BILANGAN 22 - Allah Wene Fano Wene Hupla Inane

Ap kain Moab mene nen Bileam woletikhe wene

¹ It afuni Israel mene a'nogo kwi wagaukwasigen, o kota Yerikho horokhogo i Yordan palogo wulifarek oba andoma kweang tonggwe lei afuni inunggulenu Moab mene welagaikharek oba andoma inawi su mene wusi lagaukwa.

^2-3 A'nogo wusi wagaukwasik were'ma, afuni ekhe nen he, ”Afuni Israel mene inebe mondok hokhorogo waga logolik, afuni Amori mene weak hilingfisaluk wagaikha o,” iluk isukwama, at ap kain afuni Moab mene inoe raja, enu Balak ap Sipor amlogo andi esanggo holhikhesik he, at ebe inom, afuni at agoromi mondogat inom, ina'manggen hokho mene lagaikhe.

⁴ Ina'manggen a'nogo lagaikhesik, it afuni Moab mene nen he, afuni Midian mene inogogwi kaindek inoba mel yagaisasukwa: ”Inenggi welagi'lek, afuni inobabut wam sapi nen engga o leimo mondok feleng-feleng nilik lagarek andi hak, nit ninaiba yoma yi mene ti mene legaberik wesugun o,” iluk yagaisasukwa. A'nogo yagaisasukwama, at raja Balak en he,

⁵ agoromi ekhe inayonggo fesikhesik he, ap Beor amlogo enu Bileam ebe o Amau i Efrat horokhogo kota enu Beor andoma were'ma ayonggo loageluk lakfisasikhe. Lakfisikhi logolik, wene Bileam yagasi loagaluk mel yagaisasikhe: ”Afuni inunggulenu ekhe hunogoat mene o Mesir en wulibi wagaikhasik o yi awi ti awi mondok nikhi logolik, nit mu'nisouwogeluk mondok werek andi nen he, helurogo iluk yagaheti o.

⁶ It andi nit ninomame hangge lek. We, it inomame mondok hokho mene o. Haren afuni fanorinafunem he, fano agaikharek. Nen, homan fisugunem he, weak agaikharek andi nen, hat hebe wesimbik he, an faget it homan fisanogeluk hayonggo figi o. Homan a'nogo fisegen halok, niren it elok mabenet fisambik, o yoma nen mugusogo wulakfisogoin anggikhi lagi o. Ma re, weak-weak we'nogen iluk hayonggo figi o, iluk yaga'no,” iluk lakfisasikhe.

⁷ A'nogo lakfisasikhemo, it afuni Moab mene inom, Midian mene inom, inogogwi omanogo ap Bileam onggo wogotunem afuni Israel mene homan fisagain mene faget onggo waluk lagaukwa. Arat lagaukwasik he, kain Balak en Bileam yagasi loageluk wene warogo lakfisasikhe mene a'nogo yagasi lagaukwa.

⁸ Yagatukwama, at Bileam en it mel yagaisasikhe: ”Hit hinebe ninom yoma nogo uogo. Ohealek halok, an neisena Tuhan nen yaganesigin mene andi hit yagahisagain o,” iluk yagaisasikhemo, it afuni Moab mene inogogwi omanogo Bileam were'ma andoma kamo isukwa.

⁹ A'nogo werek kwelek, at Allah nen Bileam oba wagaikhesik mel yagatikhe: ”Bileam, hat were'ma afuni andoma o koma mene hinom welagep,” iluk heinok wokhasikhe.

^10-11 Heinok a'nogo wokhasikhemo, at Bileam en he, ”It andi re, Sipor amlogo ap kain Balak, afuni Moab mene inoe raja andi nen, afuni inunggulenu hunogoat mene o Mesir en wulibi wagaikhasik, o yi awi ti awi irenek hilinglarik laga logolik, o yogondak yoma wagaikhasik weregen he, aren it andi mabenet fisambik mugusogo wulakfisageluk he, an nen it homan fisoageluk wagaikhasik werego,” iluk yagatikhe.

¹² A'nogo yagatikhemo, At Allah nen Bileam mel yagatikhe: ”It andi An nen fanorinafimo andi nen he, hat hebe it ap ari hinom lambik, afuni it inunggulenu andi mene homan fisagun o,” iluk yagatikhe.

¹³ A'nogo yagatikhemo, ohealekwe at Bileam en he, ap kain Balak en lakfisasikhe mene omanogo mel yagaisasikhe: ”Tuhan nen an yaganeti logolik he, fano, hinom lani, iluk yaganeti'lek. Halok, hirenek lani o,” iluk yagaisasikhe.

