BILANGAN 30 - Allah Wene Fano Wene Hupla Inane

Wene melalek ap inane menfuluk hilingiti logogun mene faget isikhe wene

¹ At Musa nen he wene yi it afuni Israel inap inunggulenu lombok inogogwi melalinafarek mene omanogo inoba yagaisasikhe.

² Ap misik ekhe nen, An Allah faget enogo fakhambik logogin anggikhi logolik halok ogo, athe wene ane Tuhan oba hombuk palogo igin halok ogo, at a'nogo wene wasigin mene a'nogoba hele homago logogin, halok he at andi nen he wene wasigin mene aremnogo higithogo nek hilingiti logogin, nen ane ekhe taganet fikhi logogin mondok lek.

^3-4 Nen hele tugum ekhe eisena inom logoligen, an nebe Allah faget e nekho fisambik logogin iluk wene warogo ane menfembik, wene wasigin mene a'nogoba homago logogin, nen at eisena nen ogo hele andi ane igin mene a'nogo holfembik endawimo enggin anggikhe lek halok he, at hele tugum mene andi nen he a'nogo hilingisigin iluk igin mene inom, nen wene wasigin mene inom andem higithogo nek hilingiti logogin.

⁵ Oba nen he, hele andi nen igin mene a'nogo holhambik eisena nen endawimo enggin anggugu halok he, hele andi re aren hilingisigin iluk igin mene inom, nen wene wasigin mene a'nogo inom oba homago logogin lek. At eisena nen hilingisigin lek igin andiba re Tuhan en aweak lek hilingisogo fagain.

^6-7 Hele ekhe agun heligi'legengge logoligen ane igin mene a'nogoba inom, wene wasigin meneba inom homago logoligen, at endawimo nen ebesimbigen a, athe we a'nogo hilingisigin anggambigen he a, igin halok he, at andi re ane igin mene inom wene wasigin mene a'nogo inom oba homago logogin. Nen hobugen hele a'nogo agun helagain halok ogo, at ane hilingisigin iluk igin mene a'nogo inom nen wene wasigin mene a'nogo inom oba homagoat logogin, we at agun nen esanggo holimbik enggin anggagain lek andiba nek he elok hilingisigin.

⁸ Oba nen he, agun nen ambi wene andi faget esanggo holigin sambul ane hilingisigin iluk igin mene andi hilingisigin lek iluk kwe palhu halok he, at andi re ane igin mene inom, wene wasigin mene inom oba homago logogin lek. We Tuhan nen he at aweak lek hilingisogo fagain.

⁹ He ekhe sogwe mene nen hea, athe agun nen nabit iluk herakfisikhe mene nen hea, an a'nogo hilingisigin iluk ane sikhiphogo imbigen a, athe wene warogo an andiba homago logogin iluk imbigen he a, aren ane igin mene inom wene wasigin mene a'nogo inom oba homago logolik tiphogo nek hilingiti logogin.

¹⁰ He ekhe ap helambigen ane hilingisigin iluk igik, wene watik, imbigen ane igin mene a'nogoba homago logogin halok he,

¹¹ aren wene wasigin mene a'nogo tiphogo hilingisigin oba nen he, andi re at agun nen esanggo holhambik enggin anggagain lek halok hilingisigin.

¹² Oba nen he wene andi holhaluk, agun nen elele wanhu halok he, he andi nen hilingisigin iluk igin mene inom, wene wasigin mene andi inom oba homago logogin lek. At agun nen elele wanigin andiba re Tuhan nen aweak lek hilingisogo fagain.

¹³ Ap ekhe agwe nen, an yi'nogo hilingisigin iluk igik, wene watik, igin oba nen he, at agun nen hilingisigin lek ugu halok he, hilingisu lek hak.

¹⁴ Oba nen he wene andi esanggo holilugen, agun nen engginsek lek iluk anggugu halok he, he andi nen ane hilingisigin iluk igin mene inom, nen wene wasigin aple inom mondogat omanogo tiphogo nek hilingiti logogin. At agun nen he agwe andi nen hilingisigin iluk ikhe mene inom wene wate mene inom andi re, engginsek lek anggagu halok fano hilingisigin anggikhi logogin.

¹⁵ Nen hobugen agun nen agwe wene wasigin mene inom, hilingisigin iluk igin mene inom a'nogo leget fisugu halok he, aren leget fisagain mene a'nogo ambisangma re at hun andiat saburagain.

¹⁶ Andi re wene melalek helime tugum mene eisena aiba logolik hilingisigin iluk ane igik, wene watik igin halok ogo, athe he ekhe agun helikhe mene nen a'nogo hilingisigin halok ogo, hilingiti logogun mene Tuhan en Musa yagatikhe mene re andi.