HAKIM–HAKIM 2 - Allah Wene Fano Wene Hupla Inane

Malaikat Tuhan o Bokhim lagaikhe wene

¹ At malaika Tuhan a'nogo o Gilgal en o Bokhim lagaikhesik he, afuni Israel mene yi'nogo yagaisasikhe: ”An nen hit mondogat o Mesir en wokhinarek wulibi wagagisik he, o hinombalak wogisagaluk wene warisasigiba wokhinarek waga logolik, mel yagahisasigi anggigi. An hit ninom wene wato mene andi hobuk palasigin lego, iluk isigi.

² Andi nen he, hiren afuni o andoma welagaikharek mene ekhe hinom wene wa'luk hinom hunitubo. Hunogo mene faget anggo warogo noletarek oba obalik andi meisak'lambukhgo potfisano o, iluk yagahisasigi andi. A'nogo meneat he, An nen, Yi'nogo hilingiti logoino, iluk yagahisasigi a'nogo hak hilingiti'lek logolik, An nen, Hilingitup, iluk wene palhigimene andiat hilingiti lagep andi. Ma re, yogondak wene yagahisagain yi hinesanggo fanorogo holini o.

³ Hiren afuni yoma mene hinom weim yabuogoluk ugunem, An nen it mugusogo wulakfisagain mondok lego. We, it logolik, hit hinaselei mene hilinglasimbik were'ma re, afuni nen paik hele fugunem ke'nok ikherek andi hak, iren allah hunogo mene oba himbirik logolik fogeratarek mene andiba hit ke'nok imbik hinomat fogerati logogun o,” iluk yagaisasikhe.

⁴ A'nogo yagaisasikhemo at malaikat Tuhan nen wene andi arat yagaisasikhemo re, it afuni Israel mene inebe mondogat inane hokhorogo le agaukwa.

⁵ A'nogo hilingitukwa andi nen, o andoma enu Bokhim salhukwa andi. A'nogo salhukwasik, it afuni Israel mene nen wam Tuhan faget waretukwa.

At Yosua ebe wa'lagaikhe wene

⁶ A'nogo hilingitukwasik, at Yosua nen afuni Israel mene omanogo lakfisasikhemo, it o logogun kwe lombok logouwogeluk lagaukwaat.

⁷ At Yosua ebe eluk oba, afuni Israel mene Tuhan obaget enek hilingiti lagaukwa. Nen, Yosua ebe wa'lagaikhesik oba nen ogo re, nineisena Tuhan nen it afuni Israel mene fut fouwageluk elalin mene hilingitunem inogogwi ineilenggen hasukwa mene nen ferinarek werek kwelek, Tuhan obaget enek hilingiti lagaukwa.

⁸ At Nun amlogo Yosua, Tuhan amingmingengge a'nogo wa'lagaikhe andi, ebe umur he 110 tahun agaikhesigen wa'lagaikhe.

⁹ A'nogo wa'lagaikhemo at ebe warek he, at onggwarek anggweangma o enu Timnat-Serah afuni inunggulenu Efraim mene inandom oba punu enu Gaas abel elikwe i elesi fikhit andoma salhukwa.

¹⁰ Hobuk ap at Yosua inom higit welagaukwa mene mondogat inebe wa'larik lagaukwaat. A'nogo wa'lagaukwama, it hobuk ta'larik wagaukwa mene re, Tuhan nen it Israel mene faget hilingiti lagaikhe mene andi ineilenggen furogo higi'lek andi nen he Tuhan ebe inonggot welagaukwa.

Afuni Israel mene hobuk Tuhan fogerati'lek welagaukwa wene

^11-14 A'nogo welagaukwa andi, afuni Israel mene hobuk Tuhan ane sagalogo weak hilingitukwa. A'nogo hilingiti logolik, inombalak ineisena Tuhan Allah nen it o Mesir en woginarek wulibi wagaikhe mene a'nogo fogerati'lek herakfisasukwa. A'nogo logolik, afuni it inera'lukwe andoma welagaukwa mene nen inendawinggen tugwi kembu Baal inom, Astoret inom, tugwi kembu hunogo mene ekhe inom, oba himbirik logolik fogeratarek mene andi fogerati lagaukwaat. A'nogo fogerati lagaukwama, Tuhan nen a'makwe het-perisikhesik, afuni inenggi abisak wanharek mene nen hukhogo kwelaginabi wagik, inangge inenggi abisak heligik, uagaluk inebe herakfisasikhe. A'nogo herakfisasikhemo, it Israel mene a'nogo re afuni it inaselei mene inera'lukwe andoma mene inom weim yabu re inomame mondok elo'lek agaikhe.

