AYUB 8 - Allah Wene Fano Wene Hupla Inane

Bildad en isikhe wene

^1-2 A'nogo isikhemo at Bildad en ikhi logolik he, ”Hat hane a'nogo nek ugu mondok henggi miren logogin nogo? Hat hambeba wene wulafi lagen mene andoma re sogoi ane hokho ikherek mene hak, ikhi lagen.

³ At Allah Omame Mondok Hokho mene andi re wene higithogo hilingitarek wene andi inom eberogo hilingitarek wene andi inom he kwanirogo hilingite mene ekhe weregen a?

⁴ Hat hagainafuri nen At elokhoma weak hilingitama halok he, At Allah nen unggum inoba fou higit obaat fikhe o.

⁵ Oba nen he hat hebe At a'ma logolik, hendawi hundik hilingnabin iluk kinotik, nen naweak honggorabethogo nobagain iluk yagatik,

⁶ haren weak mene ekhe hilingiti legengge, hendawimo mondok pikhithogo nek ebetik, hilingiti logolik welagen halok enek he, At Allah nen weak-weak lebethabigin werek. Nen a'nogo hilingisigin mene andi onggore hat heisok erokwe mene nekhengge fanorinabin werego.

⁷ Hat hangge yi mene ti mene mondogat lek agangge andoma re, hobuk helagain oba nen he inom higitsek lek we maben hak hilingik.

⁸ It ap hebelek inap o attak andoma welagaukwa mene omanogo fut fisano. Nen, it inambu-inomba lagen hilingiti lagaukwa mene inom, hikhi lagaukwa mene inom omanogo ebethikhi logoino.

⁹ Nit nineluk welago mene arem he mondok horokse'ma re, yi'nogo ti'nogo iluk inom mondok ninonggot. Nit nineluk welago mene andi re inafumagengge palogo lagarek a'nogo hakhogo welago.

¹⁰ It ap hebelek inap o attak andoma welagaukwa inaben, inane ikhi logolik yagaheri'lagwi mene yi hesanggo holin.

¹¹ ”No kem andi re i amusungge werekwe nek wuliferek, kilime re kweang i sogopsekwe nek wuliferek.

¹² I a'nogo firitok ugu halok he, yago mene omanogo halongo ikherek, a'nogo hilingiterek andi re yi mene ti mene amu mene omanogo oan werek kwelek he kem andi nek he weak-weak sawet agarek. No ebe palogo waluk andiba ekhe hilingisu mene oan kwelek he ebe oan aganuk ket lagagu kwelek a'nogo hilingitarek.

¹³ It afuni Tuhan inonggot engge werek mene andi re a'nogoat werek, aren Allah ba endawi eberek legengge hilingitu halok he, aren hilingisigin mene iluk endawimo wenggelogo hilingiterek mene a'nogo ogo sugwi asi lagarek.

¹⁴ Yo omosi lekhogo eil sakho meneba endawi tebet fikherek, kimalin agalesanggeba wurogo endawinggen yamuk ikherek.

¹⁵ Agalesangge andiba tibet fuluk hilingisumo re elok omame werega? Nen, yo andiba inenggi senengge iluk senogo logoumo nen he omamerogo logou hak nogo a? Elo'lego.

¹⁶ Enggangge mondok heiselek welagarek andi hak, it afuni Tuhan inonggot mene ogo inebe mondok fanorogo nek werek. Mo hundik oba yatunem he ebe heiselogo wulifi logolik he yabu wagane'ma omanogo sagarogo wuliferek.

¹⁷ Omanggen he kweangma helep werek mene omanogo ebene walabit waterek, watfuluk he mondok omamerogo pelabik lagunem he tukhumhogo lare elo'lek.

¹⁸ Oba nen he enggangge andi yogondak walhogo sanokhano, sanok hugunemen he at ebe andem wulibik welaga lek mene hak hilingi'mo hogoin.

¹⁹ It ap weak enek hilingitu mene nen inagaiyek hagarek mene re we andem higithogo nek hilingitarek, ap amu mene we'luk he at a'nogo obali'mo asi wagarek.

²⁰ Oba nen At Allah nen he afuni At oba himbirik logolik hilingitarek mene re oboget isikherek lek, nen afuni kwanirogo nek hilingitarek mene re Aren mene ekhe leberinafe aple werek lek.

²¹ Aren he hat hambeba nen endo asuageluk hilinghobagagik, hagaiyek habuageluk hilinghobagagik ikherek.

²² It afuni hat inambit hafarek mene re inenggali a'luk nit sebelek mene hak anggogoin, nen it afuni weak hilingitarek mene inaiba andoma re mondok meisalisamo legasigin,” iluk isikhe.