BILANGAN 31 - Allah Wene Fano Wene Hupla Inane

Ap Midian mene inom weim yafukwa wene

¹ Tuhan nen Musaba yagati logolik he,

² ”Afuni Midian mene andi nen afuni inunggulenu Israel mene inoba hilingita aple a'nogo faget hiren ogo inunggulmo inoasi lani o. Andi mondogat hilingfuluk enek he hat hebe wa'lasigin.” iluk yagatikhe.

³ A'nogo yagatikhemo re at Musa nen afuni Israel mene inoba yagaisikhi logolik he, ”Weim yabugun enggere fik-foukhogo hilingi'ni o. Tuhan nen wene inoba fikhesik werek enggere hiren afuni Midian mene andi inoasi kugun.

⁴ Hit Israel mene hinunggulenu lombok omanogo nen weim yabugun mene esa misik he inebe 1.000 nen higik, tegelogo fisano.” iluk yagaisasikhe.

⁵ A'nogo yagaisasikhemo re, it afuni Israel mene inunggulenu lombok omanogo nen ap inebe 1.000 nen penhigik tegelogo fisasukwama re, inebe mondogat lambulogo re 12.000 nen ap weim yabugun mene fik-foukhogo welagaukwa.

⁶ Musa nen he it weim yabi loageluk miminginafi logolik he, at Pinehas imam Eleazer amlogo a'nogo inom yabi loageluk yagatikhe. At Pinehas nen he yi mene ti mene mondok horek mene omanogo inom, nen trompet tombouwe ane hangge mene enegengge futhugu mene iluk inom waluk lagaikhe.

⁷ Tuhan nen wene melalogo Musa oba yagatikhe aple higithogo re ap Israel mene nen he it Midian mene inom weim yafi logolik he, ap mene nek inebe mondogat inoarik lagaukwa.

⁸ Andi re it raja Midian mene inebe fuaben mene inenu re Ewi, Rekem, Zur, Hur, Reba inom aremnogo inom inoatukwa. Bileam hun Beor amlogo a'nogo ogo re watukwaat.

⁹ Ap Israel mene nen he hemi o Midian mene inom, inagainafuri inom hele warinapluk waga logolik he, iren takhagarek engge inom, kulharek engge inom, inangge yi mene ti mene inom hugul kwisukwasik helaluk wagaukwa.

¹⁰ It inaiba kota inom iren mene inaiba o sabu wurogo welagaikharekwe omanogo inom mondogat endu nolfisasukwa.

¹¹ Andi mondogat hilingfuluk he, ap Israel mene nen inangge hugulengge wanhukwa mene omanogo inom, inebe hele warek woginafukwa mene omanogo inom, inanggo wanhukwa mene omanogo inom waluk he,

¹² Musa inom imam Eleazar inom, afuni Israel mene inom inambit waluk wagaukwa. Andem oba re it inebe o Moab tonggoma, i Yordan aik oba o kota Yerikho horokhogo andoma logolik hilingitukwa.

Tentara Israel mene inambotkwe wagaukwa wene

¹³ A'nogo hilingitukwama re Musa inom, imam Eleazar inom, nen it afuni Israel mene inogogwi melalinafu mene inom inebe fenakwe re inaiba o sabumo omanogo nen wulipluk he tentara Israel mene wagunem omanogo inelokhoma lagaukwa.

¹⁴ Lagaukwama, at Musa nen he ap tentara inogogwi Perwira inom, ap esa inebe 1.000 faget inogogwi kaindek welagaukwa omanogo inom, nen inebe 100 nen faget inogogwi kaindek welagaukwa omanogo inom, inoba wenagisasikhe.

¹⁵ Aren wenagisikhi logolik he yi'nogo isikhe, ”Nenahalok hiren hemi andoma ineluk logouwageluk herakfisegep?

