HABAKUK 2 - Allah Wene Fano Wene Hupla Inane

Tuhan nen wene onggo Habakuk yagatikhe wene

¹ An nen wene Tuhan yagati mene a'nogo onggo ninggi'nogo yaganesigin? An nen afuni yagaisoageluk ninggi'nogo mene yaganesigin, iluk kwe pelare'ma ineilenggen welagaikharek oba andoma lagambik mendek logolik yerogo logogin,

² iluk igimo, Tuhan nen wene onggo mel yaganete: ”Kweang tangge meneba An nen yagahesigin mene andi enegenggerogo hugu mene faget hesesengge weinamhogo wokfeino o.

³ Wene ebe hilinglasigin oba oan andi nen he, lisu palogo fein o. Oba nen he, ebe hilinglasigin oba andi weak-weagat wesigin, An nen ebe hilinglasigin iluk yagaheti mene andi re eberogoat hilinglasigin o. We, wene ebe aninuat werek kwelek meneat he serogo logoino! Eberogoat hilinglasigin iluk eberek logoino.

⁴ Ebereogo nen he, it weak hilingiri'lagwi mene andi fano asugun lek. Oba nen he, it ekhe Allah endawimo anggikherek mene andi higithogo hilingiri'lagwi mene nek he, inendawinggen Allah oba himbiret fuluk logogun andiba, ineluk mondok logogun o,” iluk yaganete.

Afuni weak hilingiri'lagwi mene homan fisagain wene

⁵ Inangge hokhorogo welagarek andi nen, inebe lalinaferek. Ap onggwarek faget enek anggikherek mene andi re ap an nangge logoilep iluk anggikherek mene inom, leget fakhikherek mene inom, it ariginik mene andi re wa'lagaikharek mene hilingitu mene andiba nen ogore it inoba homo ikherek lek, a'nogo hilingiri'lagwi andiba re afuni inunggulenu ekhema-ekhema welagaikharek mene omanogo re it inonggwarek faget enek inawe a'ma fisagarek andi.

⁶ Oba nen he, it inawe a'ma fisili'lagwi mene andi nen, it inomame werek mene omanogo inane asegen wogisigik, inenggali watik, ikhi logolik he, ”Hat hangge lek oba nen kabogerikhi lagenma re homan ugu logoin o! Ki huli nen weak-weak nenggi werek asigin iluk ap hat hoba palegengge werek mene omanogo nombalegengge wo'ne'ni iluk hane ninghogo yagaisugu logogin nogo?” iluk agarek andi.

⁷ Hit hinonggorat were'ma, it ekhe inangge mene hinoba palegengge welagep mene andi, ebe mene wo'nisikhi logolik, oba loukhogo ekhe wo'nisani, iluk inane ninghogo yagahisogoin aro. Nen, hit hinaselei mene wesimbik he, hinailo asuageluk hilingiti logolik, hinangge inenggi abisak helogoin o!

⁸ Hiren he, afuni inunggulenu lombok o yi awi ti awi welagaikharek mene, hinaniniba inebe inoatik, inawi kota meisalhik, inebe weagerinafik, ikhi logolik, inangge hinenggi abisak telogo helasigip andi nen he, hobuk it mene ekhe fena ineluk logogun mene nen, lagokhogo hit hinangge inenggi abisak telogo helogoin o.

⁹ Hinonggwarek hinagainafuri hinom hinalawi engginhogo helouwogoluk, hinanini weak it ekhe inangge mene teligik, nen hit hinaiba it ekhe nen inenggi abisak wani kwi wesinogo iluk ninghogo wutik, ikhi lagep andi nen he, homan ugu logoni o!

¹⁰ Hit hinobabut hilingiti lagep andiba, hinonggwarek hinagainafuri inenggali ari'lagwi andi. Afuni inunggulenu lombok weagerinafi lagep andiba re hinonggwaregen weaget fakhikhi lagep.

¹¹ Nen, helep leget waganek mene inom, o langoak pelabek mene inomen inane kweri'lagwi andi ogore, hit homan hinobagakhi logolik kweri'lagwi aro.

¹² Hiren o kota wutep andi re, ero weak hilingiti lagep meneba inom, ap wati lagep meneba inom wutep andi nen he, yogondak hit he homan ugu welagep andi!

¹³ Afuni inunggulenu lombok hiren sebelogo fisasigip mene andi, wiik-weakhogo wutukwa mene endu ninggik, set awi kwil-kwalhogo hilingiti lagaukwa mene alomat lakhigik, igin andi re, Tuhan yi mene ti mene hilingiteregenek mene a'nogo nen endawimo anggikhebaat hilinglasigin o.

¹⁴ Andi re, i laut hokho mene yenggelek agum puaksek welagarek andi hak, o kweangma mondogat he Allah omame werek mene inom At elu mondok welagarek mene inom mondogat saga igin o.

¹⁵ It ekhe o hit hinera'lukwe mene inelokhoma inabok palhik, inenggali warogo hilinginafik ugunem, it inebe lugu-lugwi palharek hak talo-talonggeri'lagwi andi nen he, Hit he homan ugu logoni o!

¹⁶ Nen hiren a'nogo hilinginafi lagep andi nen he yogondak asi waga mene andi re hit fano agaugwet hinabigiluk waga re fuk, athe hinenggali wagoro weaget hinabigiluk waga o. Agaugwet hinafarek mene andi hebekhogo hinenggali asu mene hilinghinobagagin. Tuhan nen unggum i amusu arik weak mene hinago omameba wokhisamo nambik, talo-talongge hilingisugun.

¹⁷ Hit hinaniniba afuni o yi awi ti awi welagaikharek mene inamep wulagaisogo inoatik, inawi kota sili mondok weagerogo figik ikhi logolik, o Libanon andoma e mondok mugusogo sukwalet fesigip andi hak, hinebe a'nogo mugusogo leget hinobagagin o. Hiren wam, sue paik andoma mene warogo legetfisasigip andi hak, wam paik sue andi nen hobuk lagokhogo hinailo mene hilinghinobagagin aro.

¹⁸ Hineranen e mene pugunhogo agauwak hilingisogo fuluk, ”Nineisena, ebe yi aro” iluk ikhi lagep andi nenahalok? We, tulemaro. Andi mene nen ebe wene yagahisikherek nogo? Lalhinaferek mene o. Ane mondok lek meneat he, hiren ebe pugunhogo afe halogo hilingfuluk tulemat oba himbirik welagep andi.

¹⁹ Hiren he, e mene yagati logoligat he, ”Heluk ame,” igik, helep mene yagati logolik he, ”Menlame,” igik, ikhi lagep andi, it andi nen onggo yagahisogoin nogo? Elokhe fanorogo iluk he, emas mene inom, perak mene inom, ebene labulogo pugunhogo afe halek meneat he, areagun werek lego. A'nogo hilingiti legep andi nen, Allah nen homan hinobagauwak.

²⁰ Meneat he, Tuhan ebe onggwarek awi wuri'mo hore'ma welagarek andi nen he, yi afuni ti afuni o kweangma mondogat welagaikharek menere At a'ma nek inabolok legat logogun andi fano.