AYUB 34 - Allah Wene Fano Wene Hupla Inane

At Allah re taganhogo hilingiterek lek, isikhe wene

^1-2 Hit nogogwi hinebe hebelek logolik hinungguloak kagalek mene welagep hilingi'mo re, an nane ugu mondok logogin mene oma hinesanggo fanorogo holhi logoni o.

³ Afuni nen yi mene ti mene enduk mikhaluk he yi enduk mondok fano mene iluk inelurek, nen inane ugunem holhaluk he ap yi re endawi werek agun nen ili'lago iluk inelu agaregat.

⁴ Wene werek mene ari re niren fanorogo kumut haluk he, ambine seberogo legabesuageluk welago.

⁵ At Ayub en ikhi logolik he, ”An noba weak mene ekhe werek lek, oba nen he, At Allah nen an noba katukhogo mene re yi iluk wo'neri'lago lek.

⁶ An nen ikhi logolik an weak hilingiti lek ugunem he, ap yi eranen wene ili'lago mene anggili'lago. An weak hilingiti lek oba nen he, yogondak an a'nogo ou mondok elo'lek mene hikhi lagi,” iluk ili'lago.

⁷ Yago, ap ekhe at Ayub en hundik-handik Allah oba weaget fili'lago andi hakhogo hilingitunem isikhi lagep mene ekhe werega?

⁸ At he ap weak hilingiterek mene inom sebetik, hesangge-pesangge hilingiterek mene inom sebetik, hilingiri'lago.

⁹ Aren ikhi logolik he, Allah endawimo amolo anggikherek mene nek hilingisigin halok he we alomarogo hangge hilingisigin,” iluk ili'lago.

¹⁰ Yago, ap hinendawi wenggelek mene omanogo hinesanggo holino! At Allah Omame Mondok Hokho mene andi re weak hilingisu hak nogo a? Mondok lego.

¹¹ Aren he it afuni nen inobabut hilingitarek lombok inoba hilingfisigik, nen it inebe hilingik aplerogo hilingfisigik,” ikherek.

¹² At Allah Omame Mondok Hokho mene andi re weak hilingiterek lek, Aren he afuni mondogat inawene katukhogo palinaferek.

¹³ At Allah re omame hokho mene andi re sa nen wogotarek anggegep? O kweang yire ap sa nen halhi logoin iluk oba fikhe anggegep? Mondok lego.

¹⁴ At Allah nen it afuni ineluk a'nogo waganogo, it mene set a'nogo lisogo wanumo nen he,

¹⁵ it yi mene ti mene ineluk werek mene a'nogo mondogat wa'laga logolik he, afuni re ambotkwe kweang asu hak.

¹⁶ Arigini'mo re hat hendawi wenggelek hagun halok he, fut-fuluk, hesanggo fanorogo holin o.

¹⁷ At Allah Along mondok logolik katukhogo nek hilingiterek mene andi haren weaget fikhi lagen andi ri? Nen, haren anggikhi logolik he, wene katukhogo hilingitarek mene andi re At Allah nen abit anggili'lago iluk ikhi lagen a?

¹⁸ It ap raja inom inogogwi kaindek inalong werek mene omanogo inomen, it inoba haro logolik kwanirogo nek hilingitu halok he At Allah nen unggum inoba fisikherek.

¹⁹ At Allah nen enek it ap raja inom, inenggi werek mene inom, inenggi lek mene inom, elalinafikhemo re, Aren he it ap raja halok enek inebikhit agik, nen it afuni inangge lek mene halok herakfisikhi logolik he it inenggi werek mene halok enek elokhomarogo hilinginafik, hilingiterek lek.

²⁰ At Allah nen it ap sebelinarek mene omanogo unggum wogisamo re, hubenggen tulem oba nen ogore it inebe ferekhogo wa'lasu hagat. Nen, it ap inalong-pinalongsek inap omanogo re siserogo inoasumo re, it inebe mondogat legasu hagat.

²¹ Allah nen he afuni inebe ferinarek logolik, it lagaikharekwe eilenggen welagarek.

²² O mum se'maba nen ogore, it afuni weak hilingitarek mene re hina'lasu lek hak?

²³ It afuni Allah nen wene katukhogo yaganisoageluk Allah were'ma logoin mene faget, At Allah nen enggi tiba iluk enogo fou lek hak?

²⁴ At Allah nen it ap kaindek ineabu legoma werek oba nen pelaginabigiluk inom, inobali'mo it ekhe liaginabigiluk inom andoma re, at yiginik-at tiginik iluk inobabut peneterek lek.

²⁵ Iren hilingitarek mene At mondok elure'ma re, Aren sebel fisageluk inom weagerinabigiluk inom andoma re o hubanggo hilinginaferek.

²⁶ It inaweak oba re inelokhe lambukhogo inoatik, nen it afuni hokhorogo ineilhanem he it inebe unggum wogisigik, ikherek.

²⁷ Iren he At endawimo agaiyek anggikherek mene a'nogo hologo hilingiti legengge hilingitik, At ane melalek yagaisugu mene omanogo fut figi'legengge hilingitik, agarek andi nen hilingiterek.

²⁸ It inobabut hilingitarek oba re afuni inenggi lek mene omanogo nen inendawi warili'lagwi mene omanogo re At Allah nen esanggo holherek.

²⁹ At Allah nen An nane legengge logogin iluk hilingisigin halok he, ap misigen ogo ekhe ailo legengge nenahalok hane lek welagen iluk u lek hak. Aren elokhe hinakfuluk were'ma re ap misigen iluk ogo ekhe herasu re elo'legaro.

³⁰ A'nogo hilingi'mo re ap inalong logolik, inomameba sebelinarek mene a'nogo hak weak mene omame a'luk sebelinarek were'ma re, Afuni inunggulenu ekhe mene-ekhe mene omanogo nen andi mene legabesugun iluk hilingisumo nen he ebe asu lek hak.

³¹ Ayub ao, hat haweak he Allahba mondogat fageten a? An weak ekhe inom hilingisin lek iluk he At eilhanem hane menfegen a?

³² Hat haweak werek mene omanogo ebe weinam fakhogo yaganesuageluk he At oba yagaten a, lega? Haren hilingiti lagen mene a'nogo palfagain iluk he, hombuk palhen a, lega?

³³ Haren At Allah nen hilingitu mene a'nogo faget eberogo anggugu lek kwelek he, At Allah nen haren yagati lagen mene andi hane holu lek hak anggikhi lagen a? Yogondak he we haren enek tekhogo in o, nen an nen fuk. Hat hendawimo anggegen mene andiat in o!

³⁴ It ap inungguloak kagalek mene nen ogo, nen it inobabut hebelek mene nen ogore, an nen ikhi lagi mene yi faget he eberogo ikhi lagen iluk u hak. Nen, iren holhaluk ikhi logolik he,

³⁵ At Ayub en andoma re fut figi'legengge nen ili'lago, nen aren he ebe ti mene faget ikhi lagi mel onggorengge nen ili'lago, iluk u hago.

³⁶ At Ayub en ane ili'lago mene andoma fi-furogo holek logoumo nen he, aren ili'lago mene andoma re ap kwanirogo hilingitarek mene nen agarek hak iluk futfou hak.

³⁷ Aren kwanirogo hilingiri'lago mene a'nogo re aweak ekhe inom to'mot fugunem he, aren nit nineilhanem Allah a'nogo sebelogo fuluk he, At Allah ane sagalogo fou hak.