¹⁴ A'nogo yagaisasikhemo, it omanogo inambotkwe kain Balak oba wagaukwasik, mel yagatukwa: ”Bileam nit ninom wesu abiren kamo ikhemo wago o,” iluk yagasi wagaukwa.

¹⁵ A'nogo yagasi wagaukwama, at Balak en he, attak inayonggo fesikhesik lakfisasikhe andi inenu endep elo'lek hangge mene re, hobuk enek he, inebe hokhorogo kaindek inenuwerek mene nek inayonggo fesikhesik lakfisasikheat.

¹⁶ A'nogo lakfisasikhemo lagaukwasik, wene Balak en he, mel isikhemo Bileam yagasi lagaukwa: ”Hat hebe kamo igin mondok lego. We'nogen iluk yagaheti o.

¹⁷ Haren it an faget homan fisugunem he, an nen onggo mondok hokhorogo wokhetik, haren we nena mene kino igin mene andi hilinghobagagik igin o,” iluk isikhemo yagasi lagaukwa.

¹⁸ A'nogo yagatukwa meneat he, at Bileam en he, ”At raja Balak aiba perak inom, emas inom, mondogat welagarek mene andoma onggo an wo'nesugun mene ogo re, an neisena Tuhan Allah an nen fogeratirek mene andi ane yaganete mene sagalogo ekhe igin mondok lego. Wene endebat hangge ogo re, at ane sagalogo igin legaro.

¹⁹ A'nogo meneat he, an neisena Tuhan nen wene ekhe yaganesigin logoi nogore, it attak yonggo wagaikhasik nogo aga hagat yoma nogo ubagaigo,” iluk yagaisasikhe.

²⁰ A'nogo yagaisasikhemo werek kwelek, o hubanggo andi sambul at Allah Bileam oba wagaikhesik he, mel yagatikhe: ”Afuni andi, hat it inom louwogeluk wagaikhasik werek andi re, hinom lobagaigen he, yi mene ti mene tegelogo fein o. A'nogo hinom logoin meneat he, wene An nen, Yi'nogo hilingi'no, iluk yagahesigin mene andiat hologo hilingi'no o,” iluk komotfesikhe.

²¹ A'nogo komotfesikhemo, ohealekwe, wam keledai amboroba hu'lasimbik lagain mene hele kelogo fesikhesik he, afuni o Moab mene inogogwi omanogo inom wagaukwa.

Ap Bileam wam keledai emberegen hilingitukwa wene

²² At Bileam Allah nen a'nogo yagatikhemo wagaikhe meneat he, Allah a'mage hokhorogo lagasikhe. A'mage a'nogo lagasikhemo, at Bileam wam keledai amboroba lagasikhesik, at amingmingengge inebe pire inom wagunem, Tuhan nen yonggo lakfisikherek mene malaikat ekhe Bileam anggwe palogo ebekhalem menlagaikhe.

²³ A'nogo mendek were'ma, wam keledai a'nogo nen malaikat a'nogo karok enggimo fisogo were'ma eilenggen yethasikhesik he, kwe kwanirogo yabukwe solu isikhe. A'nogo solu isikhemo, at Bileam en he, wam keledai a'nogo yei warogo waluk ebekhalem wulibi wagaikhe.

²⁴ Wagaikhesik wesigiluk wagunem, Tuhan nen yonggo lakfisa wagarek mene malaikat a'nogo yabu anggur yabumo leget helep mene fena-fena wuri'mo mondok kelokse'ma andoma menlagaikhe.

²⁵ A'nogo mendek were'ma, at keledai a'nogo eilenggen nineisena Tuhan agot malaikat a'nogo hasikhesik he, leget esanggokwe lagain ha'ma re, Bileam eisok leget inom hagambisik watikhemo re, aren keledai a'nogo yei watikheat.

²⁶ Hobuk At Tuhan nen yonggo lakfisikherek mene malaikat a'nogo inelokhe pali lagaikhesik, kwe mondok kilik-kelokse'ma kwanirogo poikwe-maikwe lare, mondok elo'lekse'ma, andoma menlagaikhe.

²⁷ A'nogo mendek were'ma, at wam keledai a'nogo eilenggen malaikat Tuhan a'nogo hasikhesik he, ebe kweangma sagaum isikhemo, at Bileam a'mage lagasikhesik wam keledai a'nogo yei sige tomuk oba watikhe.

