhemo, ap Barak en aselei mene kereta kuda weim yafarek mene inom, tentara mene esa ekhe logalek omanogo inom, muginarek o Haroset-Hagoyim fisa lagaukwasik he, ap Sisera agoromi tentara esa logolek omanogo ap misigat ekhe herakfisigi'lek felelenghogo inoatukwa.

¹⁷ A'nogo inoa'luk lagu kwelek, at Sisera a'nogo weim heise poloksek wagaikhesik, at ap raja Yabin aiba Hasor mene ap Heber unggulenu Keni mene a'nogo oe agot inom hundik welagaukwa andi nen he, at Heber agwe Yael awi tenda meneba wuri'mo hina'lasi wagaikhe.

¹⁸ At Sisera a'nogo wagaikhemo re, at Yael en at ebe wanhikhesik he, mel yagatikhe: ”Noe, an nawi tenda sale'ma yoma kwi me o,” iluk yagatikhe. A'nogo yagatikhemo, at Sisera oloba kwisikhemo re hinago logouwageluk, at Yael en he, kain jendela ba kologo pelabek meneba salogo hinakfesikhe.

¹⁹ A'nogo hinakfesikhemo, at Sisera nen Yael mel yagatikhe: ”An i nele o. I endebat halok ekhe nagen wo'nom o,” iluk yagatikhemo, at Yael en he, iwak wam agap meneba hilingik welagaikhe mene a'nogo elema susu hinagongge were'ma isa'lip huthasikhesik wogotikhemo nasikhemo re, su kain a'nogo ambotkwe salogo hinakfesikhe.

²⁰ A'nogo hinakfesikhemo, at Sisera nen Yael mel yagatikhe: ”Hat hebe o tenda wuri'mo kweba ya mendek logoin o. A'nogo were'ma nen, afuni ekhe wesimbik, yoma afuni ekhe werega? Lega, iluk heinok wokhiugu halok he, lego, iluk yagaisano o,” iluk yagatikhe.

²¹ A'nogo yagatikhesik, at Sisera kwe nen warek nogo nen he, nogo eil agaikhemo nogo homokhogo isikhe. Nogo a'nogo isikhemo, at Yael en helep ungguloba inom, e enggat kabelek o su mene wutu mene faget andoma welagaikhe mene ekhe inom, wanhikhesik samik-samok Sisera oba horokhogo kwisikhe. Kwisikhesik he, at Sisera a'nogo augal fena nen fena furulhogo kweang inom hun fesikhe. At he Yael en Sisera watikhe re, a'nogo watikhe andi.

²² A'nogo watikhesik were'ma, at Barak Sisera herarik wagaikhemo re, ebe wanhikhesik mel yagatikhe: ”Ap hat herarik wagen andi ebe yagahesigen he, eme o,” iluk yagatikhe. A'nogo yagatikhemo, at Barak Yael emberek kwisukwa re, Sisera arat wa'lagaikhesik, e kabelek a'nogo augal fena nen fena furulhogo kweangma hundik were'ma hasukwa.

²³ O andi sambul he, Tuhan nen afuni Israel mene inomamet fesikhemo, iren Yabin, afuni o Kanaan mene inoe raja a'nogo, mabenet fesukwasik inomame agaukwa.

²⁴ It afuni Israel mene nen afuni Kanaan mene inoe raja Yabin a'nogo mabenet fugu mondok welagaukwasigen hobuk at ebe eiloak legetfesukwa andi.