AMSAL 8 - Allah Wene Fano Wene Hupla Inane

Endawinggen kagalek mene nen ane hokhoba komorinaferek wene

¹ Hebelek mene nen ane hokhorogo humerik lagunem he, endawinggen kagalek mene nen ane legeri'lago andi holini!

² At ebe punukwe kwe esanggoma andoma inom, kwe handogalma andoma inom mendek werek.

³ Leget pa'leget ambe palek kwe inom, o kota kwagarek oba andoma inom logolik ane ugu mene holharek.

⁴ Aren ikhi logolik he,” Hit afuni mondogat hinoba an nane humeti lagi o, hit hinebe lombok o kweangma welagep mene hinoba, an nen hineluet fikhi lagi mene andi futfikhi logoni o!

⁵ Hit hinendawinggen oan wenggelek lek welagep mene re hinendawinggen wenggelasuageluk yanggulikhi logoni, nen hit futfou elo'lek mene re hinelu asuageluk futfikhi logoni.

⁶ An nane igirek mene andoma re wene mondok elonggoma mene inom, higithogo hilingitarek mene inom ikhi lagimo re, an nen ikhi lagi mene andoma futfikhi logoni o.

⁷ Ineranhogo wene lalinafarek mene andoma re an he nabit welagi andi nen he, nane ikhi lagi mene andoma re eberogo mene nek ikhi lagi o.

⁸ Wene an nambeba nen komorinafirek mene andoma mondogat he weak kwanirek mene ekhe werek lek. An nane igirek mene andoma mondogat he higit mene nek igirek.

⁹ It afuni ekhe inungguloak kwe hurik mene inom, inungguloak lebelek mene inomen he, an nen komorinafirek wene andi, ”Eberogoat ikhe,” iluk futfigik, tukumet figik, ugun o.

¹⁰ Uang perak andiba inom, emas ebe mene andiba inom, we endebat hangge wanhi logogun meneat he, wene an nen komorinafirek wene andi inom, yi wene ti wene inelu agaikharek wene andi inom enek he, mondok hokhorogo wanhi logoino o.

¹¹ Endawinggen kagalek mene andi re permata onggo hokho meneat he, we maben hak. Nen hiren yi mene ti mene hinamolo mene andoma inom higirabesumo re emberek higitsek lek.

¹² Awenggelek mene andi re an aro. Yi wene ti wene inelu agarek andi inom, inobabut hebelagarek andi inom, yi wene ti wene futfagarek andi inom mondogat he, an noba nek werego.

¹³ Tuhan ebe inailorogo welagaikharek andi re, weak hilingitarek mene inabit welagaikharek andi aro. Inonggwaregen fogerakhagarek andi inom, ”It ekhe elo'lek, an enek he, esin,” iluk anggagarek andi inom, inobabut weak hilingitarek andi inom, ineranhogo wene lalinafarek andi inom, an mondok nabit isigirego.

¹⁴ Komo wene inom, walhugungge inom andoma re an noba nek werego, fut fugungge inom, inomame agarek mene inom andoma re an nobaat werek.

¹⁵ An nen he, afuni inogogwi inenupogot logolik, ferinarek logouwagaluk leberisigik, it ap kaindek inomame werek mene wene tegeti logouwageluk leberisigik, igirek.

¹⁶ An nen a'nogo leberisugunem he, afuni inogogwi kaindek inom, inenu werek inomen, afuni inawe a'ma ferinarek logolik wene inoba figik, kotik, elogat agarek andi.

¹⁷ Afuni ekhe nen, an inendawinggen hundik halok, an nen it inoba nendawinggen hundik welagiregaro. An hera'nabik noba wesugun halok, an nebe ninom ambi asugun aro.

¹⁸ An noba re inenggi werek welagaikharek andi inom, agaugwerinafarek mene andi inom, inebe fano liokhogo welagaikharek andi inom, foukhogo werego.

¹⁹ An nen wokhetunem helegendek mene andi re perak mondok fano mene inom, emas ebe fano mene inom, andoma re onggo endebat elo'lek hangge meneat he, an nen wokheti lagi mene andi nek he, mondok esin mene o.

²⁰ An he, kwe higithogo lagaikharek andi hak, nobabut higithogo hilingitik, pikhithogo lagik, igirek andi.

²¹ Afuni an inendawi mene andi re, an nen inenggi werek hilingisogo fisigik, inangge yi mene ti mene hokhorogo inaiba peterogo fisigik, igirego.

²² Attak Allah nen yi mene ti mene elalhi'lek logolik, an tak elalnafikhe. Afuni nen inagainafuri manggusa taginafarek andi hak, Aren attak elalhikhe mene re, an nebe aro.

²³ O eroma kweang oan elalhi'lek logolik, attak-attak he an tak elalogo nobagasikhe andi.

²⁴ I laut hokho yenggelek mene andoma oan elalhi'lek were'ma, i elesi-elesi andoma oan fulogoum esi wagi'lek were'ma, an tak ta'lagagi.

²⁵ An nebe re, tom uan mene inom horok mene inom, wolongsek logouwageluk oan menogo figi'lek werek kwelek, ta'lagagi.

²⁶ Tuhan nen kweang ari inom, engga o lei oma mondogat inom elalhi'lek werek kwelek, nen kweang attak-attak mene logoumhogo elalhi'lek werek kwelek, attak-attak he an tak ta'lagagi.

²⁷ O pogot tiaganhogo fugunem inom, pogot a'ma i laut ambolkwe tulem honggole'ma oma fugunem inom,

²⁸ andi nen At Tuhan nen ohena pogot huli warek oba logouwagaluk figik, i laut hokho mene mondogat elesi wulagaisogo liabi wesuageluk hilingitik,

²⁹ isikhesik, i laut yenggelek huli warek mene ambe heilanghogo wulifi logoinogo iluk yagatik, isikhe andi an neilhanem aro. Nen, kweang tik watikhe andi re an nebe werek kwelegat.

³⁰ An he At era'lu amlogo endawi hundik mene welagagi, an nebe re linggene hundik-handik he At endawimo agaiyekhogo werek mene aga lagagi. at elokhoma andoma hundik-handik fulu wanhu welagi.

³¹ An he At anggweang amboloba nagaiyekhogo welagirek, afuni inanggele'ma andoma inoba liogeratu mene elagirek.

³² Andi faget he, hit ap alage mene yi sani! An nen wene fano wene komothinafirek mene andi, hinendawinggenma waluk higithogo hilingiti logoino o. A'nogo hilingiti logogun halok ambisangma fano logogun o.

³³ Wene an nen komothinafi lagi mene andi hinendawimo seramet fuluk herakfisigi'lek, hinendawinggenma waluk he hinobabut hebelek mene hilinglaga logoino o.

³⁴ It afuni an nane hologo hilingisuogoluk hundik-handik an nawi kweba hurek welagik, an welagirek oba leget pa'leget ambe pale'ma andoma kagalek welagik agarek mene andi re, inendawimo inagaiyek anggikhi logouwak.

³⁵ Ap sa nen, an hera'nabigin halok he, inebe inelugerinaferek mene eise asugun o. Eise asugun andiba re, neisena Tuhan nen at ebe oba liok igin o.

³⁶ Nen, sa nen, an nebe wo'nafe lek halok, at andi nongasigin. Nen, ap an noba abit mene halok, wa'lagaikharek mene andi eise agasik werego,” iluk isikhe.