BILANGAN 3 - Allah Wene Fano Wene Hupla Inane

Harun againafuri aremnogo

¹ Yire At Tuhan nen Tom Sinaiba nen Musaba ane yagatikhe huli andem oba at Harun inom Musa inom inagainafuri ineisok erokwe hilingik welagaukwa menere yi'nogo.

² Harun againafuri ap inebe 4 en welagaukwa mene inenu re yi: inoe manggusa mene enu re Nadab, nen ombo'ne re Abihu inom, Eleazar inom, Itamar inom welagaukwa.

³ It inebe re imam mene logolik hilingiti logouwageluk amusu inungguloba warogo menfisasukwa.

⁴ A'nogo menfisasukwaba nen Nadab inom, Abihu inom he o Sinai leimo nen iren Tuhan obaget hilingiti logolik omanogo endu fano mene nolhukwa le'ma wa'lagaukwa. It inebe pirenet he inagainafuri tago lek welagaukwa. Ma re, at Harun eluk welagaikhe andem oba re it Itamar inom Eleazar inom he inebe imam logolik hilingiti lagaukwa.

Ap Lewi inap he ineabu imam mene logolik hilingitarek higithogo leberisikhi logouwageluk yagaisasikhe wene

⁵ Tuhan nen Musaba ikhi logolik he,

⁶ ”It inunggulenu Lewi mene andi re helokhoma wesuageluk yagaisambik he, iren Harun obaget eabu hilingiti logouwageluk yagaisan o.

⁷ It he yabu o An Nawi Sabu wuri'mo andoma hilingiti logolik he iren it imam inobaget inom, afuni Israel mene inebe mondogat faget inom, An Nawi Sabu wuri'mo andoma hilingiti logogun.

⁸ It ineabu re An Nawi Sabumo andoma hilingitu mene weregengge re andoma halhik, nen it afuni Israel mene inobaget An Nawi Sabumo andoma hilingitik, ikhi logogun.

⁹ It inungggulenu Israel meneba nen we inunggulenu Lewi mene nek he at Harun inom aren tagongge mene inom ineabu hilingiti logouwageluk An nen wenagaisogo fisigi andi.

¹⁰ Meneba nen Harun inom, at againafuri inom he iren yabu imam mene hilingiti logouwageluk haren menfisano: It andi nek hilingiti logogun oba nen, it fenakwe ekhe nen yabu andi mene hilingisugun iluk hilingitu halok he ebe pinggi wa'no.” iluk yagatikhe.

¹¹ Tuhan nen ane Musaba yagati logolik,

^12-13 ”Yogondak he, it ap Lewi mene andi An nonggwarek nangge mene logouwageluk enegeisogo fisigi o. An nen it afuni Mesir mene inagainafuri manggusa mene pinggi inoatukwa huli aremnogo it afuni Israel mene inagainafuri manggusa mene inom, nen it inanggo ket ta'lagu mene inom he, nonggwarek faget penegeisogo fakhasigi. It afuni Israel mene inagainafuri manggusa tago mene andoma inobali'more, it Lewi mene andi An nonggwarek mene asigin o. An Tuhan nen igi,” iluk yagatikhe.

It inunggulenu Lewi mene inenu lisu palogo wenatukwa wene

¹⁴ O Sinai leimo andoma nen Tuhan nen Musaba re

¹⁵ ap Lewi mene inebe werek higithogo inagainafuri hundomok inenu lisu paluageluk yagatikhe: It inagainafuri inebe umur tugi misik ambolkwe hilingik mene halok he mondogat inenu lisu paluageluk yagatikhe.

¹⁶ A'nogo yagatikhemo at Musa nen he Tuhan nen yagatikhe mene a'nogo higithogo hilingitikhe.

^17-20 Lewi againafuri re ap inebe henagan welagaukwa, inenu re: Gerson inom, Kehat inom, Merari inom. It andem he afuni it inunggulenu mene inombawi. At Gerson he, againafuri abengge inebe pire welagaukwa mene inenu re, Libni inom, Simei inom. At Kehat he, againafuri ap inebe 4 en engge welagaukwa mene inenu re, Amram inom, Yizhar inom, Hebron inom, Uziel inom. Nen, at Merari re againafuri ap inebe pire mene welagaukwa, inenu re, Mahli inom, Musi inom. It ap andi mene re akhogo ineisok erokwe lombok inunggulenu lombok salhigik welagaukwa mene andoma inombawi.

²¹ It inunggulenu Gerson mene re at Libni eisok erokwe mene inom he at Simei eisok erokwe mene inom.

²² It Gerson inunggulenu meneba nen inagainafuri inebe umur tugi misik ambolkwe hilingik mene nek wenagaisogo lisu palhukwa mene lambulogo re, 7.500 nen.

^23-24 At Elyasaf hun Lael amlogo andi nen he it inunggulenu andi mene faget inoe kain welagaikhe. It afuni Israel mene O Sabu wuthigik werek oba omanogo nen he it inunggulenu andi mene re Tuhan Awi Sabumo nen ambol fikhit, o mo ubuk ikherek fikhit andoma welagaukwa.

²⁵ Nen Tuhan Awi Sabu salek mene a'nogo halhi logogun mene faget he, it inunggulenu andi mene nen he O Sabu ebe inom, amboloba salek mene inom, kain solombonma werek mene inom,

²⁶ su wurilik mene O Sabu Senggelek Hore'ma a'nogo huli'lipsek mene inom, su porogo pelabe'ma a'nogo inom, warogo nolhuba mezbah a'nogo inom faget halhu mene welagaukwa. Iren he no andoma faget yabu hilingiti logouwageluk eiserogo welagaukwa andi.

