AYUB 28 - Allah Wene Fano Wene Hupla Inane

Inendawinggen werek mene a'nogo faget fogeratarek awuni

¹ No perak heratarek oba obalik werek enek, nen emas eil fano mene weinam asuageluk endu oba weratuba ogo obalik weregat.

² Posiemanggen he kweang oba nen habuli'lagwi, nen helep oba nen he endumo wera'luk he tembaga ebe wili'lagwi.

³ O hik kiruang tengse'ma oba nen ogore elok ku hagenek, nen obalik mondok woluelerogo hilingik oba nen ogore ineilenggen kogoluogeluk kwili'lagwiat. Elonggoma mondok mum se'ma andoma ogore aben helebenggen herasi kwagaregat.

⁴ Mondok walek ali'ma afuni inom yi mene ti mene inom werek lek oba andoma ogo, ap ineisogen iluk sebelharek lek oba andoma ogo, aben heleba eiselogo porek logolik pogolema yi mene ti mene ane mondogat le'ma ali'ma ogo, yabu hilingitarek enek.

⁵ Kweangma nen he afuni faget nunggu mene fulelogo wulabi wagarek, oba nen he kweang andi a'ma fikhit andoma re mondogat agam-fagam isugunem he kweang oba kwalegengge omanogo re hesangge-pesangge hilingfugunem weregat.

⁶ Helep kweang elonggoma mene andoma re elokhe fano mene enu nilam andi werek nen kweang ageba andoma re emas elokhe fano mene kwalek werek.

⁷ Sue findi-findi ogore andoma kwe lare onggot, nen sue iwesagap oba nen ogore obalik andem ambolkwe ekhe tarogo lagarek legat.

⁸ Mene singa ogo, yi mene ti mene maro mene fena ogore ebekwe mondok tiring-terengsekwe andi nen andoma laga mene ekhe werek legat.

⁹ Helep mondok haro elo'lek mene ogore afuni nen habulik kwagarek-kwagarek he isaba fei kwili'lagwi, nen iren he tom omanogo forik kuluk he tom elema omanogo fei kwili'lagwi.

¹⁰ Tom mondok haro omanogoba nen ogore forik kwikheresik he, andoma nen permata wirilik hangge mene mondok fano mene omanogo helili'lagwi.

¹¹ Habulik kugu-kugure i elesi fulogomhogo lagai weri'lago meneba fei puluk he, andoma hinago weregengge omanogo mondogat weinameri'lagwi.

¹² Oba nen he, inendawinggen wenggelagarek mene andi re koma herasu hak nogo? Nit ninelu asuageluk he koma nen yanggulu hak nogo?

¹³ Inendawinggen wenggelagarek mene andi re afuni ninanggelekwe welagarek lek, ap misik ekhe nen ogo ebe elokhe re yiginik mene iluk he eberogo nen onggorat.

¹⁴ I laut elonggoma welagarek mene nen inom i laut ebe yenggelek welagarek mene nen inomen ikhi logolik he inendawinggen wenggelek mene andi re nit ninoba werek lego iluk ili'lagwi.

¹⁵ Inendawinggen wenggelek mene andi re no emas eil fano meneba iluk ogore onggo palu lek hak, nen perak oba ogo hunusu elo'legat.

¹⁶ Emas inom permata inom onggo mondok hokho mene ogore inendawinggen wenggelagarek mene andi re inom higirabesu elo'legat.

¹⁷ emas inom kristal inom andoma inom higirabesu re elo'lek.

¹⁸ No merjan inom, kristal inom, mutiara inom, andoma mondok sebelek kwelek he inendawinggen kagalek mene andi nek he mondok lego werek.

¹⁹ Fanorogo wenggelharek mene andi inom helep enggen topaz ebe mene andi inom, emas wurik weak mene andi inom, onggo re higitsek lek.

²⁰ Inendawinggen kagalek mene andi erore koma nen wulibi lago nogo? Nen fut-fuluk hilingitarek mene andi re koma nen wanharek nogo?

²¹ Yi mene ti mene eluk welagaregengge oma misigen ogo ekhe ineil hikherek lek, nen sue selekwe tarik nikherek mene nen ogore weinam were'ma hikherek legat.

²² Wa'lagaikharek mene nen inom, lek agaikharek mene inomen ikhi logolik ogore, nit he inane nen iluk waluk ugunem enek holhorego, iluk agarek.

²³ At Allah nek he inendawinggen kagauksek mene andi werek oba elu welagarek, nen kwe andi kwe lagaikharek andi re we At amuat elu.

²⁴ Nen At Allah re o kweangma unggut-unggut andoma eil werek, yi mene ti mene pogot a'ma werek mene omare eil peneti logolik werek.

²⁵ Aren sogoi omame wogetik, i laut yenggelek logogin kwe tugeratik ikherek.

²⁶ Aren meiso piginkwe iluk tukhumet fuluk he, eilabut inom unggunggu inom lagainkwe iluk ebekwe tukhumet fugunem.

²⁷ Andem oba endawinggen kagalek mene a'nogo eilenggen haluk he Aren elokhe kwelakhaluk, fano halok he, ari higit iluk tekhogo fikhi laga.

²⁸ At Allah nen afuni inoba ikhi logolik he, ”Inendawinggen kagalek mene andi wo'nisoageluk he, Allah andiat legeisogo fikhi logoni. Nen, futfikhi logouwogeluk he, weak mene andi agaiserogo yatma lakfuluk logoni,” iluk isikhe.