BILANGAN 20 - Allah Wene Fano Wene Hupla Inane

O Kades andoma nen wene ekhe hilinglaga lagaikhe wene

¹ Afuni Israel mene nen tugi inenggi wenati logolik attak wenati lagaukwa mene a'nogoba, inebe mondogat o leimo afuni le'ma enu Sin leimo andoma wagaukwasik, o Kades andoma welagaukwa. Andoma were'ma hele Miriam ebe wa'lagaikhemo andoma salhukwa.

² Inenggi ekhe sambul he, it inawi su mene wuri'mo andoma i mondok lek welagaikhe. A'nogo weregen, afuni Israel mene omanogo Musa Harun emberek inoba andogosi wagaukwa.

³ Andogosi wagaukwasik he mel isukwa, ”Yigini'mo yoma lagou ninabire,” iluk wenagisikhi logolik he, mel yagaisasukwa: ”Nineisena Tuhan eilhanemat nit ninerugwi ninagaila'lak wa'lagaukwa mene omanogo ninomat wa'lasiloma re fanoba nen agwi!

⁴ Hiren nit o leimo afuni le'ma yoma wo'ninarek wagep yoma nenahalok? Nit ninebe inom, ninanggo inom, yoma wa'lasuagaluk wo'ninarek wageba?

⁵ Nit o Mesir en wo'ninarek wulibi wagepsik o yoma yi mene ti mene awi yasu mondok le'ma wea'ma yoma ninggi'nogo hilingisuageluk wo'ninarek wagep? O yoma re, gandum inom, e ara inom, anggur inom, delima inom, ero mondok legat, nen i nunggu mene ogore, mondok le'maat wo'ninarek wagep yoma ri!” iluk wenagisasukwa.

⁶ A'nogo wenagisasukwama, Musa Harun emberek it omanogo fisaluk inale'ma hekhogo o Tuhan awi wuri'mo era'lu andoma menlasi lagaukwasik, ineindep awi yagaisogo Tuhan yagatukwama, At Aselek a'nogo tilelek-walelek lakfei wagaikhe.

⁷ A'nogo lakfei wagaikhesik Musa mel yagatikhe:

^8-9 ”Sige tomuk, An nen Peti Wene Warogo wokhinafigi mene kwalek were'ma elokhoma werek a'nogo wanimbik he, Harun hemberegen afuni Israel mene mondogat andogorinabino o. Arat andogorogo fisegep halok, it mondogat ineilhanem, helep isa werek andi elema nen i elesi wulibi wesuageluk yaga'no o. A'nogo yagasimbik, haren helep isa andi elema nen i elesi wulakfei wagunem afuni mondogat inagainafuri inom, inanggo inom, inagai elok nogoin o,” iluk yagatikhe. A'nogo yagatikhemo, at Musa eisena Tuhan nen yagatikhe hagat sige tomuk a'nogo wani lagaikhe.

¹⁰ A'nogo wani lagaikhesik, Harun emberegen afuni mondogat helep isa a'nogo era'lu andogorogo fisasukwasik, at Musa nen he, mel yagaisasikhe: ”Hit afuni wene oak sagalhi lagep mene yi, holini o! Niren i hit faget helep isa hokho mene yi elema nen wulibisogo wulakfei wesuageluk ikhi lageba?” iluk yagaisasikhe.

¹¹ A'nogo yagaisasikhesik, at Musa nen sige tomuk a'nogo wanhikhesik helep isa a'nogo enggi pireba fothasikhe. A'nogo fothugunem he, helep a'nogo elema nen i houwakhogo mondok aninirogo wulibi wagaikhemo re, afuni mondogat inom, inanggo inom, elok nasukwa.

¹² A'nogo meneat he, Tuhan en Musa inom Harun inom inenggali warogo wenagisikhi logolik, mel yagaisasikhe: ”An nomame hokho mene afuni Israel mene inelokhoma inukhisikhi lagi mene a'nogo hit hinendawinggenma nen eberogoat iluk futnobagagi'lek, An nebe horek welagi mene a'nogo agaugwet nafi'lek hinendawimo nen anggaluk hilingitep andi nen he, An o it wogisageluk wene warisasigiba andoma hit hemberegen woginarek logoin mondok lego,” iluk yagaisasikhe.

¹³ O andoma it afuni Israel mene nen, ”Yigini'mo yoma logou ninabire,” iluk Tuhan yagatukwama At onggwarek omameba a'nogo hilinginafikhe andi nen, i elesi andi enu Meriba salhukwa.

