AYUB 3 - Allah Wene Fano Wene Hupla Inane

Ayub en, ”Nambigen ta'lagagi e,” iluk Allah yagatikhe wene

¹ A'nogo logolik, at Ayub a'nogo ane wulagaisogo onggwarek ebe ta'lagaikhe sambul a'nogo homan fikhi logolik he mel isikhe,

^2-3 ”Neisena Allah, o hup an nagaisa alabutmo a'ma agagi sambul andi inom hup an nebe ta'lagagi sambul andi inom he Haren homan fein o.

⁴ Neisena Allah linggene andi Haren mumet fembik he, Hat hungguloa'ma eberek welagen mene andi onggoret feino, neisena. Ombak-bak fano mene nen liarasinogoluk neisena Haren herakfisa fuk.

⁵ O andi sambul haren he, mondok te'met figik, mumet figik, henanggulok sebelogo weaget figik ino o. Mo yasinogoluk ohena nen sebelek mondok logouwak.

⁶ Hup andi sambul he, tahun inom bulan inom wenatarek mene omanogoba nen leget fisoak, afuni nen ogo andi faget ekhe ugun hanogo, linggene andi faget mel ekhe wenggel hikhi logoinogo.

⁷ O andi sambul he, mum en enek sebelek were'ma, inomalik ekhe taginafi'legat nen afuni inane inagaiyekhogo inaggilugeti'legat logouwak

⁸ Yago hit hareise hinap inom Lewiatan eil watu hinap inom, o an ta'lagagi sambul andi hinane hombuk palogo haman potfisani o

⁹ O hubanggo an ta'lagagi andiba, o hil mogolhi'lek, hesagal wap o wei igiluk lagai wagarek mene a'nogo yararethigi'lek, logouwago. O hubanggo afuni nen, o wei igin, iluk inendawimo eberek welagaikharek mene andi re, an ta'lagagi andiba re wei igi'lek logouwago.

¹⁰ An nagaisa alabutmo nen ta'lagi'lek logouwageluk, nanggwe huti'lek logouwem, yi enggin ti enggin hikhi lagi andi, higi'lek logouwagaluk neilenggen humunik logouwem. O an nebe ta'lagagi sambul andi re homan ugu logouwago.

¹¹ An nebe nagaisa alabutmo nen waregengge ta'nafik, nen nendawinggen lebekhogo wa'lagik, uwem, ta'lagagi andi nenahalok he?

¹² An nagaisa nen agoumo felikhogo wo'nafikhesik, eilak hunafikhe andi ninggi'nogoluk nogo?

¹³ Andem sambul an nebe wa'la'lesik lelema nen he, nabolok lek logolik set walikhi logouwem agwi,

¹⁴ O endamat andoma it ap inogogwi raja-raja omanogo inom, it inogogwi kaindek fenakwe omanogo i nomen inawi meisalek mene legeisogo fanorogo wuti lagaukwa omanogo hak,

¹⁵ athe ap raja inamlogomi nen inailoba perak inom, emas inom, mondok pete tunghogo hilingfuluk werek andoma hakhogo nabolok lek nogokhi logolik logouwem.

¹⁶ An nebe nendawinggen legengge ta'nabile'ma, o selek neilenggen higi'lek logou mene ta'lagagi andi nahalok he.

¹⁷ Ap inobabut mondok weak meneba nen ogore wa'lagunem salinafarek oba andoma nen inobabut weak mene andi ekhe inom hilingisu lek hak, nen it ap yabu hilingitu mene inomame mondok lek agu kwelek hilingiri'lagwi mene ogore andomaat set warikhi logolik werek.

¹⁸ It afuni hele warek welagaikharek mene re inebe seberogoat inabolok lek fano welagik, afuni inane nen youk kwelafarek mene a'nogo inane ekhe holhi'lek welagik, agarek.

¹⁹ Andoma re ap kaindek inenu werek mene inom, inenu lek mene inom he higit enek welagaikharek oba. Nen, it inamingmingengge a'luk welagaikharek mene andomaba nen fikhalogo wulifarek oba.

²⁰ Afuni yi enggin ti enggin hikhi logouwagaluk, tagaisogo sele'ma fisagarek andi ninggi'nogoluk nogo. Inendawimo mondok weak logouwagaluk, ineluk taginafarek andi nahalok nogo.

²¹ It afuni ariginik mene re, ineluk logolik inangge onggo hokho mene helikhi logou inabit hangge. We, wa'lasugun mene nek he, inamolo meneat he, weak-weak wa'lagi'legat welagaikharek andi.

²² It he, inebe wa'la'luk lagaikhare'ma andoma arat laluk inendawimo hai mondok hakhagarek andi.

²³ It hobuk logoin oba andoma ineilenggen hanogo iluk, hat Allah nen, ineil ma'mungge salfisigik, inanggwe palfisigik, egendek.

²⁴ An namburu na hak he, Eige, iluk heinet watu mondok welagik, i lagu mondok welagarek andi hak, nendawi ane ugu mondok welagik, igirek andi.

²⁵ An nailo anggigirek mene andi arat noba hilinglagik, agaiseratirek mene andi noba agik, ikhemo welagi o.

²⁶ An yamukhogo welagik, nendawinggen hambukhogo welagik, fano welagik, igi'lek weak hugu mondok welagi o, neisena,” iluk Allah yagatikhe.