AYUB 6 - Allah Wene Fano Wene Hupla Inane

Ayub en onggo isikhe wene

^1-2 A'nogo isikhemo at Ayub en onggo ikhi logolik he mel isikhe, ”An nendawimo enggin hikhi logolik ou hikhi lagi mene ari enggin walhamo nen he,

³ i laut moge yenggelek andoma hakhogo hilingik logou hak. Andi nen he an nen nane ikhi logolik nendawi wenggelhigik legengge fetakhogo ikhi lagi mene andi faget hiren ninggi'nogo angga fuk.

⁴ At Mondok Omame Hokho mene a'nogo andogen he an nebe agaukhe tiagan noatemo welagi yi. At awei nen he nebene nelonggokwe mondogat heiselik lagamaat andi. At Allah nen hilingiterek mene andoma re inailo mondok hokho mene nek hilingiti logolik he, Aren he ap selei mene logale'ma inoatarek hak noasigiluk hilingiri'lago andi.

⁵ No keledai re engga ket lagagu mene wogosumo re oba homo u hak, andi hakhogo re no lembu andi ogore nunggungge wogosumo nek he oba homo u hagat andi.

⁶ Oba nen he ap sa nen nunggungge eluge folek legengge ekhe na hak nogo? Sue enggen elonggoma kut mene andi re enduk mirumo higit nogo?

⁷ Mondogat andoma re an nalabutmo aldo mene nek hilingi'mo re, an he nenggi nen senhugu mene ogore nabitsek welagi.

⁸ An samban ikhi lagi mene andoma nenahalok Allah esanggo holi'lago lek? An nane kweti lagi mene andoma nenahalok fut nobagali'lago lek?

⁹ We At Allah nen enek an noba weak-beakhogo nobagauwak, we Aren enek wenggelhambik an nebe pinggi noasuak.

¹⁰ A'nogo hilingnobagagin halok enek he, an nendawimo nen he andi re koninaferek higit hilingnobagaikhe iluk nagaiyegen mulugeti logogin. Allah mondok horek mene a'nogo awene melalek he an mondogat fut figirik he hologo nek hilingitu welagi.

¹¹ An nomame kiba nen neluk welagi nogo? An neluk mondok aninurogo logogin iluk ebet-ebet hilingitu mene ekhe werega?

¹² An nebe ari re helep haro andi hak hilingik welagi a? Nen neino re tembaga hakhogo wuriksek welagi a?

¹³ Lebetneelep ago iluk hilingitunemen he nomame mondogat lek aga, nen an lebetnea mene ekhe werek lek.

¹⁴ At Allah Omame Mondok Hokho mene a'nogo oba re an nen nane taganet fuluk ekhe hilingiti hea, oba tiphogo nek hilingiti logolik welagimo nen hea? Ou-pou yi'nogo hikhi logolik andi re an nagailak mondok fano mene ekhe logoilep agwi iluk nendawimo nen ebethikhi lagi.

¹⁵ Oba nen he, yago nagaila'lak, meiso wagi'lek hibi mondok were'ma i lagu agai lagarek mene firitok ikherek andi hak hilinglagepsik welagepma re, hit hinoba eberogo anggaluk it weregi, iluk angga lek hak.

^16-17 Hit he i lagu agai meiso es mene oba fugunem haro a'luk lagi'legengge abolok lek werek. Nen, o hibi lagagunem es a'nogo yenggele'ma omanogo nen obuluk seleksek legengge mondok firitok-firitok lek agarek. I a'ma ma'lima nogo inom mondogat firitok ugunem obuluk enek hilinglagarek andi hakhogo re hit a'nogoat welagep.

¹⁸ It ap o yatma nen inanggo unta amboloba lagaluk lagaikharek mene ogore iren i legen herarik lagagik-pigik hilingirik laga-lagaikharesik he o pela nek talek oba andoma wa'lagaikharek.

¹⁹ It ap inangge helaluk o Syeba nen inom Tema nen inom i a'nogo faget inendawimo nen ebet-ebet logouwak agi iluk eberik wagaikharek.

²⁰ Oba nen he iren wenggelhu mene a'nogo i esanggoma i ebe lek oba andoma mondok suguli wagaikharek.

²¹ Nagailak hat hebe re i lagu agai mene hak hilingik welagen, An naou hikhi lagi mene ari heil niugu aple hailo nen he hebe hesimnot fikhi lagen.

²² Ninggi'nogo iluk a'nogo hilingiti lagen? An nen hat hoba kino igi mene ekhe werega? Athe, an nobaget ap inoba yelik engge wogisaluk yi'nogo hilingi'no iluk kino igi mene ekhe werega?

²³ An nen he it ap inendawi isigi'legengge hilingitarek mene andoma inoba nen nonggo palogo nagap telnabuageluk kino igi a?

²⁴ Yogo, hiren, ”Hat haweak ebe yi,” iluk hinenggi tum pilingisogo yagane'ni! hit hinane andi an nen alokhogo logolik holigin enggere.

²⁵ Afuni inane weinam pikhithogo ugu halok andi re inendawimo ogo sakho ili'lago, oba nen he, hiren hinane ikhi lagep mene andoma re ebe ti faget ikhi lago iluk mel tukhumsek legengge, we hesanggeat ikhi lagep!

²⁶ An nane ikhi lagi mene oma hiren he, sogoi ane hak anggikhi lagep, an noba sinurogo werek kwelek hiren onggo yaganeti lagep mene andoma re we alomarogo yaganeti lagep.

²⁷ Hiren he it yenggerugwi suarek mene a'nogo inom helebenggen walhaluk he, it inelagaik anggigi'lek engge hilingiti lagep, hit hinare hinom hundik meneba nen ogore, hit hinenggi werek asugun iluk henarogo lalhi lagep.

²⁸ Hiren an nelokhoma furogo kwela'neani, an nen hit hinoba neranen wene lalhinabu lek hak?

²⁹ Hinendawinggen wenggelha'ni! Hiren wene leatokhogo hilingiti'legengge hilingitu lek. Nen, an he ibi-eberogo nen weak hilingiti legenggere, hiren enggin-fenggin an noba fugu lek.

³⁰ Hiren anggikhi logolik he, ”At ane eranhogo wene ili'lago,” iluk anggikhi logolik hilingiti lagep. Athe, aren weak mene inom fano mene inom fanorogo nen higi'legengge hilingiri'lago, iluk ikhi lagep.