AYUB 4 - Allah Wene Fano Wene Hupla Inane

AYUB AGAILA'LAK INOM WENEANE ATTAK MATUKWA WENE 4:1–14:22 Attak-attak Elifas nen Ayub endawimo kagalhikhe wene

^1-2 A'nogo isikhemo at Elifas nen Ayub mel yagatikhe: ”Ayub nagailage. An he neilenggen aninurogo kwelakharek logou re elo'lek hilingi'mo, wene yagahesigin mene yi faget hendawimo weak asigin he a?

³ Haren afuni inebe hokhorogoat wene yagaisigik, inomame lek mene inomame asuagaluk leberisigik, ikhi lagen anggigi.

⁴ Afuni inomame lega'luk were'ma hat hane ugunem he elok inomamet fisigik, nen ineindep omame lek mene re haren elok inomamet fisigik egendek andi.

⁵ Oba nen he, yogondak he weak mene a'nogo hat honggwarek hoba agama hendawimo weakhogo, logolik he, hobakheindok palagendik welagen andi.

⁶ Hat hebe Allah oba lombokhogo welagen le'nogo? A'nogo were'ma, weak mene ekhe hilingiti'le'maat, hoba asuhak nogo? Hat hebe Allah oba lombokhogo welagen halok he, hendawinggen At oba himbiret fuluk, hobakheindok palagi'lek hambukhogo logou meneat.

⁷ Fanorogo ebesin ta, Afuni weak hilingiti'le'ma, wene weak mene yi'nogo onoba agarek nogo? Nen inobabut higithogo hilingitarek mene ekhe legetfisagarek nogo?

⁸ An nelu re, afuni nen yabu waganogo, awi weak mene yatunem, hobuk ebe weak meneat tatik, palhik, agarek hak, weak hilingitunemat wene weak mene inoba agarek andi, nelu o.

⁹ Afuni weak hilingitarek mene andi re, Allah a'mage inoba fuluk inebe alomat fisigik, eleage ambisang elema nen furogo inebe legetfisigik, ikherek o.

¹⁰ It afuni weak hilingitarek mene andi re, mene olomene enda'ma mene nen ane kwe agan nikherek hak nikharek andi. Oba nen he, At Allah nen inaik langgu-langgarogo potfisigik, inambe te'met fisigik ikherek.

¹¹ A'nogo hilingfisugunem, it andi mene olomene enda'ma mene a'nogo ambe nunggu mene legen ebe wa'lagarek andi hak, ebe wa'lagunem he, inagainafuri heise mondok pugulogo longgo agarek andi.

¹² An nabikanggoba ane samik-samok nesanggo kwelabek ekhe yaganetunem holhiat.

¹³ O hubanggo nogo tukhogo ugunem, inabi weak mene hugunem inelugetfisagarek andi hak, at andi nen a'nogo yaganetunem,

¹⁴ an youk weak mene lagagisik he, noagalekwe leik-leik isikhe.

¹⁵ A'nogo hilingitunem, sogoi orogat nelokhonggen oba leng-lenget ha wagama re, nomosi nebene legerik laga.

¹⁶ A'nogo hilinglagunem he, ap hangge mene ekhe nelokhoma menlagunem hasigisik neilengen hagain iluk hilingitigiba nen he ebe tukhumhogo hasigi'lek. A'nogo hilingitigisik ane legat welagaikhesigen hobuk ane erogat mel yaganetikhe:

¹⁷ Afuni Allah eilhanem weak hilingiti'lek ekhe welagaikharek nogo? At Walhasikhe andi eilhanem he fano tegelek mondok ekhe logou hak nogo?

¹⁸ At Allah amingmingengge pogoroba welagaikharek mene ogore, endawimo seramet fisili'lago. Nen, at agoromi malaikat mene ogore, weak hilingitunem wene inoba fikheregat.

¹⁹ It pogoroba mene ogore, a'nogo hilingitare'ma isikherek andi. Andi nen he, At Allah nen ap kweang abu'nengge meneba elalogo fisikhe mene omare kweang age mene hilingi'mo re eluk-eluk engge alperel isikherek hakhogo alperel inabu hak!

²⁰ Ap andi re we hubet enek eluk welagaresigen he, o hu'mokwe agu kwelek aremnogo re hesanggema teisa-teisa wa'lagunem he afuni nen inenggi hokhorogo andoma ap andi oba ekhe ebesu lek hak.

²¹ Inebe a'nogo lek agaikharek andi, inangge yi mene ti mene mondok longgo ikheregat, nen, it inebe inungguloa'ma nen fanorogo wenggelhugu mene a'nogo heligi'legengge wa'lagaikharek andi, iluk yaganetunem nesanggo holhigi,” iluk yagatikhe.