¹⁶ It hemi andoma nen he at Bileam ane komo wene isikhe mene holfuluk hilingitukwa andi nen o Peor omanogo afuni Israel mene Tuhan herakfisoageluk inendawimo kagalhukwa lek nogo? Andi hilingitukwaba re Tuhan nen afuni Israel mene inoba enggin-fenggin lakfei wagaikhe anggigi!

¹⁷ Enggere, yogondak inagainafuri alage ogo, nen helime silerik mene ogo inom ekhe hilingita mene werek halok he andoma mondogat inoani.

¹⁸ Oba nen he hemi tugum mene ap agap inonggot mene andoma nek he hit faget helani o.

¹⁹ Nen hit hinebe mondogat ap inoatep mene inom, hit ap warek senhegep mene inom he, o sabu endakwe werek kwelek hinenggi hup sabiren hilingisugun. Hinenggi henaganek oba inom hinenggi sabirenggeba inom he hinaweak legasuageluk hit inom, hemi hiren hele warogo woginafep mene oma inom faget hinebene horogo hilingisugun.

²⁰ Inasu ebe lombok inom, yi mene ti mene agap oba hilingik mene inom, kambing esiba hea, e meneba hilingik mene hea, andoma mondogat horogo feino nek.” iluk yagaisasikhe.

²¹ A'nogo isikhemo nen at imam Eleazar en ap it weim yafi lagaukwasik inambotkwe wagaukwa mene omanogo inoba yagaisikhi logolik, ”Wene melalek Tuhan en Musa oba yagatikhe mene re yi.

^22-23 Yi mene ti mene endu nen ninggerek lek mene emas, perak, tembaga inom, posie inom, timah kut mene inom, sing mene inom he endumo nolfembik horogo pugunesugun. Nen andi hilingfuluk he yi mene ti mene andoma emerek mene ekhe logoinogo re nekhengge iba sobalhu mene a'nogoba horogo pugunesugun. Nen amu mene fenakwe endu nen na hak mene andoma re iba sobalhi logolik hilingitarek mene a'nogoba horogo pugunesugun.

²⁴ Inenggi sabit meneba re hit hinasu sobalumo hit hinebe emerek mene a'nogo lek asumo re hit hinawi sabumo kwi logoin fano,” iluk yagaisasikhe.

Hugulengge waluk wagaukwa mene omanogo sumbutukwa wene

²⁵ Tuhan nen Musa yagati logolik,

²⁶ ”Hat inom imam Eleazar inom, it afuni Israel mene inogogwi inom seberogo re yi mene ti mene hugulengge waluk wagaikha mene andoma wenasugun, andi re hemi hele warinapluk wagaikha mene inom wam waluk wagaikha mene inomat wena'no.

²⁷ Hugulengge wanha mene andoma re hiren tulem heirogo pire minggilogo fembik he, fena re it prajurit sikhe fisogo inap weim yabi lagaikha mene andi faget feino, nen fenakwe andoma re it afuni hokhorogo andoma faget feino.

²⁸ An Tuhan nobaget fembik enogo wo'nesugun mene re, it sikhe fisogo mene prajurit andoma asugun fikhit mene andoma it inangge 500 halok he misikdek higik haren wanino. Nen ap hele warinarek wagaikha mene andoma ogo, nen wam sapi, keledai, domba, kambing andoma ogo a'nogo nek hilingi'no.

²⁹ Andoma re An Tuhan nobaget enogo fugu mene iluk imam Eleazar oba wogo'no.

³⁰ Nen fena it afuni Israel mene wogisagain mene andi nen he, it inangge andoma 50 nen agaikha mene re haren misiktek higik wanino, andire ap hele warek wesugun mene andoma nen ogo, nen wam sapi, keledai, domba, kambing halok ogo a'nogo nek hilingi'no. Andoma re it ap Lewi inap An Nawi sabumo halhu mene omanogo inoba wogisano.” iluk yagatikhe.

