FILIPI 2 - Allah Wene Fano Wene Hupla Inane

At Kristus onggwarek faget fogerakhigi'lek hilingiti lagaikhe hak, hit a'nogoat hilingiti logoino o, iluk yagaisasikhe wene

¹ Nit Kristus ninom hundik logolik, aren ninendawinggen ago watninafik, ninebe endawirogo ninendawinggen sebelhik, Areagun ninom hundik logolik, lebetnisigik, ugu kwelek nit-nit agamhogo nendawi-hendawirogo hilingitorek andi nen,

² an nendawimo hokhorogo nagaiyek anggikhi logoigen, hinendawinggen misigat logoino. A'nogo logolik hit-hit nendawi-hendawirogo misigat mene hilingitik, hinobabut hinendawinggen misigat welagik, ikhi logoino o.

³ Yi mene ti mene hilingisuogeluk, hinendawimo nen he: ”An enek fanorogo hilingiti logogin,” iluk, hinonggwaregen legeisogo fakhikhi logogubo, hinendawimo nen fogerakhigi'legat: ”It ekhe fano. An he, elo'lek,” iluk, anggikhi logoino o.

⁴ A'nogo anggikhi logolik he, hinebe mondok hinonggwarek faget enek oba ebeti logogup. It afuni ekhe faget inomat inoba ebeti logoino o.

⁵ Hinobabut he, at Kristus Yesus nen endawimo ebeti lagaikhe hagat ebeti logoino o.

⁶ At ebe re, Allah meneat logolik, endawimo nen he: ”An Allah ninom higithogo welagi yi, yi higirat mondok logogin,” iluk anggigi'lek,

⁷ onggwarek ebe eranenat herakfisaluk nit afuni ninom higit agaikhesik he, ebe inamingmingengge higit agaikhe andi.

⁸ At onggwarek ebe sebel fakhaluk: ”An nobabut he, neisena nen, wa'lasuak, iluk, anggikhe higithogoat ane hologo logogin,” iluk, ebe eba menfuluk wasuageluk anggasikhe higithogoat e nunggulik oba wa'lagaikhe.

⁹ A'nogo anggasikhe andi nen, ebe Allah nen esinet fesikhe. Esinet fuluk he, it ekhe inenu sebelek hak werek kwelek, arenek he, Enupogot logouwageluk esin meneat salfesikhe.

¹⁰ It pogoroba mene inom, kweangma mene inom, kweang a'ma mene inom, mondogat Yesus fogerati logolik, ineindep awi yagaisogo inebe lombok, at awe a'ma kugun andi.

¹¹ A'nogo kuluk, inambeba lombok nineisena Allah fogerati logolik he: ”Ninoe Enupogot Yesus Kristus andi aro,” iluk, fakhogo ugunat andi.

”Hit afuni kweangma mene inanggelekwe logolik selegerinafi logoino o,” iluk isikhe wene

^12-13 Nerugwi nagaila'lak. Hinebe nendawi e. An ninom logolik, nane hundik-handigat ugunem hologo hilingiti lagagip andi hagat an yogondak nebe weat werek kwelek, nane andiat esinet fuluk he, hologo mondok hilingiti logoino o. At Allah nen, hiren hilingiti logobagaigeluk, hinendawinggen wenggelogo hilinghinafunem, hit hinendawimo nen he: ”I, nit a'nogo hilingiti logou ninamolo,” iluk, Allah endawimo amolo mene hilingiti lagep andi nen, at ebe hinailorogo hinoak elekwe lei'leik ikhi logolik: ”Aren telninabigin,” iluk andi fagerat hilingitu mondok logoino o.

^14-15 Hiren he, at Allah eilhanem wene hinoba legat, nen, weak mene hinendawimo legat logouwogeluk halok he, hinebe Allah againafuri weak hilingiti'lek tegelek mondok logolik, o mum were'ma hesagal en selegeraterek hak, afuni yoma inobabut kwanirogo weak hilingitarek mene inanggelekwe selekhogo logolik, yi mene ti mene hilingiti logolik: ”Ninabit,” iluk uarek-puarek hilingiti'legat, wene palhi'legat, hilingiti logoino o.

