AYUB 10 - Allah Wene Fano Wene Hupla Inane

¹ An neluk welagiba re mondok nabit ari'lago. A'nogo logolik nendawimo anggikhi lagi mene andoma mondogat wulak fisikhi logogin. Nendawimo a'nogo weakhogo logolik alepalerogo hikhi lagi mene andem nambeba nen mondogat wulakfisikhi logogin.

² Neisena Allah, Haren an weagerogo nobagau fuk. At he ero yi faget hat ninom weim palek logolik hilinghafi lagi iluk weinamhogo yaganom.

³ Haren ebeti logolik he, An nonggwarek nenggi nen elalhi mene ari re enggin-fenggin oba fou higit obaat fikhi lagi iluk anggikhi logolik hilingiti lagen a? Nen it ap weak hilingiri'lagwi mene inoba re Haren fanot fisikhi logolik meneat.

⁴ Haren heilenggen nisikhi lagen mene andi re, nit afuni nen nineilenggen isikhi lago hak he fuk,

⁵ nen, hat heluk welagen mene andi re, afuni ineluk horokhogo welagaikharek andi hakhogo re legat.

⁶ Ariginik oba nen he, nenahalok an naweak faget Haren mondok longorogo herati lagen? An nen kwanirogo hilingiti lagi mene andoma faget mu'narek nikhi lagen?

⁷ An eberogo nen weak hilingiti'lek mene andi re, Hat he afe hebelek logoligenat a'nogo hilingnafi lagen. Nen an nebe Hat enggiba welagi mene yi ap ekhe nen telogo wo'nabu lek hak a'nogo re Harogo helurek.

⁸ An nebe yi re Hat henggi nen elalogo nobagasigin, oba nen he, yogondak Haren

⁹ An nebe kweang tangge meneba elalogo nobagasigin a'nogo wenggel han! A'nogo hilingisogo nobagasigindik meneat he, yogondak Haren an nekhengge kweang aling higit asuageluk hilingnafi lagen a?

¹⁰ Haren enek an neisena nen ta'nabuageluk hilingiten, nen Harenat an nagaisa alabutmo nen hokhot nobagegen.

¹¹ Nebe abirengge yi re, Haren noak sep hun higik elalogo nobagegendik noak ebene nomanggen to'mot filik lagen, noak a'nogoba re Haren neinyo figik, huli'lipsek logouwageluk nagap to'mot figik, isigin.

¹² A'nogo hilingnobagegendik he, Haren neluk wo'netigindik, hendawi hundik hilingnafi lagen. An nebe neluk a'nogo re Haren furogo kagalnarek logolik halogo nobagakhi lagen andi.

¹³ Oba nen he, haren a'nogo elalnafi logolik andoma linglong, at ebe alomat fagain, iluk wenggelhigin mene a'nogo yogondagen an nelu ari'lago.

¹⁴ A'nogo hilingitigindik a'luk he, an weak hilingitunem nealuk, at aweak lek hilingisogo fagain lek iluk heilenggen fuluk welagen.

¹⁵ Nen an weak hilingiti halok he, an nebe welagi mene yi re, ibi-eberogo nen alomat lasigin werek. Oba nen he, an weak hilingiti lek mene ogore, at weak hilingite iluk anggili'lagwi. An mondogat ap weak mene logolik nendawinggen mondok heiselhunem welagimo re, nelokhe nailo lekhogo legeisogo yerisa re elo'lek.

¹⁶ An nen hilingiti meneba ambisangma fano aga mene re, wenagaisogo we endebengge hak oba nen he, an he, wam singa hakhogo Haren mu'niikhi lagen. Nen, an nailoap kwelaknafi logolik he, Hat hebe homame welagen mene a'nogo inuk niikhi lagen.

¹⁷ Hat ha'mage an noba mondok hokhorogo fikhi logolik he, it afuni an weak hilingitunem ineilenggen neaga mene an noba wene fouwageluk hilingitunem an ninom wene wati lago. Haren ap sikhe fisogo mene esa ket mene logalogo an noasi wesuageluk inayonggo fikhi lagen.

¹⁸ Nenahalok Haren an o kweangma yoma ta'lasuageluk hilingnafigin? Afuni ineilenggen oan niigi lek kwelek wa'la'le'ma nen he fano agi!

¹⁹ A'nogo hilingi'le'ma nen he, an nagaisa alabutmo nen pikhit salnobagai lelepma re, an he, ap o kweangma yoma ta'lagagi lek mene hak hilingik logoile mene e.

²⁰ We horok eil misik wela'luk he wa'lasigin hilingi'mo re, an namu nek logoiyogen heraknobagani, nenggi we endebengge yaba fanorogo logoiyogen he.

²¹ Eil misik wela'luk he an nebe mondogat lagainmo re, nekhengge nambotkwe lagokhogo wesigin lek, o kweangma mondok mum hikhak se'ma andoma lagain.

²² O hik weak hilingi'mo mondok nong-hongsekma andoma re, o selek werek oba nen he selek a'nogo mum hangge hilingi'mo andoma lagain,” iluk ikhi laga.