AYUB 26 - Allah Wene Fano Wene Hupla Inane

Ayub en onggo isikhe wene

^1-2 A'nogo isikheba nen he at Ayub en onggo ikhi logolik he, ”Hat he, ibi-eberogo nen an nebe lebelekhogo were'ma lebetniikhi lagen hagun welagen. Nen hat hobabut hebelek oba an mondok wiik-weakhogo ugu were'ma nagaiyek kwelaknafu mene welagen.

³ An ap morue nagun logolik nafe sogourogo welagi nagun yi noba, haren wene komo wene inom, nelurogo iluk inom, yaganeti lagen o!

⁴ Hat he saba heilenggen lourek logolik hane mati lagen? A'nogo ino, iluk he sa nen hat hambeba wene fikhemo a'nogo ikhi lagen?” iluk isikhe.

Bildad en isikhe wene

⁵ A'nogo isikhemo at Bildad en onggo ikhi logolik he, ”It ap wa'la'luk lagaikharek oba andoma werek mene omanogo re inoak leigeri'lagwi. I inom, i kweang ambuema werek engge omanogo inom ogore aleik wari'lagwiat.

⁶ At Allah eilhanem he it afuni wa'laluk lagaikharek oba andoma re kwe hurik werek. Inebe leget fisikherek oba andoma ogo re kwe yagarek legat.

⁷ At Allah nen he pogot i yenggelek mene amboloba talogo fikhe. Nen kweang he we selek pele'ma kologo fesikhe.

⁸ Aren he ohenaba i hokho-pokhorogo yenggelogo fesikhe, oba nen he i enggin nen iluk he hena a'nogo fo'lari'lago lek.

⁹ Aren hena wuri'logo fikhe mene a'nogo ambol fikhit andoma re, tugi funu a'nogo afuni inelokhoma nen ohenaba salogo fikhemo werek.

¹⁰ Aren he mum inom selek inom amu-amu logouwageluk, i laut agum oba huli watfikhemo werek.

¹¹ Nen, aren ane supuk tololang esumo nen he, pogot tik liabek mene a'nogo abolok mondok u hak.

¹² At omameba re i laut esinggen fonyalik lenggalik wagarek mene ogore elok abolok legetfikherek. Nen At endawinggen wenggelek oba inom, obabut hebelek oba inom he i laut wonoget fakhikherek mene a'nogo re wolelenggenhogo fikherek.

¹³ At eleage pogot ebene futhugunem he pogot eil mondok healherek, nen At enggi nen he menawe hak mene ular naga i laut elema nen hemekhogo wulibi wagunem watfikherek.

¹⁴ Oba nen he mondogat andoma re At omame hokho werek mene a'nogo enek hoageluk hilingitikhemo re, we inane ling-longengge ugu mene nek nit ninesanggoma asi weri'lago. Oba nen he At Allah ebe hilingik welagarek mene faget inom, At Omame Mondok hunikhogo hilingik welagarek andi faget inom, we endebengge nek nineluo!” iluk isikhe.