EFESUS 5 - Allah Wene Fano Wene Hupla Inane

”Hinebe Allah againafuri o selek oba logolik, hilingiti logoino,” iluk yagaisasikhe wene

¹ Hinebe Allah againafuri at endawi mene welagep andi nen he, at obabut wanino.

² Afuni nen yi mene ti mene Allah faget fisaluk, ebe warogo endu noletunem, Allah endawimo fanorogo amben fano mene liageti lagaukwa andi hak, at Kristus nit ninebe endawitninafikhesik he, ”It faget an nebe noasuago,” iluk anggasikheba ebe watukwa andi nen Allah endawimo fano agaikhe andi hak, nit-nit nendawi-hendawirogo hilingiti logouwogo.

³ Hinebe Allah againafuri logolik hinobabut hilingiti logou meneat higithogo hilingiti logogun. Halok he, pailak fakfisigik, inenggali lek weak hilingitik, ”Yi mene ti mene an enek wo'ne'lep,” iluk inendawimo nen anggigik, agarek andi mene, afuni ekhe nen he, ”It ekhe a'nogo weak hilingiri'lagwi,” iluk, hinabok weak sagerasinogo iluk, weak ekhe hilingitubo.

⁴ Pailak fakfisagarek mene abok igik, wene inendawinggen lek agarek mene igik, inenggalimo mene faget asegen abok igik, u lek mene andi igi'legat, Allah at hai watu mondok logoino o.

⁵ It afuni pailak fakfisagarek mene inom, inenggali lek weak hilingitarek mene inom, ”Yi mene ti mene an mene nek logoilep,” iluk inendawimo nen anggaluk hilingitarek mene andi, tugwi kembuba himbirik logolik hilingitarek hagat hilingitu halok, Kristus Allah emberek inawe a'ma fisugunem welagaikharek oba andoma eisewerek asugun mondok lego, iluk, fanorogo hinendawimo ebe'ni o.

⁶ It afuni Allah ane higithogo hilingitarek lek mene nen, wene igi mene andi a'nogo hilingitunem Allah a'mage lagaluk weagerinabigin andi nen he, it ekhe nen inane we hesanggeat ikhi logolik he, ”Weak mene a'nogo hilingisumo fanoat,” iluk, lalhinabinogo.

⁷ Halok he, hit it andi hinom misik lambulogo logogun lek.

⁸ Hit attak he, o mum oba welagagip meneat he, yogondak Tuhan againafuri mene agepsik, o selek oba welagep andi nen he, hinobabut o selek oba logolik hilingiti logogun meneat higithogo hilingiti logoino o.

⁹ E ero fano mene nen enggen fano meneat iterek andi hak, afuni o selek oba logolik yi mene ti mene fanorogo higithogo inendawinggen oba nen eberogoat hilingitarek andi.

¹⁰ Hinendawimo nen he, ”Ninobabut ninggi'nogo hilingiti logogun halok Tuhan oba liok igin,” iluk, hinendawimo futfuluk, hinobabut andi meneat yanggulino o.

¹¹ It o mum oba logolik he, fanorinabigin lek mene weak hilingiri'lagwi mene andi re, hinom lambukhogo hilingiti logogun lek. Athe, a'nogo hilingitunem fakhogo wenagisikhi logoino.

¹² It afuni ekhe hinagaisogo hilingiri'lagwi mene andi inabok ugunem he, inenggali asu hak andi nen he, inabok ikhi logogun lek.

¹³ Yi mene ti mene fakhogo o selek oba fugunem, enegat agarek andi.

¹⁴ A'nogo selek oba fugunem enegat a'luk he, selek agarek andi nen he, mel agarek andi: ”Hat nogo ikhi lagen andi, hebe menlame o. Nen, warek hangge welagen andi, helugame o. At Kristus nen selegethabigino,” iluk agarek andi.

¹⁵ Andi nenat, hinobabut hebelogo hilingiti logoino o! Afuni inendawinggen mum mene nen hilingitarek andi hak hilingiti'lek, inendawinggen wenggelek mene nen hilingitarek hak hilingiti logoino o.