³¹ A'nogo yagatikhemo Musa inom imam Eleazar inomen he Tuhan nen melalinafikhe aple aremnogo higithogo nek hilingitukwa.

^32-35 It ap sikhe fisogo mene omanogo nen hugul kwikhi logolik it inonggwarek faget helikhi logolik sele'ma andogosi wagaukwa meneet mondogat seberogo wenagaisogo re domba, kambing inom he: 675.000 nen, sapi re 72.000 nen, keledai re 61.000 nen inom, helime silerik mene ap inagap inonggot mene re 32.000 nen woginafukwa.

^36-40 Wanhukwa mene andoma fena heirogo minggilogo re, it ap sikhe fisogo inap omanogo wogisasukwa mene ebe lombok wenagaisogo re yi: domba, kambing inom he 337.500 nen, ebe seberogo wenagaisogo re andem. Nen, 675 nen andire Tuhan faget enogo fuluk wogetu mene: nen sapi re 36.000 nen, sapi andoma mene 72 nen andi re Tuhan obaget enogo fuluk wogetu mene, nen keledai re 30.500 nen, keledai andoma mene re wenagaisogo 61 nen he Tuhan obaget enogo fuluk wogetu mene, nen helime ap agap inonggot mene omanogo re 16.000 nen, helime andem mene inebe 32 nen andire Tuhan obaget enogo fuluk wogetu mene tegelhigik fesukwa.

⁴¹ A'nogo hilingitukwasik he enogo fuluk wogetu mene iluk fesukwa mene omanogo re at Musa nen waganogo imam Eleazar oba, Tuhan obaget mene iluk, wene melalek Tuhan en yagaisasikhe higithogo wogetikhe.

^42-46 It afuni Israel mene faget ogo re, it sikhe fisogo mene inobaget hilingitukwa aremnogo higithogo wogisasukwa: domba, kambing inom he 337.500 nen, sapi re 36.000 nen, keledai re 30.500 nen, helime silerik ap inagap inonggot mene re 16.000 nen fesukwa.

⁴⁷ Tuhan nen wene melalogo Musa yagatikhe higithogo re it ap andoma nen ogo, nen wam omanogo 50 nen werek halok he misik higik waganogo it ap Lewi mene Tuhan Awi Sabumo yabu hilingitarek mene omanogo inoba wogisasukwa.

⁴⁸ A'nogo hilingitukwama, it ap sikhe fisogo mene inogogwi kaindek weim oba woginarek lagaukwa mene omanogo Musa were'ma wagaukwasik,

⁴⁹ yagati logolik he, ”Neisena, nit he ninagoromi sikhe fisogo mene nina'ma werek mene mondogat wenaginafo. Mene re it inebe mondogat andogorogo weregenego, ekhe longgo igi'lek.

⁵⁰ Halok he niren inalilingge emas mene inom, inenggibene inasenggan inom, ineisok habik ebene inom, helebenggen inenggi segelet oba kwelabek mene inom, inesanggomangge inom, siong ap inebe lombogen wanha mene inom, waluk wago. Mondogat andoma re, Tuhan nen nit ninebe fetninarek logouwageluk At wogosuogeluk waluk wago.” iluk yagatukwa.

⁵¹ A'nogo isukwama re Musa inom imam Eleazar inomen he emas omanogo wanhukwa. Andoma mondogat he inalilingge wanhu mene iluk fesukwa.

⁵² It ap perwira andoma nen Tuhan obaget fesukwa mene enggin he dua ratus kilogram en hangge.

⁵³ Oba nen he it prajurit andoma inebe lombogen hugul kwikhi logolik helasukwa mene omanogo re inonggwarek faget helasukwa.

⁵⁴ A'nogo hilingitukwama re, Musa inom imam Eleazar inomen emas omanogo waluk he, Tuhan nen it inunggulenu Israel mene awe a'ma fetninarek logouwageluk Tuhan Awi Sabu sale'ma omanogo waluk lagaukwa.