AMOS 7 - Allah Wene Fano Wene Hupla Inane

Tuhan NEN WENE INOBA FAGAIN MENE AMOS ABIKANGGOBA YETHASIKHE WENE Pulue nen hilingitunem hasikhe re yi'nogo:

¹ An nabikanggoba Tuhan Lego Mondok welagarek mene a'nogo nen yaganetunem hasigi mene re yi. An neilenggen hugunemen he afuni nen engga it afuni Israel mene inoe raja faget paletasik oba nen, engga hobuk ambotkwe lagagu kwelek andem oba, At Allah nen pulue yonggo palek esa logalek mondok hokho-pokhorogo elalogo fugunem yethigi.

² A'nogo elalogo fikhemo, it pulue omanogo nen yi engga ti engga kweangma wilibik mene omanogo mondok felelenghogo nunggunem yethigi. A'nogo yethigirik, an nen he mel yagati: ”Neisena Tuhan Hebe Lego mondok welagen mene. Hagainafuri yi it inebe mondogat mage nen inomame ogore lebelek hilingi'mo iren hambuget ha re mondok elo'lego. Andi nen he, it hagainafuri nen weak hilingita mene andi re sagalogo legetfisan o, neisena,” iluk ayonggo figi.

³ A'nogo ayonggo figimo, Tuhan nen hilingisigin iluk endawimo anggasikhe mene a'nogo agam etesik he mel yaganete: ”Hat heilenggen hegen mene andi re ebe asigin lego,” iluk yaganete.

Allah nen afuni Israel mene enduba inoatunem yethasikhe wene

⁴ Hobuk an nabikanggoba re At Tuhan Lego Mondok welagarek mene a'nogo nen yi'nogo inuk niikhe. Aren he againafuri endu oba unggum inoba feigiluk mondogat fik-foukhogo hilingfikhesik were'ma higi. Endu andi nen he kweang a'ma i yenggele'ma ma'lima amulok yelang melang ninggi logolik he, kweang elema inom, yabukwe inom mondogat endu nen nunggunem yethigi.

⁵ A'nogo yethigirik mel yagati: ”Neisena Tuhan Lego Mondok welagen mene, endu andi re fasi wagi'lek, herakfeino o! Hat hagainafuri Israel mene inebe endep inomame mondok lek hilingi'mo re, iren ninggi'nogo hambuget haluk logou hak nogo? Elo'lego,” iluk igi.

⁶ A'nogo igimo, Tuhan endawimo ebete mene a'nogo agam etesik he mel yaganete: ”Hat heilenggen yethegen mene andi ogore, ebe asigin legaro,” iluk yaganete.

Hele ilirengge ninghogo pelabek were'ma yethasikhe wene

⁷ Tuhan nen a'nogo yaganetesik, amu mene ekhe hilingitunem nabikanggoba yethigiat. Neilenggen a'nogo yethigi re, at ebe leget pa'leget hele helebenggen oba kelogo higithogo wurik mene era'lu mendek welaga. Mendek logolik, at enggimo yo lalek ilirenggetu mene a'nogo senek logolik he, leget pa'leget higithogo waganega? Lega? Iluk ilirenggetunem yethigi.

⁸ A'nogo logolik mel yaganete: ”Amos. Hat heilenggen yethegen andi nena mene yethegen nogo?” iluk yaganetemo, an nen he, ”Hele ilirengge ninghogo pelabek were'ma yethigi o, neisena” iluk yagati. A'nogo yagatimo, Aren he, ”An nen hele ilirenggethugu meneba wanhirik hilingiti yi re, An nagainafuri inebe re leget pa'leget kwanirek andi hangge, iluk walhigik hilingiti lagi o. Nen, An nen hilingisigin mene iluk melalogo figi mene andire agam eti'lek, ibi-eberogo nenat wene inoba feigiluk hilingiti o.

⁹ Ap Ishak en tagomangge mene nen tugwi kembu obaget hilingitarek kwe andoma re hobuk wolelenggenhogo potfisigik, afuni Israel mene nen, mondok wesama iluk agarek kwe andoma re meisalogo potfisigik, igin o. Nen, at raja Yerobeam en tagomangge mene inebe mondok leget fisigik igiluk karok nenggim wanhik, igin aro,” iluk yaganete.

Amos ap Amazia emberek wene palhukwa wene

¹⁰ A'nogo isikhemo, ap Amazia o Betel oba andoma imam welagaikhe agun a'nogo nen ap ekhe inayonggo fesikhesik wene afuni Israel mene inoe raja Yerobeam yagasi loageluk mel isikhe: ”Noe. Ap Amos nen he afuni Israel mene inom inane lambulhasik, neisena hat weaget habi wesuogeluk inane arat agama o. Nen, at aneba afuni inendawimo kagali'lago mene andomaba nen he o kweang nit welago mene yiba weaget lasigin o.

¹¹ At ane ikhi logolik he, Neisena hat hebe re weim ambisangma nen wa'lasigin, nen afuni Israel mene mondogat he it inaiba herakfisaluk o yatma andoma hele warogo lakninobagagin iluk ili'lago,” iluk yagasi loageluk lakfisasikhe.

¹² A'nogo lakfisasikhemo at Amazia nen Amos yagati logolik, ”Hat Allah ane yagaisikhi lagen mene yi re. O Yehuda lan o! Lambik he, o andoma wene yagaisikhi logoino o. Nen, hat nunggu mene faget he iren wokheti logouwak.

¹³ Oba nen he o kota yomaba re, raja faget inom nen wene afuni at a'ma welagaikharek mene nen kabogeri'lagwi kwe nek hilingi'mo re, hat he o Betel yoma nen wene ekhe yagaisikhi logogin lego,” iluk wenagetikhe.

¹⁴ A'nogo wenagetikhemo, Amos nen onggo mel isikhe, ”An nebe re, ap Allah ane yagaisikhi logouwageluk mennobagaikhe mene re lego. An he we wam domba konhik, e ara enggen palhik igirek mene o.

¹⁵ A'nogo meneat he, Tuhan nen an neabu a'nogo hilingitunem nayonggo fikhesik, ane afuni Israel mene yagaisoageluk noba fikhemo o.

¹⁶ Arigini'mo re, Tuhan nen hat yi'nogo hilingi'nogen iluk yagaheri'logo mene andi hesanggo fanorogo holin o. Andi re haren an wene yagaisikhi logolik it Israel mene nen hilingiri'lagwi mene andi faget wenagisugu kwelek kwe palnafi lagen enggere.

¹⁷ Tuhan nen ikhi logolik, hat hagwe re yanani hilingirik nugu mene hilinglasimbik, o kota kwe andoma yugunat hilingirik nikhi logogin. Nen, hat hagainafuri re inebe weim oba nen enek inoasugun. Hat hanggweang he ap amu mene inoba sumburisogoin, nen hat hebe re o kweang afuni Tuhan inonggot mene were'ma andoma nen wa'lasigin o. It Israel mene re inawi eroma nen yatma andoma woginapluk lakfisa logoin o,” iluk wenagetikhe.