BILANGAN 25 - Allah Wene Fano Wene Hupla Inane

Inunggulenu Israel mene Tom Peor oba nen hilingitukwa wene

¹ Inunggulenu Israel mene a'nogo o Sitim Tonggoma esanggo fikhit andoma werek kwelek, it ap Israel mene nen hemi o Moab mene inom pailak hilingitukwa.

² Hemi omanogo nen he it ap omanogo hondoginarek inanggembu obaget inangge yi mene ti mene warogo nolfuluk fogeratarek oba omanogo louwogen iluk miminginafi lagaukwa. Nen ap Israel mene ogo re kembu omanogo fogerati logolik he, warogo nolhungge omanogo ogo ninggi logolik kembu it ap Moab mene nen omanogo fogerati lagaukwa.

³ Ap Israel mene kembu Baal a'nogo o Peor andoma nen fogerati lagaukwama, Tuhan a'mage hokho mene lagasikhesik Musa oba ikhi logolik he,

⁴ ”An nen afuni inunggulenu andi mene inoba na'mage ekhe inom fagain lek enggere, afuni andi inobaget inogogwi kaindek werek mene andoma fakfisambik he, An nawene melalek higithogo it inebe felelenghogo afuni mondogat inelokhoma nen inebe pinggi inoa'no.” iluk isikhe.

⁵ Andi isikhemo re, Musa nen it ap Israel mene inawene pilingisogo lebegetu inap omanogo inoba yagaisikhi logolik he, ”Hit hinamu-hinamu nen he hit hinunggulenu mene hinanggele'ma andoma nen ap kembu Baal o Peor en fogerari'lagwi mene andoma mondogat inebe pinggi inoa'no o.” iluk yagaisasikhe.

⁶ A'nogo yagaisasikhemo Musa inom afuni mondogat omanogo inom o Tuhan Awi sabu sale'ma solombonma omanogo nen le aga logolik were'ma nen he, ap Israel mene misik ekhe nen he, he Midian mene ekhe waluk awi sabu sale'ma a'nogo kugunem ineilenggen welagaukwa

⁷ At Pinehas hun Eleazar amlogo imam Harun omba a'nogo nen hilingitikhe aple a'nogo faget eilenggen hasikhesik, it afuni kaboksek welagaukwa mene omanogo inanggele'ma nen siakhogo menla'luk lagaikhe. Lagaikhesik arige kabelek misik ekhe waluk wagaikhesik he,

⁸ ap inom he inom aremnogo muginarek he o sabumo a'nogo kwi lagaikhe. Kwikhi logolik ap inom he inom aremnogo inebe pirenerat sige kabelek a'nogoba talogo inoatikhemo re, it Israel mene inanggele'ma enggin inoba asigiluk enek-enek aple aga lagaikhe mene a'nogo palagaikhe.

⁹ Palagaikheba nen he, andi hilingitu kwelek afuni wa'lagaukwa mene re inebe 24.000 nen wa'lagaukwa.

¹⁰ A'nogo hilinglagaikhemo Tuhan ane Musaba ikhi logolik,

¹¹ ”At Pinehas hun Eleazar amlogo imam Harun omba andi nen ninghogo it Israel mene inanggele'ma andoma nen An nalong welagi mene a'nogo ili wo'nafe andiba, An na'mage sebel figirik it inunggulenu andi ekhe leget fisagain lek.

¹² Enggere at Pinehas andiba yaga'no, An at ninom wene ket mene ekhe wasugun enggere.

¹³ At ninom nen aren ambisangma mene inom he, ineabu imam mene mondok-mondok logouwageluk An nen menfisigi. Aren he, an eisena Allah a'nogo nobaget ninghogo nili wo'nafesik he, afuni Israel mene inaweak faget An ninom lambulogo ninobagaikhe andi nen o” iluk yagatikhe.

¹⁴ Ap Israel agun he Midian mene inom inoatikhe mene andi enu re Zimrihun Salu amlogo, it inunggulenu Simeon meneba nen ineisok erokwe mene misik ekhe faget inoe kain menfesukwama welagaikhe agun.

¹⁵ He andi re enu Kozbi hun Zur a'logo, it ekhe inunggulenu Akhogo Misian meneba nen inoe kain menfesukwama welagaikhe mene.

¹⁶ Tuhan nen wene melalek yi Musa yagatikhe,

^17-18 ”Ap Midian mene nen hat helokhoma o Poer en lalogo weak hilingita andi faget inom, ekhe re he Kozbi andi re inoe kain Midian mene a'logo andi nen weak hilingitemo enggin-fenggin hinoba agama wata mene andi faget inom, it Midian mene andi hinom weim yafi logolik mabenet fisano,” iluk yagatikhe.