¹⁶ O yogondak obabut weagenek hilinglari'lago andi nen he, hit hinobabut we tulemat alemarogo hilingiti logoinogo iluk, fano hilingisu werek yabaat hinobabut fano mene andiat hilingiti logoino o.

¹⁷ Hinendawinggen mum logogubo. We, nineisena Tuhan endawimo amolo anggikherek mene ero andiat herakhaluk higithogo hilingiti logoino.

¹⁸ Anggur enggen amusu hokhorogo nunggunem andi mene nen hinebe lugulugwi palhi logolik weagethinabinogo nen he, ninggi logogubo. Oba nen, we Allah Areagun andiat hinendawimo peterogo wanino.

¹⁹ Hit-hit wene hinane mati logolik, Allah wuniba inom, Allah fogeratu awuniba inom, Mazmur Daud en felalogo wati lagikhe awuniba inom, hinendawinggen oba nenat hinagaiyegeti logolik Tuhan fogerati logoino.

²⁰ Hundik-handigat yi mene ti mene mondogat faget he, Tuhan Yesus Kristus enu hombuk palogo re, nineisena Allah hai wati logoino o.

Hemi ap waganek mene nen inobabut hilingiti logogun wene

²¹ Kristus fogerati logolik, hit-hit na'ma ha'ma hilingiti logolik inane hologo agaugwerati logoino.

^22-23 Nit Allah againafuri ninebe Kristus ebe hangge were'ma, aren telninafikhesik he, ebe ninoe kain welagarek hak, hemi inogogwi kaindek he, inaguniat andi nen he, hit hemi re, ninoe Yesus Kristus awe a'ma logolik ane hologo hilingiti lagep andi hagat, hinaguni lombok inawe a'ma logolik, inane hologo hilingiti logoino o.

²⁴ Nen, nit Allah againafuri Kristus awe a'ma logolik ane hologo hilingitorek hak, hit hemi re, yi mene ti mene faget mondogat hilingisuogeluk he, hinaguniat inawe a'ma logolik inane hologo hilingiti logoino o.

²⁵ At Kristus nen nit Allah againafuri ninebe endawit ninafikhesik he, ”It faget noasuago,” iluk anggasikheba ebe watukwama wa'lagaikhe hak, hit aben ogo re, hinagagwi a'nogoat hinendawirogo hilingiti logoino o.

^26-27 At Kristus nen a'nogo hilingitikhe andi re, nit Allah againafuri mondogat ninebe ninagambut pale'lek, ninagap pulangsek lek, fano logou hak, at eilhanem wene ninoba lekhogo, fano mondok tegelek logouwageluk, ninebe ima pelakninafunem, at Aweneba sobalogo ninobagaluk, at onggwarek faget fakhasikhesik ebe wa'lagaikhe andi.

²⁸ Andi hak, hit aben he, hinonggwarek hinebe hinendawi welagep andi hak, hinagagwi lombok inebe, ”An nonggwarek nebe hanggeat,” iluk, hinendawirogo logoino. Ap he, inagagwi inendawirogo welagaikharek mene andi, inonggwarek inebeat inendawirogo welagaikharego.

^29-30 Afuni ekhe nen inonggwarek inebe inabit ekhe welagaikharek nogo? Lego. Ninonggwarek ninamburu fano mene ninggik, ninebe aleligik, ogorek hak, at Kristus nen he, ”Allah againafuri an nonggwarek nebe mene nenggi neisok hangge,” iluk a'nogo alelogo fetninarek welagarek.

³¹ Andi faget, Allah ane mel isikhe: ”Andi nen he, aben agaisa eisena herakfisaluk, agwe emberek fano logolik he, inebe pire meneat he, misigat hilingla'luk logouwago,” iluk, isikhemo lisu palogo fesukwa andi.

³² Wene isikhe andi endawimo hinago mene wene esin mene ekhe werek. Wene andi an nendawimo nen he, at Kristus nit Allah againafuri ninom fano hundik logogun mene faget isikhe anggigi.

³³ Mene re, hit hinebe faget inomat isikhe. Hit ap he, hinonggwarek hinebe hinendawirogo welagep hak, hinagagwi lombok hinendawirogo welagik, hit hemi hinaguni lombok agaugwerinafik, ikhi logoino o.