BILANGAN 16 - Allah Wene Fano Wene Hupla Inane

Korah inom Datan inom Abiram inomen wene melalek sagalogo hilingitukwa wene

^1-2 Korah hun Yizhar amlogo Kehat mene, unggulenu Lewi mene a'nogo nen Musa eilhanem wene palhikhe. Aren ugunem anelonggon legetukwa mene re it ap inebe henagan mene inunggulenu Ruben inap, hun Eliap amlogomi inenu re Datan inom Abiram inom he, hun Pelet amlogo On inom, it afuni melalinafi lagaukwa mene inebe 250 nen afuni holhu mene nen wenagaisogo fisasukwa mene inomen lebethasukwa.

³ It inebe mondogat lambulogo Musa, Harun emberek were'ma inambit lagaukwasik iren yagaisikhi logolik, ”Musa! Yogondak arat egen, it afuni Israel mene mondogat he Tuhan obaget tegelogo fakhagasik werek. Nen Tuhan ebere nit ninanggele'ma werek. Oba nen he haren anggikhi logolik he afuni oma inanggele'ma nen, an enek he lego welagi iluk anggikhi lagen a?” iluk yagatukwa.

⁴ A'nogo yagatukwama holhikhesik, at Musa kweangma elokhe sogoum-sagaum etikhesik he Tuhan oba samban isikhe.

⁵ A'nogo hilingitikhesik aren Korah inom it agoromi ombo'ne lagaukwa mene omanogo inom inoba ikhi logolik he, ”Ohealek hubet he At Tuhan nen ap At angge mene re sa he, Aren sa enogo fakhikhe iluk nit ninoba inuknisugunem ninelu asigin. Ap Aren enogo fakhikhe mene re at ebe horokhogo waga logouwageluk yagate.

^6-7 Ohealek hubet he, hat inom hagaila'lak hombo'ne logoin mene hinom he, endu nolhungge obalik hunduk palogo inom, amben fano mene dupa inom, alogengge meneba hunduk palimbik mezbah were'ma andoma waluk wesugun. Waluk wesumo re, nit ninanggele'ma andoma nen ap sa Tuhan nen enogo fikhe iluk kwelakhogoin o. Hit ap Lewi hinap elo'lek hilingiti lagep mene yi! Wene re andiaro.” iluk isikhe.

⁸ A'nogo isikhesik ekhe inom Musa nen Korah yagati logolik he, ”Ap Lewi mene yi, hinesanggo holini o!

⁹ Hit afuni Israel mene hinanggele'ma nen At horokhogo logolik At Awi Sabumo omanogo yabu hilingitik nen afuni Israel mene leberisigik ikhi logobagaigeluk, At Allah Israel mene hineisena a'nogo nen wenagaisogo hinobagaikhe andi re endep hak anggikhi lageba?

¹⁰ Hat Korah inom ap Lewi mene mondogat inom Tuhan nen legeisogo hinobagaikhe andi. Nen, yogondak he hiren nit imam mene asugun iluk kinoti lagebat andi!

¹¹ Hat inom agaila'lak mukharek wagaikha mene oma hinomen Harun eilhanem hinane mul-mul ikhi lagep mene andi ibi-eberogo nen he, Tuhan ane oak sagalhi lagep andi!” iluk yagaisasikhe.

¹² A'nogo iluk Musa nen Datan inom Abiram inom wesuageluk wolinafikheba nen, iren ikhi logolik he, ”Nit he, at oba wagu aple ninabiro!

¹³ Haren o Mesir kweang mondok fano heisele'ma andoma nen wo'ninarek o leimo yoma ninoasigiluk wulibi wagagin mene andi re higitsek legen a? Nit harenat melalninafu mondok logogin nogo?

¹⁴ Ibi-eberogo re haren wo'ninarek kweang fano heisele'ma wagagin lek, athe nineabu amik fanoma anggur yagoma nit ninangge mene asuageluk wo'ninarek wagagin lek! Yogondak haren nit lalninabigiluk ikhi lagen ari! Nit he wesugun lego.”

¹⁵ A'nogo isukwama re, at Musa a'mage hokho mene lagasikhesik Tuhan oba ane ikhi logolik he, ”Tuhan iren warogo wokhesi weri'lagwi mene andoma re wanu fugo. An nen afuni it mene nen misik iluk ogo ekhe it inanggele'ma nen weaget fisigi mene ekhe werek lek, nen keledai it mene ogo misik ekhe wanhi legat,” isikhe.

^16-17 Andi isikhesik Musa nen ane Korah yagati logolik, ”Hobit hubet he Tuhan Awi Sabu wuri'mo andoma hagaila'lak inebe 250 nen omanogo hinom we'no. Nen, at Harun ogo andoma logoinaro. Hiren he hinagandou hunduk hinebe lombok waluk wesimbik he, amben engge dupa omanogo elonggoma fembik, Tuhan wogosugun o,” iluk isikhe.