¹⁶ A'nogo hilingiti logolik, yi mene ti mene sumburogo wogisouwogeluk inugisagarek hak, wene afuni inebe inelugerinaferek wene andi yagaisilik nikhi logoino o. A'nogo yagaisikhi logogun halok, at Kristus wesigin andi sambul, an nen: ”Mep awi wil-walhogo nomamerogoat hilingiti lagi mene andi we elalinat alemarogo hilingiti'lek. We, Kristus faget higit hilingisogo fisigimo,” iluk nalong asigin andi.

¹⁷ Mene re, afuni nen wam domba Allah faget fisaluk, warogo endu nolesuogeluk, amboloba enggen amusu pelafarek hak, hit hinendawinggen Allah oba himbiret fuluk wogetunem, amboloba afuni nen an nebe warogo namep pelafa halok, an nendawimo nagaiyek anggugunem hit mondogat hinendawimo hinagaiyek anggogoin aro.

¹⁸ A'nogoat, hit hinendawimo hinagaiyek anggugunem, an nendawimo nagaiyek anggagain aro.

Wene at Timotius faget inom, Epafroditus faget inom yagaisasikhe wene

¹⁹ Hit eroma hilingiti lagep mene faget, hinabok an nelu asimbik nendawimo fano asuageluk, nendawinggen ninoe Enupogot Yesus oba himbirik were'ma, aren lebetniikherek andiba, at Timotius a'nogo weak-weak hinoba lakfei wesigeluk anggikhi lagi.

²⁰ It afuni ekhe yoma inobabut hunogoat hangge werek kwelek, at Timotius alegat obabut an nobabut hangge logolik, hit hinebe endawirogo hinoba eberogo nen eberek welagarek.

²¹ At a'nogo werek kwelek it afuni andi inebe mondogaren he, Yesus Kristus faget hilingiti'lek logolik, inonggwarek faget enek esinet fuluk herakhili'lagwi.

²² Mene re, at Timotius obabut enek at hilingiterek a'nogo hinelu. Inamlogomi nen ineisugwi leberisagarek hak, at ebere, Allah awe a'ma logolik an lebetneoageluk fano wene a'nogo nemberegen yagaisilik nikhi lagosik.

²³ An hilingnabugun mene wene ebe furogo nelu agi halok he, at ebe weak-weak hit hinoba lak fei wesigin, iluk anggikhi lagi.

²⁴ At ebe lak fei wesimbik he, an nendawinggen ninoe Tuhan oba himbirik welagi andiba, aren lebetniugunem he, nebeat weak-weak wesigin iluk anggikhi lagi.

²⁵ At ninagailak Epafroditus an Allah faget nalegaren hilingisu elo'lek were'ma, lebetneoageluk noba lakfei wagagipmo re, weim yafi logolik ninghogo yafarek hak, nemberek Allah faget ninghogo hilingiti lagosik he, hobuk ambotkwe hinoba lakfei wesigin anggikhi lagi aro.

²⁶ At endawimo nen anggikhi logolik: ”An nebe ou wanhi a'nogo, nabok it nagaila'lak mondogat inesanggo holhasik, iren ninggi'nogo anggili'lagwi,” iluk, menenei uan horok ebeti logolik: ”It mondogat inoba lagain o,” iluk anggili'logo.

²⁷ Ebere, ou wanhi logolik wa'la'lep meneat he, an nendawimo weak werek kwelek wa'la'lepma re, hobuk nendawimo mondok weagat asinogo iluk, Allah nen at endawiat, nen, an nebe endawiat, logolik, ebe fano higitemo werek andio.

²⁸ At ebe hobuk hinoba wagunem hineilenggen haluk he, hit hinendawimo hinagaiyek anggigik, an nendawimo weak welagi mene fano agik, uogen iluk he, weak-weagat hinoba lakfei wagi andio.

^29-30 At ebe wagunem he, ninoe Enupogot hinom hundik logolik he, hinendawimo hinagaiyek anggikhi logolik at ebe wanino o. Hiren ninggi'nogo lebetnea heat andi nen, hinobali'mo aren lebetneageluk he: ”Nebe wa'lagi halok fano aro,” iluk, Kristus faget hilingiti logolik wa'la'lep mene andi. It afuni ekhe inobabut at hilingiterek hak hilingiri'lagwi mene halok hinane agaukhogo yagaisikhi logoino o.