²⁷ It inunggulenu Kehat mene re at Amram inom, Yizhar inom, Hebron inom, Uziel inom, ineisok erokwe mene welagaukwa.

²⁸ It inagainafuri inebe umur tugi misik ambolkwe mene nek wenagaisogo lisu palogo welagaikhe mene seberogore, 8.600 nen. It inebe re O Tuhan Awi sabumo andoma yi mene ti mene halhu mene welagaukwa.

^29-30 At Elisafan hun Uziel amlogo nen he it inunggulenu andi mene faget inoe kain welagaikhe. It inawi sabu re, o Tuhan Awi Sabu wurik abel malikwe selatan fikhit andoma welagaukwa.

³¹ Logolik he, iren e Peti Wene Warek elonggoma kwalegengge a'nogo inom, meja inom, lampu oak inom, mezbah-mezbah inom, O Senggelek Mondok Hore'ma a'nogo nen it imam en hilingitaregengge omanogo inom, kain o ambe Senggelek Mondok Hore'ma hulirogo kologo pelabek mene a'nogo inom, eisewerek logolik halhi lagaukwa. Halhi logolik, yi mene ti mene andomaba nen hilingitu mene faget eiserogo welagaukwa.

³² It ap Lewi mene inoe kain Eleazar hun Harun amlogo a'nogo welagaikhe. Aren he it ap o Senggelek Mondok Hore'ma a'nogo hilingitu mene faget kagalinarek welagaikhe.

³³ It inunggulenu Merari mene re at Mahli eisok erokwe mene inom he, Musi eisok erokwe mene inom welagaukwa.

³⁴ Inunggulenu Merari meneba nen inagainafuri inebe umur tugi misik ambol kwe hilingik mene wenagaisogo lisu palek welagaikhe mene inebe seberogo re, 6.200 en welagaukwa.

³⁵ At Zuriel hun Abihail amlogo re it inunggulenu andi mene inoe kain welagaikhe. O Sabu wurogo werek oba omanogo nen it andi mene re Tuhan Awi sabu wurik oba o abel polikwe utara fikhit andoma welagaukwa.

³⁶ It andi nen he o sabu oak inom, puluk inom, oak menetu mene inom, o hulu talhu mene inom, yingge-tingge miningik mene omanogo inom, yabu no andomaba nen hilingitu aple mene omanogo inom eiserogo logolik halhi lagaukwa.

³⁷ Andi nen o esin inom, a'ma talek mene inom, pebuk inom, abel takwe fikhit mene faget hele inom andoma ogo it eiserogo halhi lagaukwa.

³⁸ It Musa inom, Harun inom, at Harun amlogomi inom inebe re O Tuhan Awi Sabu a'nogo elokhoma mo ero fikhit andoma welagaukwa. Iren he o Senggelek Mondok Hore'ma a'nogo it afuni Israel mene faget ekhe mene-ekhe mene hilingisi kugu mene iluk eiserogo welagaukwa. Oba nen he, it werek kwelek afuni ekhe amu mene nen yabu andi mene hilingisugun iluk walhugunem inebe pinggi inoati lagaukwa.

³⁹ It inunggulenu Lewi mene nen inamlogomi ap mene inebe umur tugi misik warogo ambol fikhit mene, At Tuhan nen wene melalinafikhe higithogo lisu it inunggulenu lombok palek welagaikhe mene andoma inebe lambulogo re, 22.000 nen hilingik welagaukwa.

It ap Lewi mene re it Israel mene inamlogomi manggusa mene inobali'mo agaukwa wene

^40-41 Tuhan nen Musa ba ikhi logolik he, ”It Israel mene inagainafuri ap manggusa tago mondogat eisewerek he An mene. Enggere it inebe umur tugi misik ambol fikhit hilingik mene andoma inebe wenagaisogo inenu palino. Oba nen he it inobali'mo re it ap Lewi mene andi eise re An nonggwarek mene iluk igi andi. An Tuhan nen igi! It Lewi mene inanggo andoma ogore it inunggulenu Israel mene nen inanggo mene nen eak ket tatu mene andoma obali'mo faget iluk igi andi.” iluk yagatikhe.

⁴² A'nogo yagatikhemo, at Musa nen he Tuhan nen isikhe mane a'nogo higithogo nek hilingitikhe, aren he it omalik ap mene

⁴³ inebe umur tugi misik ambol fikhit hilingik mene omanogo inenu lisu palhikhe. Palhikhemo it inebe lambukhogo re 22.273 nen hilinglagaukwa.

⁴⁴ A'nogo hilinglagaukwama Tuhan nen Musaba yagati logolik he,

⁴⁵ ”It Israel mene inagainafuri manggusa tago andoma inobali'more it Lewi inap andi An nobaget enegeisogo fisan o. Nen, it Lewi mene inanggo andoma ogore it Israel mene inanggo obali'mo feino.

⁴⁶ It Lewi inap inebe endep hak werek kwelek it Israel mene inagainafuri ap manggusa mene re inebe 273 nen hilingik, enggere inebe hokhorogo hilinglagaikha mene andem faget he inonggo palugun.

⁴⁷ Omalik inebe lombok faget he onggo uang perak mene 5 nen oba, An Nawi Sabu wuri'mo palek werek higithogo nek onggo palugun.

⁴⁸ Nen uang andi ebere at Harun inom againafuri inom inoba wogisano.” iluk yagatikhe.

⁴⁹ A'nogo yagatikhemo at Musa nen he Tuhan nen wene melalek yagatikhe mene higithogo nek hilingitikhe.

⁵⁰ Aren he uang perak mene 1.365 nen a'nogo wanhikhesik he

⁵¹ at Harun inom againafuri inom wogisasikhe.