¹⁵ Inomame a'nogo lek agaikhesik, it inaselei mene inom weim yafi lagaukwa andi ebe lombok, endamat at Tuhan nen, yi'nogo hilinghinabigin, iluk it inendawimo eberek logouwageluk yagaisasikhe andi hak, it Israel mene inaselei mene higit enek hilinglaga lagaikhe. A'nogo hilingitunem nogo nen he, it inoba enggin-fengginhogo hilinglaga lagaikhe.

¹⁶ A'nogo agunem, ap inenggiabisak wanharek mene esa logalfuluk weagerinabi kwi wagunem, hobugalep at Tuhan nen it Israel mene telinabuageluk he, inogogwi wene inoba figik-kotik ugu mene inayonggo fuluk menfisikhi lagaikhe.

¹⁷ A'nogo meneat he, iren ap it inogogwi andi inane holhi'lek herakfisikhi lagaukwa. Nen, iren Tuhan oba lomborogo welagi'lek, allah amu mene oba fogerati lagaukwa. A'nogo hilingiti logolik, inombalak ineisena Tuhan nen, yi'nogo hilingiti logoino, ti'nogo hilingiti logoino, iluk yagaisasikhe mene hologo higithogo hilingiti lagaukwa andi hak, it inobabut wanhi'lek hunogoat hilingiti lagaukwa.

¹⁸ A'nogo hilingitunem, it inaselei mene nen wiik-weak hogo hilinginafunem iren he, ”Weak hilingninabi'lagwi yoma nabire,” iluk ugu were'ma, Tuhan nen endawirinapluk inane esanggo holfuluk he, inebe telinabuageluk inoe ekhe ayonggo fuluk inoba lakfisaluk leberisikhi lagaikhe. A'nogo leberisugunem, inogogwi andi inebe ineluk logolik oba re, it Israel mene inaselei mene nen inoasinogoluk telinafu welagaikhe.

¹⁹ A'nogo meneat he, ap inogogwi andi inebe wa'lagunem, it afuni Israelk mene attak welagaukwa andem oba inobabut endebat fano hangge mene re, it hobuk mene welagaukwa andem oba nek he, inobabut mondok weagat hilinglaga lagaukwa. A'nogo hilingiti logolik, allah hunogo mene faget, nineisena ebe andiat, iluk andi mene amingmingengge hilingla'luk oba himbirit logolik fogerati lagaukwaat. It inobabut attak mondok weak welagaukwa mene andi herak fisaluk, hobuk inambotkwe hebelu inabit mondok welagaukwa.

²⁰ A'nogo welagaukwa andi nen he, at Tuhan a'ma kwe het-perisikhesik he, mel isikhe: ”An nen it yi inombalak yagaisikhi logolik, wene An nen warogo woginafigi wene andi kofologo herakfanhi'lek ninom hundigat logouwok, iluk yagaisasigi. A'nogo yagaisasigimo ninom hundigat welagagu meneat he, it hobuk mene yi, wene warogo woginafigi mene andi kofologo herakfanhasik, An nen, yi'nogo hilingiti logoino, ti'nogo hilingiti logoino, iluk yagaisasigi wene andi sagalogo hilingiri'lagwi andi.

²¹ Ma re, An nen afuni inunggulenu hunogoat mene at Yosua ebe wa'lagasik oba nen, o yoma werek mene mugusogo wulakfisagain lego.

²² An nen, wene yi'nogo hilingiti logoino, ti'nogo hilingiti logoino, iluk inombalak yagaisasigi mene Nane andi higithogo hilingiti lagaukwa hak, it Israel mene nen a'nogoat hilingisugun a? Lega, iluk inobabut paligiluk, it afuni inunggulenu hunogo mene andi nen inendawimo kagalhi logouwageluk inayonggo fagain o,” iluk isikhe.

²³ Andi nen he, at Yosua ebe wa'lagi'lek werek kwelek, Tuhan nen afuni inunggulenu andoma mene ekhe inenggiba fikhi lagaikhe lek. We, it afuni andi weak-weagat mugusogo wulakfisigi'lek o andomaat herakfisikhi lagaikhe.