AYUB 29 - Allah Wene Fano Wene Hupla Inane

Ayub en at awene a'nogo faget ane wure'ma isikhe wene

¹ At Ayub en he ane ikhi lagaikhe mene a'nogo lisogo ikhi logolik he, yi'nogo isikhe,

² ”An nebe attak Allah nen fetnarek logolik halnafunem welagagi aremnogo hakhogo, nebe a'nogo logoile ago iluk anggikhi lagi.

³ Aren he an lebetnafik, an o mumsekwe lagunem Aren selegetnafik, hilingiti laga.

⁴ At Allah ninom hundik logolik Aren an nawi wurik a'nogo sebelnarek were'ma re, nenggi andem oba nalong-balonghogo welagagi aplere a'nogo.

⁵ Andem oba re At Omame Hokho mene a'nogo re an nera'lu mendek welaga, nen an nagainafuri re neisok erokwe maserogo welagaikha.

⁶ Nanggo sapi, domba inom omanogo nen he eilak amusu hokhorogo keralhi lagagi. Nen, nagayo zaitun omanogo nen he, kweang helep enggen werek kwe yak fuguba nen ogore amusu hokhorogo keralhi lagagiat.

⁷ Nen, it ap o kota ba andoma hokho-hokho inap omanogo seberogo hu'laluk were'ma, an ogo it inanggele'ma hu'lasi lagu halok he,

⁸ it ap souge mene nen an nealuk he inebe healaga lagaukwa. Nen it ap hokho-hokho inap omanogo nen ogore an nalong anggaluk legeisogo nobagakhi logolik he inafe hebelogo menlaga lagaukwa.

⁹ It ap kaindek omanogo inane matunem kugu halok mene ogore inanepalfikhi lagaukwa.

¹⁰ Nen ap mondok lego inap oba nen ogore inane endep ekhe ikhi lagaukwa legat.

¹¹ Afuni nen an nobaget ugunem holhaluk he nenu ugu aple inambe sop-sop aga lagaikhe, nen iren an ineil nealuk he an nen hilingiti lagi mene faget he fogetnafi lagaukwa.

¹² An nen he it ap inenggi lek mene nen lebetninabin ugu halok leberinafik, it yenggerugwi suarek mene afuni nen leberinabu lek mene re an nen leberinafi lagagi.

¹³ An nen it hemi sogwe mene leberisugunem he inendawi sebel fakhikhi lagaukwa, it afuni wiik weakhogo welagaikharek mene nen he an fogetnafi lagaukwa.

¹⁴ An nen hilingiti lagagi mene andoma re henarogo hilingiti'legengge mondok higithogo nek hilingiti lagagi, nen wene katokhogo palogo fagarek mene andi re an nen omamerati lagagi.

¹⁵ It ap ineil puk mene faget he an he it ineil hakhogo aga lagagi, nen it ap ineisok weak mene faget he an he it ineisok hakhogo aga lagagiat.

¹⁶ It ap inenggi lek mene faget he an nen it ineisena hakhogo aga lagagi, nen it ap pok mene faget he an it inalong palengge aga lagagi.

¹⁷ Oba nen he it ap inanini mene nen inomameba hilingitu mene omanogo re an nen inomame leget fisikhi lagagi, nen iren yei inoasugun iluk hilingitu mene omanogo re an nen telogo fisikhi lagagi.

¹⁸ An nendawimo eberek welagagi mene re neluk umur uanhogo wela'luk, nawiloba nen nebe fini-fanorogo wa'lasigin iluk anggikhi lagagi.

¹⁹ An he e muli fanorogo wilipluk, omanggen oba amusu were'ma enggibene inom lilen waterek a'nogo hakhogo hilingik welagagi.

²⁰ An nomame re endebengge ekhe pikhi lagaikhe mondok lek, afuni mondogaren he an hundik-hundik foge'nafi lagaukwa.

²¹ An nen komo wene yagaisugunem he afuni mondogat inane legengge alokhogo welagaukwa. Nen wene yagaisugunem omanogo inesanggo fanorogo holfikhi lagaukwa.

²² An nane mondogat ugu halok he aben ekhe wurepma lisogo ikhi lagaukwa lek. I meiso agai pikherek hak an nane ugu mene omanogo inendawimo mondok kwikhi lagaikhe.

²³ Yi mene ti mene owil itu sambul meiso wagunem it ap yabu wanhu inaben iaple waga iluk anggili'lagwi a'nogo hakhogo re, an nane ugu mene omanogo re it afuni nen inagaiyekhogo wanhi lagaukwa.

²⁴ It inendawi sinurogo werek mene inoba re, an nen endo asuageluk hilinginafi lagagi. An nelokhe heanerogo welagagi a'nogoba re it ekhe inom inagaiyek asuageluk hilingiti lagagi.

²⁵ An he it inoe melalinafu mene logolik he, wene yi wene ti wene andem he an nen enek tegeti lagagi, ap raja nen agoromi sikhe fisogo mene inaggele'ma kuluk hilingitarek higit an nen it melalinafi lagagi. Nen it inendawi heiselogo were'ma re an nenat inendawimo koninafi lagagi.