FILIPI 3 - Allah Wene Fano Wene Hupla Inane

”Attak hilingiti lagagi andi, nong aga lagagimo, iluk, hobuk ket mene hilingiti lagi,” isikhe wene

¹ Nerugwi nagaila'lak. Wene andi yagahisagen he, ninoe Enupogot hinom hundik logolik, hinendawimo hinagaiyek anggikhi logoino, igi andi. It ekhe nen weaget hinafi'lek hinebe fano logobagaigeluk, wene attak lisu palogo lakfei wagagi meneat, nambe senap agi'lek hobuk nane ekhe inomat yagahisagain aro.

² It afuni ekhe inobabut mene olo mene obabut hangge andi nen, yi mene ti mene faget weak hilingiti logolik, ”Hinagap hinenggalimo mene palogo lakfisano,” iluk hinendawimo kagali wesinogo iluk hinebe hebelogo logoino o.

³ Nit he, ninagap ninenggalimo mene arat palek logou hak, ebe meneat hilingiti lago. Allah Areagun en ninendawimo kagalhu kwelek, Allah ebe fogeratik, Kristus Yesus ninom hundik welago, iluk, fogerakhigik, ikhi logolik he, yi wene ti wene ninagap endakwe yi faget hilingitorek andiba fanotninabigin iluk anggikhi lago lek.

⁴ Ninagap endakwe yi faget hilingitorek andiba fanotninabigin iluk angga higit logoilepma re, it afuni ekhe nen elo'lek hak, anggugu kwelek, an enek he, esin hak anggikhi logoile.

⁵ An nebe ta'lagagimo inenggi 7 nen welagaukwasigen, inenggi ekheba, nagap nenggalimo mene palnafukwa andi. Nebe Israel mene, nunggulenu Benyamin meneat, nagaisa neisena Israel mene andi nen he, nebe Ibrani eberogoat meneat ta'lagagi andi. Wene Allah nen komotninafikhe wene a'nogo faget, ap Farisi mene nen fisogo welagaikharek hak, ninghogoat fisogo welagagi mene.

⁶ Allah faget anggilukhogo hilingitarek mene andi, an a'nogoat fano hilingiti lagi hea, Allah againafuri inendawinggen Yesus oba himbiret fesukwa mene yi enggin ti enggin hilinginabik nikhi lagagi andi. A'nogo hilingiti logolik, wene Allah nen komotninafikhe wene a'nogo higithogo hilingitarek andi, an mondok higithogo hilingitunem, afuni ekhe nen wene noba figi'legat tegelek mondok welagagi.

⁷ An attak, a'nogo hilingiti logolik: ”Saburikhi lagi,” iluk anggasigi meneat he, yogondak he, Kristus ebe wanhirik oba nen: ”Attak hilingiti lagagi andi, nong aga lagagimo higi,” iluk futfikhi lagi.

^8-9 A'nogo futfikhi lagi andi nek fuk. Noe Enupogot Yesus Kristus nelu agagi andi fano mondogaro. Yi mene ti mene hunogo mene hilingiti lagi andi, nong asigin mene hilingiti lagagimo iluk, futfikhi lagi aro. At ebe helambik he, ninom hundik mondok logouwogeluk, yabu alengge palogo wulak fisagarek hak, yi mene ti mene attak hilingiti lagagi mene andi: ”We meneat,” iluk herakfisasigi andi. Wene Allah nen komotninafikhe wene andiba, nonggwaregen higit hilingiti lagi fuk. It afuni ekhe inendawinggen Kristus oba himbiret fugunem, wene inoba mene korogo wokhaluk hobuk Allah inom hunogo fisikherek hak, an a'nogoat nendawinggen at oba himbiret fesigimo, wene noba welagaikhe mene korogo wokhasikhe andi.

^10-11 At Kristus yi enggin ti enggin hilik-hilik wa'lagaikhe hak, nemberek higithogoat, an a'nogoat enggin hilik-hilik, wa'lasiginat anggikhi lagi. Mene re, at wa'lagaikhemo, Allah omameba eluget fesikhe hak, an a'nogoat wa'lasumo, neluget nabigin iluk, oba eberegat welagi.

”An helageluk, anggigi mene andi hela lageluk nomamerogo laga lagi,” isikhe wene.

¹² Menere, an yogondak ya, nendawinggen mondok wurik agik, ebe fano mene andi arat heligik, igi fuk. Oano. Fano mene andi an heloageluk, Yesus Kristus nen nebe wo'nafikhe andi nen, ebe hela lageluk nomamerogo hilingiti lagi.

¹³ Nerugwi nagaila'lak. An andi ebe arat heligi iluk nendawimo anggikhi lagi legat.

¹⁴ Andi hela lageluk wene misigat mene yi at hilingiti lagi. Andi ebe re, nobabut attak hilingiti lagagi mene herakfisaluk, hobuk ket mene nelokhoma werek mene andi hela lageluk nomamerogo murok laga lagi. Kristus Yesus ninom hundik were'ma, at Allah nen nayonggo fikhi logolik he: ”Fano mene pogoroba mene wokhesigin,” iluk abok yaganetikhemo, ebe hela lageluk, sa eisok werek sa eisok werek fungusek lagaikharek andi hak, nomamerogo murok laga lagi.

¹⁵ Halok he, nit ninendawinggen wurik mene yi re, wene andi faget futfikhi logouwogo. A'nogo meneat he, hit hinendawinggen wene amu meneba ebeti lagep halok he, fut fouwageluk at Allah nen furogo yagahisagain aro.

¹⁶ Meneat he, yogondak ninobabut wene andi higithogo hilingirik waga lago ya hagat, a'nogoat mondok hilingirik laga logouwogo.

¹⁷ Nerugwi nagaila'lak. Hit hinobabut an hilingiti lagi hak, nobabut waganogo, a'nogoat hilingiti logolik, it afuni ekhe nen nit ninobabut waganogo hilingiri'lagwi mene andi, hineilenggen fut fisikhi logoino.

¹⁸ An attak he, nenggi hobuk alep yagahisasigi hagat, yogondak nane hebekhogo yagahisagat. Afuni inebe hokhorogoaren: ”Kristus nit faget eba menfuluk watukwa a'nogo, ninabit,” iluk inom weim palek hak logolik inobabut weak hilingiri'lagwi mene andi inobaget le aga logolik yagahisikhi lagi.

¹⁹ It andi inendawinggen Allahba himbirik logou meneat he, inoba agasabu agunem hilingitarek andi meneba himbirik logolik, inenggali ha meneat he, fano heaba andi fagerat inenggali lek fogerakhili'lagwi andi. A'nogo hilingiti logolik he, inendawimo nen yi namolo ti namolo, wene kweangma mene oba eberi'lagwi andi, wurep oba arat nong asuguno.

²⁰ A'nogo meneat he, nit ninawi ero pogoroba werego. Ninawi eroma andoma nen, ninoe Enupogot Yesus Kristus hobuk telninabi wesigin andi nenangorogo welago.

²¹ Andi ebe wesimbik he, nit ninebe ninomame lek logolik, ninagap fili agarek mene yi herakfisaluk obali'mo re at onggwarek agap hak fogeratarek mene a'nogo nirogo a'nogoat ninagap ket mene hilingninobagagin. At omameba yi mene ti mene mondogat at awe a'ma fisagain andi nen he, at ebe fogeratarek hak, nit ninebe fogetninabugun mene hilingisogo ninobagagino.