Afuni inunggulenu Edom mene inoe enupogoren, ”Afuni Israel mene kwe yiba logoin lek,” iluk yagaisasikhe wene

¹⁴ At Musa nen agoromi ekhe inayonggo fuluk o Kades andoma nen it afuni inunggulenu Edom mene inoe raja oba lakfisasikhemo lagaukwasik mel yagatukwa: ”Noe, nit ninebe re, hat hagaila'lak Israel mene ninom hundik welago a'nogo mene o. Hat he, nit ninoba enggin-fenggin hokhorogo aga laga andi helu o, noe.

¹⁵ Nit ninambu ninombalak o Mesir andoma lagaukwasik tahun hokhorogoat welagaukwa. A'nogo were'ma, afuni Mesir mene nen ninambu ninombalak andi mondok weagerinafi lagaukwasik nit a'nogoat weaget ninaabi'lagwi.

¹⁶ A'nogo hilingninafunem niren nineisena Tuhan en telninabuageluk ninane hokhorogo yagati lagagu. A'nogo yagatunem ninane esanggo holhikhesik he, agot malaikat mene ekhe ayonggo fesikhesik ninoba lakfei wagaikhemo re, aren o Mesir en wo'ninarek wulibi wagaikhemo waga lagagusik yogondak o kota Kades o ninoe hat were'ma huli-hulimo yoma welago o.

¹⁷ Nit wago yi re, ebekwe ninoe hawilokwe yoma nen louwogen iluk kino yagahesi wago o, noe. Nit ninebe inom, ninanggo inom, kwe ebekwe hokho yiba waga logolik, kwe kwanirogo ekhe lagi'lek, yabu kwe inom, anggur awi yagokwe inom kugun mondok lego. Nit he, hat hagai mogo habulikwe ekhe ninggi'lek, kwe pikhithogo nek laga logombik o hat ninoe were'ma yoma herakfuluk wulibi louwogen iluk yagahesi wago o, noe,” iluk yagatukwa.

¹⁸ A'nogo yagatukwa meneat he, it ap Edom mene nen mel yagaisasukwa: ”Niren he, hit o nit welago kwe yoma nen lobagaigen iluk yagahisogoin lego. Hiren ninghogo kwe yi wesugun halok, niren hinoasuogeluk ugun o,” iluk yagaisasukwa.

¹⁹ A'nogo yagaisasukwama, it afuni Israel mene nen he, ”Nit he, kwe ebekwe hokho kwe yiba pikhithogo wesuogeluk ogo o. Waga logolik, ninebe inom, ninanggo inom, hit hinagai ekhe nunggu halok he, onggo wokhisogoin o, noe,” iluk yagaisasukwa.

²⁰ A'nogo yagaisasukwa meneat he, it afuni Edom mene nen he mel yagaisasukwa: ”Hit kwe yiba wesugun mondok lego,” iluk yagaisasukwasik he, afuni Israel mene inoasuogeluk ap tentara inomame hokho mene inom wulibi wagaukwa.

²¹ Afuni Edom mene nen, ”Kwe nit ninawi fikhit yiba logoin mondok lego,” iluk isukwa andi nen, afuni Israel mene omanogo inambotkwe sugulogo re, kwe amu kwe nen wesuogeluk isukwa.

Ap Harun ebe wa'lagaikhe wene

²² It afuni Israel mene omanogo inebe mondogat o Kades herakfuluk he, tom Hot oba lagaukwa.

²³ Tom Hot andi re, o Edom huli-hulimo. O andoma nen Musa inom Harun inom inoba Tuhan nen mel yagaisasikhe:

²⁴ ”Hat Harun he, An nen afuni Israel mene o wogisageluk wene warisasigiba andoma kwigin lego. Hit hemberegen i Meriba elesi wulibi wagaikheba andoma nen An nane sagalogo hilingitep a'nogo nen, hat wa'lasigin o.

²⁵ Hat Musa nen he, Harun amlogo Eleazar emberek woginarek tom Hot oba lagain o.

²⁶ Andoma lagambik, Harun asu nonggologo re, Eleazar labetfeino. A'nogo labetfoumo at Harun andoma wa'lasigin,” iluk yagatikhe.

²⁷ A'nogo yagatikhemo at Musa Tuhan nen yagatikhe mene higithogoat hilingitikhe. Musa inom, Harun inom, Eleazar inom, afuni Israel mene mondogat ineilenggen werek kwelegat tom Hot oba lagasukwa.

²⁸ Arat lagasukwasik he, Musa nen Harun asu nonggologo re, Eleazar labetfesikhe. Tom andi punu ebeba Harun ebe wa'lagaikhemo fuluk he, Musa Eleazar emberek inambotkwe pi wagaukwa.

²⁹ A'nogo wa'lagaikhemo fuluk pi wagaukwasik, afuni Israel mene mondogat yagaisasukwama inesanggo holhukwasik he, Harun warek faget fong watu inenggi 30 nen welagaukwa.