AYUB 40 - Allah Wene Fano Wene Hupla Inane

^1-2 Ayub, hat he nailo e. Haren An Allah Nomame Mondok Hokho welagirek mene a'nogo nemberek wene paluogeluk ikhi lagen andiri! Haren nane oak sagaligin a, athe yaganetu logogin a,” iluk yagatikhe.

Ayub en Allah yagatikhe wene

^3-4 A'nogo yagatikhemo, at Ayub en he, Tuhan oba mel yagatikhe: ”An nen wene ap kembu mene nen agarek andi hak yagaheti lagi o, neisena. Wene an nen yagahesigin mondok le'ma re, ninggi'nogo yagahesigin anggegen, neisena.

⁵ An nen wene mondok hokhorogo yagaheti andi nen he, hobuk ekhe yagahesigin lego, neisena,” iluk yagatikhe.

Allah nen Ayub yagatikhe wene

⁶ A'nogo yagatikhemo, at Tuhan nen ebe eindep ane mil eterek oba anggele'ma omanogo nen, wene Ayub ekhe yi'nogo yagatikheat.

⁷ Aren he, ”Hat hobabut abat logolik, An nen wene yagahesigin mene yi mondogat onggo yagane'nogen hafe hebelogo eme o.

⁸ An fano igi mene, iluk hoba nonggologo re, An higithogo hilingitirek mene andi seramet fanhendik, Wene weak ikhi lagen, iluk yaganeti lagen a?

⁹ An nomame werek andi hak, hat homame andi higit werek nogo? An nane unggunggu ane hangge igirek andi hangge hat hane u hak nogo?” iluk yagatikhesik he,

¹⁰ hobuk ane lagokhogo mel yagatikhe: ”Inalilingge wanharek andi hak, haren fogerakhigik, agaugwerakhigik, agarek mene andi likloukhogo hilingfakhigik, ikhigik, in o.

¹¹ Afuni ekhe inonggwaregen fogerakhili'lagwi mene andoma heilenggenat yerisaluk, ha'mage het-pethogo inenggali warogo seramet fisano o.

¹² Afuni inonggwaregen fogerakhigik, inobabut weak welagik agarek mene andi it inebe werek oba andoma nen haren sebelogo fisigik, wulil tagalogo legetfisigik igin halok he, Haren aro.

¹³ Inebe warek he kweang habulogo salinabino o. Afuni wa'la'luk lagaikharek oba andoma kwe yagarogo fisano o.

¹⁴ A'nogo eberogoat hilingiten halogenek he, An nen hat yagaheti logolik, Hat honggwarek homameba hebe elok telegendik homame agen o, iluk fogethabigin o,” iluk lagokhogo a'nogo yagatikhe.

¹⁵ A'nogo yagatikhesik, ekhe mel yagatikhe: ”Wam hangge ebe mondok hokho mene enu re Behemot andi, ebe an nen hat elalhafigi andi hak, elalhigi mene andi obabut kwelakhano o. At andi re, wam sapi nen inom no lembu nen inom engga ninggerek hanggeat ninggerek.

¹⁶ A'nogo meneat he, at ebe omame hokho hilingik welagarek andi inom, nen omanggen ningsek mondok hilingik welagarek andi inom fut feino.

¹⁷ At agenggum he, e sin omame werek mene hangge kwelalherek. Nen, agosolit ebene omanggen he mondok ning-nangsek.

¹⁸ At oak he, tembaga hangge omame hokho, nen eisok he, posiemanggen hangge mondok mit-motsek.

¹⁹ An nen yi mene ti mene elalhigimo eluk welagarek mene andoma mondogat he we endep elo'lek meneat he, at enek he, mondok fogeratarek mene werek. Andi nen he, an nen at elalhigi mene nen enek he, elok mabenet fou hak.

²⁰ Punu-punukwe wam eil polok mene agaiyegen helalue waganogo yele yafarekwe omanogo re; engga at nunggu mene wuliferek.

²¹ At Behemot andi engga alok werek mene a'ma wengik welagik, fesi louk-lakse'ma yobin wilibi'mo andoma hinago welagik, ikherek.

²² At ebe re, engga alok werek mene andi sebele'ma kuna'ma andoma welagik, e i esanggokwe fulelek welagarek mene sebele'ma andoma welagik, ikherek.

²³ I Yordan fu hokho laga logolik, at elokheba kweisalogo lagunem youk lagi'lek endawimo pugat welagarek.

²⁴ A'nogo were'ma sa nen ailo'lek at eilenggen puget figik, hele fuluk ambisang oba ke'nokhogo fakfigik, u hak nogo? Elo'lego.