AYUB 18 - Allah Wene Fano Wene Hupla Inane

Bildad nen onggo isikhe wene

^1-2 A'nogo isikhemo re, at Bildad en onggo ikhi logolik he, ”Ayub ahwi, hat hane ugu mondok welagen mene oma ki huli palfagain nogo? Hane legame, yogondak he niren wene yagahesugun mene ekhe werek.

³ Nenahalok haren nit wam sapi ninom higirapninafi logolik, it he, ap kembu mene hak anggikhi lagen?

⁴ Hawene weak andiba re honggwaregen hebe ouap erikhi lagen. Hat hendawimo anggikhi lagen mene andoma higit asuageluk o kweang yi lek agik, o tom oma higilogo lagik igin anggikhi lagen a?

⁵ Wene ebe weinamhogo re, ”Ap kwanirogo hilingiri'lagwi mene andi inaesage re ombak-bak eti'lek welagik, nen inagandou amulok he ibilagi'lek welagik, ikhi logogin.

⁶ Awi sabu sale'ma esage ibilik mene a'nogo re nagul-nagul kwikhi logogin, lampu oak ombak-bakhogo werek mene a'nogore ekhe inom selegabeti logogin lek.

⁷ Eisok fanorogo sebelik lagu mene a'nogo re talo-talonggerik laga logogin, at onggwaregen hilingisigin mene iluk wene melalek werek mene a'nogoba tungeti logogin.

⁸ At eisok anggwe folelogo wepsek meneba filik laga logogin, nen at onggwaregen elema ke'nok ikhi logogin,

⁹ eisok unggut yetfet ugunem he at ebe elema ke'nok ikhi logogin.

¹⁰ At obaget kweangma hele wephogo hinago werek, nen ebekwe at lagain kwe re asi pelabek welagik, sapna lego welagik, hilingik werek.

¹¹ It ap kwanirogo hilingiri'lagwi andi re, inabel fena-fena inamel-mel aple nek hilingigen he youk lagaikharek, nen it laga logolik he inamel-melhogo nek lagaikharek.

¹² Oba nen he attak at omame welaga mene a'nogo re, yogondak he aren ekhe hilingisure, elo'lek ari'lago. Yi kwe ti kwe lagunem he oba aga mene a'nogo nen murok enek nikho.

¹³ Agap ebene re oumo nen mondogat ningge, nen enggi eisok he mondok fili agasik kurele wulubi'lago.

¹⁴ At ebere awi sabu sale'ma omanogo abolo'lek were'ma nen hambokhogo waluk he, wa'lagu mene inoe enupogot a'nogoba waganogo elokhoma omanogo fei wagama werek.

¹⁵ At awi wurik he meiso endu pelerang mene oba kweisalogo nolfoumo re aldamukhogo nagain.

¹⁶ E omanggen fili a'luk engga mondogat pugagunem mutarek andi hak at ebe wa'lasigin o.

¹⁷ It afuni o kota elonggo fikhit werek mene nen inom, endakwe fikhit werek mene nen inom, ap a'nogo agwi iluk ebesugun mondok lek, at enu re ap misigen iluk ogo ekhe eberek logogun legat.

¹⁸ O selek oba omanogo nen at a'nogo silogo o mum oba wulak fisagain, ap ineluk logogun oba omanogo nen at a'nogo hambokhogo hugisagainat.

¹⁹ At againafuri inom, aren tagomangge mene inambisangma mene inom ekhe logogun lek, at awi eroma andoma ogore ap misik iluk ogo ekhe logogun legat.

²⁰ At oba aga mene andi holhaluk he it afuni o barat fikhit werek mene re youk lili'lagwi, nen it afuni timur fikhit werek mene re inailo nen inoak leigeri'lagwi.

²¹ It afuni Allah ane ikherek mene a'nogo holfigi'lek hilingitarek mene inom, nen it afuni Allah inonggot mene inom, andi inambisangma re eberogoat a'nogo hilingfisagain,” iluk isikhe.