¹⁸ A'nogo isikhemo re, iren inagandu hunduk omanogo inebe lombok helasukwasik iren endu enggen inom, amben engge dupa inom wanhukwasik he, Tuhan Awi Sabu solombonma andoma Musa inom Harun inom were'ma mendek welagaukwa.

¹⁹ Andi nen he, at Korah nen agaila'lak andogerinafikhesik Tuhan Awi Sabu Solombonma omanogo Musa Harun inom inelokhe kwelabek logolik mendek welagaukwa. A'nogo mendek were'ma nen he ferekhogo aremnogoat it afuni ineilenggen werek kwelegat Tuhan aselek a'nogo ombakbaget hasikhe.

²⁰ Ariginhi logolik, Tuhan ane Musa inom Harun inom yagaisikhi logolik he,

²¹ ”Ap were'ma oma nen hinebe higila'ni. O yogondak yaat An nen inebe leget fisageluk welagi,” isikhe.

²² A'nogo isikheba nen, Musa Harun emberek inelokhe kweangma sagaumeti logolik mel isukwa, ”Allah nineisena, Haren enek ineluk welagaikharek mene andoma eluk logouwageluk wogisikhi lagen. Ap misigen weak hilingituba re Haren afuni mondogat inoba ha'mage fisa hak nogo?” isukwa.

²³ A'nogo isukwama, Tuhan ane Musaba ikhi logolik,

²⁴ ”Afuni andoma it Korah inom Datan inom Abiram inom inawi sabu sale'ma andoma nen herakfisaluk higilogo loageluk yagaisan o” iluk yagatikhe.

²⁵ A'nogo isikhemo Musa nen afuni Israel mene melalinafu mene omanogo hondogoisogo woginarek he, Datan inom Abiram inom were'ma lagaikhe.

²⁶ Lagaikhesik he, Musa nen afuni Israel mene inoba yagaisikhi logolik, ”Ap ina'mage mondok weak inap ari inawi sabumo nen herak fisaluk lani! It inangge we endebengge halok ogo ekhe senha fuk. Hit wene yi higithogo hilingisugun lek halok he, it inaweak oba hinom ambine wa'lasugun,” iluk yagaisasikhe.

²⁷ A'nogo isikhemo re, it afuni Israel mene a'nogo it Korah, Datan, Abiram inom inawi sabu sale'ma omanogo herakfuluk higilagaukwa. Datan inom Abiram inom he wulifukwasik inawi sabukwe lombok solombonma inagainafuri inom mendek welagaukwa.

²⁸ Andi nen Musa ane ikhi logolik, ”Yiba re Tuhan nen yi wene ti wene andoma hilingisuageluk an laknobagai waga andi nen he, an namu nendawimo nen anggaluk wagi lek mene andi re hirogo hinelu asigin o.

²⁹ It afuni andoma we inetokhogo wa'lagaikharek hak, Allah nen ogo we unggum inoba yi'nogo ti'nogo ekhe inabok legengge wa'lasugun halok he, an nobaget he Tuhan nen ayonggo fikhesik lakfei waga le'ma higi, iluk fut nobabagun o.

³⁰ Oba nen he, Tuhan nen hit o endamen engge ekhe holhigip lek mene, nen kweang healhaluk it inebe inom inangge inomat inelugengge kweang elema afuni wa'la'luk lagaikharek oba pugunem isambik halok he, andi it afuni yi nen Tuhan ane sagalhama iluk hinelu asugun,” iluk yagaisasikhe.

³¹ Musa nen wene a'nogo isikhesik ane kikobok aremnogo re, kweang it ineisok sebelek welagaukwa kwe a'nogo harelik lagaikhe,

³² ”Ariginhikhesik he, it inebe inom, it ineisok erokwe mene inom, at Korah ombo'ne murok lagaukwa mene omanogo mondogat inom inangge yi mene ti mene mondogat inom kweang pakhogo pelaginafikhe.

³³ Andiba re it inebe inelugengge inom, inangge mondogat inom kweangma afuni wa'la'luk lagaikhare'ma andoma pelaginafikhe andi.

³⁴ It afuni Israel mene andoma welagaukwa mene omanogo nen holhugunemen he, ”Heise lani! Nit ninebe kweang en pilnisageluk ili'lago!” ugunem inesanggo holhukwasik it omanogo heise longgo isukwa.

³⁵ A'nogo hilingitukwasik it ap inebe 250 nen a'nogo amben engge dupa nolhi lagaukwa mene omanogo Tuhan nen endu lakfei wagaikhemo endu nen nasikhe.

