BILANGAN 17 - Allah Wene Fano Wene Hupla Inane

Harun arige tomuk a'nogoba hilingitikhe wene

¹ Tuhan ane Musa yagati logolik he,

² ”Afuni Israel mene nen inarige tomuk ebe lombok 12 nen unggulenu misik mene nen he arige tomuk misik tekhigik, it inunggulenu hilingik higithogo melalinafu mene andoma inenu lombok he hat wokhesuageluk yagaisan o. It inogogwi melalinafu mene andoma inenu lombok he sige tomuk andoma bene palfeino,

³ it inunggulenu Lewi mene inandomuk oba re Harun enu palfesukwa. It inunggulenu lombok andoma melalinafu mene faget he inarige tomuk misiktek higik logogin.

⁴ A'nogo hilingfuluk he tomuk andoma waluk An Nawi Sabumo Peti Wene Warek mene were'ma elokhoma An ninom hat inom hundik ambi aga lagoba aremnogo fei we'no.

⁵ Ap An nen wenagaisogo figi mene andi arige tomuk enek he asimit wulibigin. Andi hilingisigin oba nek he it afuni nen hundik-handik hat hoba inane mul-mul yagaheri'lagwi mene andoma lek palfogoin o.” iluk isikhe.

⁶ Wene a'nogo isikhe mene andi re Musa nen afuni Israel mene inoba yagaisasikhe. Yagaisasikhemo re, it inunggulenu lombok inogogwi melalinafi lagaukwa mene omanogo nen he tomuk misiktek higik it inunggulenu higithogoat wogetukwa. Tomuk ebe 12 nen welagaikhe nen at Harun andomuk ogo iren mene andoma anggele'ma omanogo welagaikheat.

⁷ A'nogo were'ma re, at Musa nen tomuk omanogo waganogo Tuhan Awi sabumo Peti Wene Warek mene a'nogo were'ma era'lu fei kwisikhe.

⁸ Ohealek hubet weirogo Musa Tuhan Awi sabu wuri'mo a'nogo kugunemen he, tomuk Harun nen mene it inunggulenu Lewi mene a'nogo asimit wilibik welagaikhe. Wilibi'mo re tomuk a'nogo owil mumungsek logolik owil igisogo enggen he e ketapang enggen mondok wurik agaikhengge ugu welagaikhe.

⁹ Musa nen he tomuk mondogat omanogo wanhikhesik he afuni Israel mene ineilhanem inugusi lagaikhe. Lagaikhemo hilinglagaikhe mene a'nogo ineil hasukwasik he it inogogwi melalinafu mene omanogo nen inarige tomuk lombok helilik lagaukwa.

¹⁰ A'nogo hilingitukwasik hobuk Tuhan ane Musa oba ikhi logolik, ”Harun arige tomuk andi re nekhengge Peti Wene Warek were'ma era'lu fei kwin. Fei kumo tomuk andi andoma were'ma afuni inane mul-mul enek ikhi logolik wene sagali'lagwi mene andi, iren hilingiri'lagwi mene andi palfugu lek halok he, wa'laga logogun iluk inendawinggen wenggelengge logogin o.” iluk yagatikhe.

¹¹ Yagatikhemo re Musa Tuhan nen yagatikhe mene aremnogo higithogo hilingitikhe.

¹² A'nogo hilingitikhemo, it afuni Israel mene nen Musaba yagati logolik he yi'nogo isukwa, ”Andi halok he, nit ninebe re weaget ninabigin enggere ninamel-melhogo logogun higi!

¹³ Ap Tuhan Awi sabu horokhogo lagunem inebe wa'laga logogun, andi halok he, nit faget nineluk logogun mene ekhe werek lego” isukwa.