AYUB 7 - Allah Wene Fano Wene Hupla Inane

¹ Nit afuni andi re afuni inomameba hilingi'ni, iluk yagaisugunem hilingitarek hakhogo wiik-weakhogo welago. Nit nineluk welagorek mene andi re ap ekhe onggo helagain iluk yabu nek hilingitu mondok welagarek higit welago.

² It afuni inamingmingengge mene nen nalong palnarek logoilep anggikhi logolik werek higit, nen it ap yabu hilingitu mene nen onggo wo'nesuageluk nenangot hikhi logolik welagarek higit.

³ Tugi ekhe wagarek ekhe wagarek andi re ebe yi'nogo faget neluk welagi iluk anggigi'lek nobakhe palegat welagi. Hup ekhe sambul-ekhe sambul andomaba re nendawimo mondok heiselhu kwelek welagi.

⁴ Nogogin iluk nogoi lagunem ogore, hup mondok alabi weak, O weak-weak wei inik agwi iluk nenangotu logolik he nogo furogo mel ikhi lagi lek.

⁵ Nebene re soborenggen mondok hokhorogo tago logolik noumo alimbo nek hilingik welagi, Nagap oba re noumo hokhorogo were'ma kurele sokhigik wilibi'lago.

⁶ An nebe neluk welagi mene yi yi'nogo asigin iluk mel eberek legengge logolik weak-weakhogo nek ambisangma asi lili'lago. It afuni nen su selebeneti logolik, su selebenetungge kwaniterek mene andi re aninurek hanggeba nen he we weak-weakhogo nek lili'lago.

⁷ Neisena Allah, an neluk welagi mene yi re haren heleage furogo kwelabek mene welagi a'nogo ebethan. An nagaiyek welaga mene a'nogo re ekhe werek lek mondogat he longgo ikhe andi.

⁸ Yogondak Haren an nebe niikhi lagen oba nen we welagi'legat hobuk ekhe neagain lek. Hobugen Haren an hera'nabigin oba nen he nebe le'ma neagain logou hak.

^9-10 Ohena nen elokhe mumetha wagaresigen palogo lek agarek andi higit, afuni andi ogore mondogat wa'lagunem he nekhengge sugulogo inaiba wesu lek hak. It afuni at enggawerogo logogun mene omanogo nen ogore at oba ekhe ebethogoin mondok lek.

¹¹ Andiba re, an nane legengge logou lek hak! Nendawimo heiseli'lago mene inom, ale palerogo hikhi lagi mene inom arem faget he sebelha mondok elo'lek agunem he, an nane wulagaisogo nendawimo anggikhi lagi mene andem wulakfisa waga lagi andem.

¹² An nebe re kisu naga inailo mene i laut elema welagarek mene a'nogo hak hilingik welagi nen hea? Haren hundik-handik heil wo'nafu mondok logolik kagalnarek mondok welagen oma ri!

¹³ An nebe weing la'luk noba enggin-fenggin werek mene andi endep waganogo loageluk set warikhi lagi. Nendawimo mondok ou-pou ikhe mene ari faget ninggi'nogo se a'lep agwi iluk herati lagi.

¹⁴ Oba nen Haren he an nabiba nailoap kwela'nafik, Nen nabi weak mene inom, menenei sugwi mene inom, noba fei wagik, ikhi lagen.

¹⁵ Andiba re an noba ou-pou hugu mondok welagirek mene andi herakfuluk he, nalonggop perelogo wa'la'le iluk anggikhi lagi.

¹⁶ An he neluk logolik enggin-fenggin hugu werek aple andi re mondok nabit hikhi lagi hilingi'mo re, nebe mondok wa'la'le iluk anggikhi lagi andi nen he nebe neluk welagirek mene ari re we elalin hak hilingi'mo re, oboget nean o.

¹⁷ Nenahalok Haren afuni re esin mondok anggikhi lagen? Nen, nenahalok iren hilingiri'lagwi mene andoma Haren heil woginafu mondok welagen?

¹⁸ Ninggi'nogo hilingigen Haren o hubet hundik-handik it afuni heilen woginabi wagu mondok welagen. Nen, linggene hundik-hundik he it were'ma inobabut pali wagu mondok welagen.

¹⁹ Nenahalok an namu logouwageluk oboget niikhi lagen lek nogo? Nelemak endep ekhe pilhoageluk oboget niikhi lagen lek?

²⁰ Afuni ineaga mene yi re! An naweak hilingiti mene andi re Hat he nongagen a? An nen he Hat Hoba enggin hokho mene figimo a? Nenahalok Hat handok a'nogo an noasuageluk ambisang nebikhit hal fikhi lagen?

²¹ An naweak Haren honggorabethogo fou re elo'legen a? Nen weak hilingiti mene sagalogo legat fisa re elo'legen a? We eil misik wela'luk ap wa'lagu mene sal fisagarek oba omanogo wengik logogiluk welagimo re, Haren an hera'nabigin oba nen he, an longgo pising umo re hera'nabigin lego,” iluk isikhe.