²⁸ A'nogo watikhemo, hobugen, At Tuhan nen wam keledai a'nogo wene ane higit uagaluk hilingfesikhemo, at Bileam mel yagatikhe: ”Noe. An nen hat hoba ninggi'nogo hilinghafi lagimo, yei henggi henagan oba noaten,” iluk yagatikhe.

²⁹ A'nogo yagatikhemo, at Bileam en he, ”An mondok lalnafi lagen andi nen hoati lagi o. An karok waluk we'le'ma nen he hat hebe pinggi hoa'le o,” iluk yagatikhe.

³⁰ A'nogo yagatikhemo, wam keledai a'nogo nen he, ”An yi re, noe hat hanggo keledai o endamen engge namboroba hurek nikhi lagen a'nogo lek nogo? An nen noe hat hane holhi'lek hilingiti lagi nogo?” iluk yagatikhemo, at Bileam en he, ”Lego,” iluk yagatikhe.

³¹ A'nogo yagatikhemo, hobugen he, Bileam eilenggen mum welagaikhe a'nogo selek asuageluk Tuhan nen hilingfesikhemo, malaikat Tuhan karok fanghogo mendek welagaikhe mene a'nogo yethasikhesik, weak-weak kweangma pi wagaikhesik eindep awi yagaisogo fogeratikhe.

³² A'nogo hilingitikhemo, malaikat Tuhan a'nogo nen he, ”Haren hanggo keledai ari yei henggi henagan oba waten andi nenahalok,” iluk heinok wokhasikhesik, mel yagatikhe: ”An nen he, hat lagain lek iluk anggigirigen, hat hanggwe palhi o.

³³ Hat hanggo keledai ari An eilenggen niikhesigen enggi henagan oba kwe kwanirogo waga laga o. A'nogo we'lep le'ma, an nen hat hanggo ari nek herakfikhi logolik hat hebe hoa'le o,” iluk yagatikhe.

³⁴ A'nogo yagatikhemo, at Bileam en he, ”Noe. Haren an nanggwe paligiluk palhu kwelek meneat he, an nonggothogo re weagat hilingiti o, noe. Yogondak haren lagain legat anggegen halok, an sugulogo naiba nambotkwe lagain o,” iluk yagatikhe.

³⁵ A'nogo yagatikhe meneat he, malaikat Tuhan a'nogo nen he, ”Ap andi hinom lani o. A'nogo hinom logoin meneat he, wene An nen, In o, iluk yagaheti halogen ino o,” iluk yagatikhe. A'nogo yagatikhemo, at Bileam a'nogo it ap Balak en lakfisasikhe mene omanogo inom wagaukwa.

Ap Balak a'nogo Bileam elokhoma lagaikhe wene

³⁶ A'nogo wagaukwama, it afuni ekhe nen he, ”Bileam a'nogo weri'lago,” iluk isukwama, at Balak Bileam elokhoma o afuni Moab mene inawi tonggwe huli-hulimo, i Arnon pi wagunem esanggoma re, o kota enu Moab andi oba lagaikhe.

³⁷ Lagaikhesik, emberek ambi agaukwasik, Balak en Bileam mel yagatikhe: ”An nen attak wolhafi andibaat wagi'lek kamo egen andi nenahalok? Hat hendawimo nen he, Balak en onggo wo'nesugun elo'lek anggegendigen hilingiten a?” iluk yagatikhe.

³⁸ A'nogo yagatikhemo, at Bileam en he, ”Yogondak an arat wagi o. Meneat he, wene an nendawimo nen kagalogo ekhe igin mondok lego. We, Allah nen, In o, iluk yaganesigin mene nek igin o,” iluk yagatikhe.

³⁹ A'nogo yagatikhesik, at Bileam Balak emberek o kota Huzot wagaukwa.

⁴⁰ Wagaukwasik, at Balak en inobaget wam sapi ekhe inom, domba ekhe inom, fenakwe ap Bileam a'nogo inom, afuni inogogwi at Bileam inom wagaukwa mene omanogo inom, wogisasikhe.

Ap Bileam en wene hobuk hilinglasigin mene tak isikhe wene

⁴¹ A'nogo wogisasikhemo ohealekwe re, at Balak en Bileam waluk he tom enu Bamot Baal andiba lagasikhemo, tom andiba nen at Bileam afuni Israel mene inebe eilenggen elok yerisasikhe.