BILANGAN 6 - Allah Wene Fano Wene Hupla Inane

Afuni nen an nebe Tuhan faget fisambik netokhogo logogin iluk inane menfuluk hilingiti logogun mene faget isikhe wene

¹ Tuhan nen Musa mimingiti logolik he,

² ”Wene melalek hilingiti logogun mene yoma afuni Isarel mene yagaisan o. Afuni inebe lombok aben hea, hemi nen hea ane menfikhi logolik, Tuhan faget fisambik netokhogo logogin iluk ane tekhogo ugu halok he,

^3-4 i anggur agai inom, i aik weak mene inom ninggi logogun lek. At andi re anggur enggen amusuba hilingik mene inom, e enggen ekhe amu-amu meneba hilingik mene inom ninggi logogin lek. Athe anggur enggen ket taganek mene inom, iringik mene inom nagain legat, we yi mene ti mene ero anggur oba nen mene halok ogo, enggen elonggoma mene halok ogo ninggi logogin mondok legat.

⁵ At ane menfuluk logogin oba andi re esi paligin lek, nen omboro ogo paligin legat. A'nogo logolik andi re esi inom omboro inom uanhogo wulibuageluk herakfisamo logogin. Aren ane menfagain mene andiba hele homago were'ma nen enek, at ebe Tuhan obaget netokhogo logogin iluk igin mene andi mondogat higit asigin.

^6-7 Esi andiba re at ebe Allah faget enogo fikhe mene iluk eneksek logogin. Aren ane igin mene andi oan asi lagi'lek werek kwelek he at ebe emetfakhagain mondok lek. At ebe afuni ware'ma inera'lu horokhogo lagain legat, nen ap warek andi at onggwarek eisena, agaisa ogo nen oe agot meneba nen ogore horokhogo logogin legat.

⁸ Aren ane menfuluk logogin oba andem he, at ebe Tuhan faget enogo werek mene logogin.

⁹ Nen, ap misik ekhe ane menfuluk amu enekhogo logogin mene a'nogo sebelhigi'lek fetakhogo ap warek mene ekhe era'lu lamo nen ap a'nogo emetlasigin halok he, ap andi nen lingge enggi 7 nen nenangotu wela'luk he aren esi palhik, omboro palhik uluk enek he at ebe horek mene aga logogin.

¹⁰ Inenggi sirek meneba re aren sue muluk hak mene hea, athe yalma hak mene hea, ebe pirerogo waluk he, imam ambit Tuhan Awi solombonma omanogo fei waga logogin.

¹¹ Sue aremnogo mene misik ekhe re ap a'nogo aweak lek hilingisogo fugu mene faget. Nen, ekhe re emetlasigin mene andi lek hilingisogo fouwageluk faget ap imam a'nogo nen warogo nolhi logogin. Inenggi andi sambul a'nogo hilingfuluk enek he, at esi a'nogo hobuk Tuhan faget horek mene logouwageluk fikhi logogin,

¹² nen aren an nebe a'nogo logogin iluk ane igin mene a'nogo inom, nekhengge agap sagalogo ikhi logoginat. Nen enggi attak welaga mene andem he at ebe emetlasigin andi nen he wenasigin lek. Alomat lasigin mene andi faget obali'mo re aren wam domba eak tahun misik oba mene ebe misikhogo waluk he warogo noligin.

¹³ Afuni nen inane menfembik logogun mene a'nogo mondogat agu halok he yi'nogo hilingitunogo. Ap andi re Tuhan Awi solombonma andoma waluk laluk he

¹⁴ wam henagan agap oba agambut palek lek mene halok waluk he Tuhan wogosi laga logogun. Domba eak ai mene misik ekhe satu tahun oba mene andi re, warogo nolhu mene faget, nen domba eak helou mene satu tahun oba mene andi re, inaweak legasuageluk mene faget, nen domba eak ai mene ekhe re warogo lambulogo fisugu mene faget, fikhi logogun.

¹⁵ Aren roti si misik kwalegengge fiterek lek meneba weragongge fagain mene andi re, roti hombonundek mene tepung oba weragaisogo re, zaitun amusu inom munenogo weragongge inom he, kue ekhe sap-sabel mene zaitun amusuba yugulogo weragongge inom, fei waga logogin. A'nogo hilingfuluk he aren ekhe roti werago mene inom, amusu inom endu nolhu mene faget fikhi logogin.

¹⁶ A'nogo foumo re, it imam en andoma mondogat waluk he Tuhan ambit fei waga logogun, andi nen he it inaweak lek hilingisogo fugu mene faget inom, endu nolhu mene faget inom omanogo fuluk nolhi logogun.

¹⁷ Roti si misik kwalegengge andi inom he domba ai mene a'nogo inom, wam lambulogo fisugu mene faget inom omanogo Tuhan wogeti logogun. Andi nen ekhe weragaisogo fogoin mene omanogo inom, i nunggu mene hinagaisogo fogoin mene omanogo inom, omanogo ogore Tuhan obaget fuluk wogosugun.

¹⁸ Ap ane menfembik logogin mene a'nogo re Tuhan Awi Solombonma omanogo nen esi palfuluk he, esi palek omanogo endu wam lambulogo fisugu mene faget iluk nolfogoin oba a'nogo hugisa kwikhi logogun.

¹⁹ A'nogo hilingfuluk, domba a'nogo fena arat wera'lagu halok he enggi fena ekhe imam en sanokhogo waluk roti hombonu mene misik ekhe inom, kue sap-sabel mene misik ekhe inom, si elema a'nogo nen waganogo waluk ap ane menfagain mene a'nogo enggiba fikhi logogun.

²⁰ A'nogo fugunem it imam en he nunggungge andoma re Tuhan obaget enogo wogotu mene iluk ebikhit inukhikhi logogun. A'nogo hilingisugun mene andi re domba ai mene a'nogo elonggo palek oba inom, ago palek inom wene melalek oba it imam inangge mene logogin iluk hilingik mene a'nogo werek kwelek he, enogo wesa fikhit mene andem imam inangge aga logogin. Andi mondogat hilingfuluk enek he ap ane menfagain mene andi anggur agai ninggi logogin fano.

²¹ Andi re it afuni nen an yi'nogo hilingisigin, iluk inane menfuluk hilingiti logogun mene awene melalek he a'nogo, oba nen he afuni inane menesugun mene a'nogo nen ambi, fagain mene omanogo hokhorogo fugu halok he, aren yi'nogo hilingisigin iluk wene tekhogo igin mene andi tiphogo nek hilingiti logogun,” iluk yagatikhe.

It imam en he, afuni Israel mene fanorinabuageluk nayonggo fikhi logogun,” iluk yagatikhe wene

²² Tuhan nen wene ekhe Musa mel yagatikhe:

²³ ”Haren Harun againafuri inom mel yagaisano: Allah nen afuni Israel mene fanorinabuageluk yi'nogo yagaisikhi logoino:

²⁴ Hineisena Tuhan nen fethinarek logolik, fanothinafi logouwago.

²⁵ Tuhan nen hit hinoba endawimo fanot hinobagagik, endawimo sakhorek oba hilinghinobagagik, ikhi logouwago.

²⁶ Tuhan nen endawirogo logolik, hinendawinggen hambugethinafi logouwago, iluk yagaisikhi logoino,” iluk yagaisoageluk yagatikhe.

²⁷ A'nogo yagatikhesik ekhe mel yagatikhe: ”An nen afuni Israel mene fanorinabuageluk nenu hombuk palogo yaganetunem he, An nen fanorinafi logogin aro,” iluk yagatikhe.