Endu obalik tembaga mene faget isikhe wene

³⁶ A'nogo hilingfuluk Tuhan nen Musaba yagati logolik,

^37-38 ”Eleazar hun imam Harun amlogo a'nogo nen endu hunduk tembaga mene inom endu nen nasikhesik fesikhe mene andoma inom nen endu helangesin inom, wul inom he, obalik andem mondok hore'ma hilingi'mo re ale'ma kweisali loak. Yi mene ti mene andoma re it afuni inaweak onggo wene inoba fikhemo wa'lagaikha mene andoma nen fikhi lagaikha mene hilingi'mo re. Yi mene ti mene andoma re, iren Tuhan obaget elokhoma nen wogotama re mondok fano horek mene, andi nen he endu hunduk tembaga mene omanogo sagalogo sap-sabelhogo hilinglagunem he mezbah agap endakwe to'mosugun. Ariginugun mene andi re, it afuni Israel mene inendawimo eberek mene faget hilingik logogin,” iluk yaga'no, iluk yagatikhe.

³⁹ A'nogo yagatikhemo re at imam Eleazar en he endu hunduk tembaga mene omanogo wanhikhesik aben sagalogo sap-sabelhogo hilingfuluk mezbah agap endakwe fikhit to'mosuageluk yagaisasikhe.

⁴⁰ Andi re ap Israel mene nen inendawinggen eberek logolik we it Harun ambisangma mene nek he Tuhan obaget amben engge dupa nolhi logogun oba nen ap amu mene re ekhe noli waga logogun lek iluk eberek logouwageluk hilingitukwa andi. Afuni wene melalek andi sagalogo hilingiti logogun halok he, it Korah inom agoromi at ombo'ne laga lagaukwa mene inom legetfisasikhe andi hak hilingfisagain. Andi mondogat he Tuhan nen wene melalogo Musa bene nen Eleazar yagatikhe mene higithogo nek hilingitikhe andi.

Harun nen it inunggulenu Israel mene inagap telogo fisasikhe wene

⁴¹ Andi hilinglagaikhemo ohealekwe re it afuni Israel mene mondogaren Musa inom Harun inom inoba wenagisasukwa. Iren ikhi logolik he, ”Hiren Tuhan againafuri pinggi inoatebo,” iluk wenagisasukwa.

⁴² It a'nogo kabogetukwasik Musa inom Harun inom inoba wenagisikhi logolik, it inelokhe hebelogo Tuhan Awi Sabu wurik fikhit omanogo yethugunemen he ohena o a'nogo salhunemen he ombak-bak Tuhan werek aple a'nogo weinam agunem hasukwa.

⁴³ Hasukwasik he, Musa inom Harun inom Tuhan Awi Sabu a'nogo kwe fikhit lagaukwa.

⁴⁴ Lagaukwama nen he Tuhan ane Musaba yagati logolik,

⁴⁵ ”An nen it ari inebe werek oba aremen legabet fisageluk welaginggere, afuni ari werek oba aremen higilogo lano!” iluk yagatikhe. A'nogo yagatikhemo re, it pire aremnogo kweangma ineindep awi yagaisogo sagaum etukwasik,

⁴⁶ Musa nen Harun yagati logolik, ”Hat weak-weak endu hunduk tembaga mene a'nogo wanimbik mezbah oba nen endu enggen waganogo kwalfembik he dupa amboloba fein. Fembik he, it afuni andi inaweak leget fisoageluk inobaget hilingisin. Tuhan a'mage hokho mene lagagik, nen ou oba tak eroratik ikhenggere weak-weakhogo hilingisin,” iluk yagatikhe.

⁴⁷ A'nogo isikhemo re, Musa nen yagatikhe mene aremnogo Harun nen higithogo nek hilingitikhe. At ebe weak-weak afuni kabokse'ma, it inebene ou inoba asigiluk erorasigin horokse'ma aremnogoat lagaikhe. Andiba re at Harun nen dupa a'nogo endu enggen amboloba aremnogo fesikhesik, afuni inaweak sagalogo legetfisoageluk hilingitikhe.

⁴⁸ Ou oba figik a'nogo palhikhemo re, at Harun ebe it afuni wa'lagaukwa mene inom, it ineluk werek mene inom hilingi'luk tulem aremnogo welagaikhe.

⁴⁹ Andi sambul afuni wa'lagaukwa mene wenagaisogo re 14.700 nen wa'lagaukwa, andem he it hun Korah agoromi inom wene sagalogo fesukwama wa'lagaukwa mene aremnogo inom he lek.

⁵⁰ Ou oba figik mene a'nogo palagaikhemo nek he at Harun a'nogo nekhengge Musa ambit Tuhan Awi Sabu sale'ma omanogo were'ma lagaikhe.