AYUB 39 - Allah Wene Fano Wene Hupla Inane

¹ Haren he, kambing enggama mene andi, eak o ti sambul tasigin iluk helu nogo a? Nen, mene olomene hangge enu rusa maro mene andi, eak tasigiluk ugunem heilenggen peneti lagen nogo a?

² Huli taba eak a'ma welagarek, iluk helu nogo a? Nen, ti sambul eak tasigin, iluk henggi wenasuhak nogo a?

³ Isa ebe al habukhogo logolik, eak taterek andi, ti sambul tasigin iluk helu nogo a?

⁴ A'nogo tagaisogo fisikherek oba, o leimo afuni le'ma andoma arat inalue agik, inomame agik, agaresik hobuk inagaisa oba wagaikharek mondok lek andi.

⁵ Wam keledai maro enggama mene yugunat nikhi logouwagaluk hele warek were'ma sa nen fikhalhikherek nogo?

⁶ At aiba hangge logouwagaluk an nen o leimo afuni le'ma andoma wogetik, o lei mayu eroma andoma figik, isigi andi.

⁷ At he, o kota afuni inebe hokhorogo were'ma logou abiren, yatmaat hekhogo were'ma, afuni inane hokhorogo at ebe sarogo waluk louwogoluk ugunem esanggo holherek mondok lek.

⁸ At amburu engga tom ebene andomaat were'ma agengga, we, engga muli mene halok andoma heragaisogo ninggerek.

⁹ Wam sapi maro mene nen hat heabu wokhesumo elok nogo? Aren hat hanggo awiba andoma nogo iwesumo amolo nogo?

¹⁰ Sapi maro mene andi nen, heabu wokhobagauwageluk, yaburigeba hele homagaisogo fuluk, hane ninghogo yagasu hak nogo? Aren kweang enggen talelhesuageluk yagasu hak nogo?

¹¹ Haren he, At omame mondok hokho, iluk anggaluk, heabu enggin weak mene aren hilinghobagauwageluk enggiba fou hak nogo?

¹² Nen, haren he, yi mene ti mene yakfegen mene enggen palek waluk we'luk, e enggen sagalogo folhendek oba andoma aren andogorogo hobagauwagaluk enggiba fouhak nogo? Elo'lego.

¹³ At sue ebe hugubi hangge enu unta andi mene ogolabi mondok weak-weagat lambun hikherek. A'nogo meneat he, at sue tawe hangge enu bangau andi mene tarogo nikherek andi emberek walhamo, at sue hugubi hangge andi re elo'lego.

¹⁴ Sue unta andi enggen he kweangma tagaisogo fuluk lagarek. A'nogo herakfuluk lagunem enggen andi kweang en aganhanet hikherek.

¹⁵ Aren he, An nenggen a'nogo figi andi, afuni ineisogen haloget fogoin a, athe sue, paik, ineisogen haloget fogoin a, iluk endawimo ebeterek mondok lek.

¹⁶ At sue unta andi obabut he, at enggen fikherek meneat he, fulelhunem he, onggwarek eak mene hangge fano tegelinaferek lek, hunogo mene eak hangge kwelak isikherek. Aren he nenggen, we, tulemat alemarogo figi, iluk anggikherek lek andi.

¹⁷ An nenat, at endawinggen kagalek mene inom, obabut hebelek mene inom wogoti'lek andi nen, at obabut mondok kembu nong-hongsek andi.

¹⁸ A'nogo meneat he, at ogolabi lambun hikhi logolik, kweanggwe humusek lagunem enek he, wam kuda amboloba hurek woginarek lagarek mene hobuget fisikherek andi.

¹⁹ Hat Ayub yi nen wam kuda omame wogotik, su labet fisagarek hak inom esi oroa'ma wulibuageluk wogotik, egendek nogo?

²⁰ Haren at kuda pulue yapok-tapok lagarek andi hak loagaluk hilingitik, set wulafi logolik afuni youk loagaluk hilingitik, egendek nogo a?

²¹ At endawimo agaiyek oba kweang tonggoma andoma eisogen filik-falak isigik, weim yafunem omamerogo hounget ha kwigik, ikherek.

²² Afuni inailo nen inoagelekwe abolok ikherek andi hak, at a'nogo hilingitarek mene andi fut fikherek mondok lek. Weim yafi logolik karok oba wasuogoluk ugunem ailo nen iget fikherek mondok legat.

²³ At kuda andi nen ap amboloba yarugusogo waluk lagarek mene, andok herap ane igik, arige andi enggat amulit yararethigik, ikherek.

²⁴ Weim inoba wulibuogoluk hu'lenggen agarek andi hak pinggong anet hugunem, kuda andi heget figi'lek tolulurogoat mondok kwikherek.

²⁵ A'nogo inoba wulibuogoluk pinggong anet fugunem iget figi'lek irim esi lagaluk weim yafunem ebe yatma nen inamben palhik, ap tentara inogogwi mene nen, Yigit feino, tigit feino, iluk inane hokhorogo ugunem obabut hombunat logolik afe mot fisaluk welagarego.

²⁶ Hat hendawimo kagalek logolik, sue loinye ogolabi langhogo o i ambutkwe tarogo loagaluk elok yagasu hak nogo?

²⁷ Sue kuri andi awi tom uan meneba wusuagaluk, haren yagasumo hane hologo wusi lagau hak nogo?

²⁸ At sue kuri andi, awi helep tom eilpet silipnorek kwe wutfuluk, afuni nen he, selei mene nen inoasi kwinogo iluk leget pa'leget wanharek andi hak, at sue andi, tom helep eil silipnorekwe welagarek andi.

²⁹ At ebe andoma logolik, sue paik at ninggerek mene eilenggen yatma po'lima nen elikwe yikwe peneterek andi.

³⁰ A'nogo logolik, sue paik ekhe wa'lagunem hikheresik he, ebe andomaat puluk, warek mene andi amep eagwi noagaluk wogisa lagagunem nenggarek andi.