BILANGAN 8 - Allah Wene Fano Wene Hupla Inane

Lampu obalik hal fikhi logogun mene faget isikhe wene

¹ Tuhan ane Musaba yagati logolik,

² ”Haren Harun oba yagati logolik he, lampu eisok agolerogo ebe sabiren hilingik aremnogoba wialfilik laluk he, lampu ebe hil-halhogo hilingfoumo re, lampu erokwe inom era'lukwe inom andoma selegerati logogin yaga'no,” iluk yagatikhe.

³ A'nogo yagatikhemo at Harun nen Tuhan nen yagatikhe mene aremnogo higithogo hilingitikhe. Aren he lampu omanogo ibil filik laga logolik, lampu erokwe inom era'lukwe inom hilingik mene andoma ibil filik laga lagaikhe.

⁴ Lampu andi obalik inom liabek ambolkwe inom nen ebene ilirengge hakhogo walsek mene inom he emas pugunhogo sagalek meneba At Tuhan nen ilirengge kumutigik hilingisigin mene iluk Musa wogetikhe mene a'nogo kumuthigik hilingitikhe.

Ap Lewi mene yabu hilingiti logouwageluk heragaisogo menfisasikhe wene

⁵ Tuhan ane Musaba yagati logolik,

⁶ ”It ap Lewi mene re it afuni Israel amu mene andoma inaggele'ma nen heragaisogo fisambik he, it inebe horogo fisano,

⁷ horogo fisagain mene andi ebere yi'nogo hilingfisano. It inebe horinafu mene iluk werek mene andoma inoba re i inebene kweterisilik laluk he, it inebene mondogat inomosi inom inesi mondogat inom hogologo paluageluk yagaisano, nen a'nogo hilingfuluk he inasu mondogat sobaloak. A'nogo hilingisugun oba nek he it inebe horek mene logogun.

⁸ Andi nen he, iren sapi ai mene oak warek mene ekhe waluk he tepung amusuba mulelogo weragongge inom waluk fei wesugun. Nen haren he sapi ai mene afuni inaweak lek hilingisogo fugu mene faget ekhe wanino.

⁹ A'nogo hilingfuluk afuni Israel mene inebe mondogat kabogesuageluk yagaisaluk he, it ap Lewi mene re An Nawi Sabumo nen elokhoma andoma mendek logogun.

¹⁰ A'nogo mendek were'ma re, it An nagainafuri Israel mene inenggi nen he ap Lewi mene andi inuggul sebelfisogoin,

¹¹ a'nogo hilingfisugunem enek he at Harun nen it ap Lewi mene andi, it afuni Israel mene nen An nobaget tegelogo fuluk wo'nesumo nek he, iren An nobaget yabu hilingiti logogun.

¹² Andi hilingfuluk he it ap Lewi mene a'nogo inenggi re sapi ai mene pire aremnogo ungguloba sebelfugunem, misik ekhere it inaweak lek hilingisogo fisugu mene faget, nen misik ekhe re warogo nolnetu mene faget wo'nesugun. A'nogo hilingisugun mene andiba re it ap Lewi mene andi horek logogun.

¹³ Ap Lewi mene andi re An nobaget tegelogo fisano, fisamo re iren Harun inom at againafuri inom inobaget hilingiti logouwageluk yagaisano.

¹⁴ Hiren inunggul sebelinafi logolik andi re, ap Lewi mene andi it Israel mene inanggele'ma nen wendeberogo fisambik he, An nangge mene logouwageluk tegelogo fisano.

¹⁵ Haren it ap Lewi mene andi An wo'netu mene faget wene andi hilingfisamo nek he, it Lewi mene andi inebe An Nawi Sabumo andoma yabu hilingitu mene faget it eiserogo logolik hilingiti logogun.

¹⁶ It andi An nen afuni Israel mene inagainafuri manggusa tago omanogo inobali'mo eak walogo kwelakfisigi hilingi'mo re, it andi re An nobaget enek hilingiti logogun.

¹⁷ An nen it afuni Mesir mene inagainafuri manggusa tago inom, inanggo eak ket tago mene inom mondogat pinggi inoati logolik he, afuni Israel mene inagainafuri manggusa tago inom, wam eak ket ta'lagu mene andi inom he, An nonggwarek mene iluk mondogat telogo fakhasigimo andi.

¹⁸ Yogondak he, it afuni Israel mene inagainafuri manggusa tago mene omanogo obali'mo re ap Lewi mene woginafi andi o,

¹⁹ nen it ap Lewi mene andi re, An nen waganogo Harun againafuri inom wogisamo re, afuni Israel mene inobaget An Nawi sabu elonggoma andoma yabu hilingiti logogun. Nen iren he, afuni Israel mene obalik mondok hore'ma andoma horokhogo asi wagunem inoba enggin-fenggin feinogo iluk he, it inobaget inaweak lek hilingisogo fisan iluk kino yaganeti logogun aro” iluk yagatikhe.

²⁰ A'nogo yagatikhe andi nen he, Tuhan nen Musaba wene melalogo yagatikhe mene higithogo re, it Musa inom Harun inom, afuni Israel mene mondogat inomen he ap Lewi mene a'nogo Tuhan obaget fisasukwa.

²¹ It ap Lewi mene omanogo re inebe horigik, inasu fanorogo sobaligik, hilingitukwama re, Harun nen it inebe tegelogo Tuhan faget tukhogo logouwageluk wogetikhe. Nen arenat he it faget horogo fisasikheat.

²² Afuni Israel mene nen ap Lewi mene inobaget Tuhan nen Musa yagatikhe wene a'nogo higithogo nek hilingitikhe. A'nogo hilingitikhe andiba re it ap Lewi mene omanogo yabu Tuhan Awi wuri'mo hilingitu mene agaukwasik, Harun inom againafuri inomen lenggalinafu kwelek hilingiti lagaukwa.

²³ Tuhan ane Musaba yagati logolik,

²⁴ ”Ap Lewi mene inebe lombok umur dua puluh lima tahun ambolkwe mene nek An Nawi sabu elonggoma andoma yabu hilingiti logogun,

²⁵ nen it inebe umur lima puluh tahun agu mene re yabu weat logouwageluk lologo fisikhi logogun.

²⁶ Andi mondogat hilingfuluk enek he, aren ap Lewi amu mene An Nawi Sabumo elonggoma hilingitu mene andoma leberisikhi logogin, oba nen he at yabu ebe femhogo re hilingiti logogun lek. It ap Lewi mene nen yabu hilingiti logogun he a'nogo,” iluk yagatikhe.