AMOS 1 - Allah Wene Fano Wene Hupla Inane

¹ Ap Amos andi ebere domba konhi lagaikhe mene awi o kota Tekoa agun welagaikhe. At ebere it Yehuda meneba andoma hun Uzia raja logolik melalinafu kwelek, nen it Israel mene re raja Yerobeam hun Yoas amlogo a'nogo logolik melalinafu kwelek andem oba Amos ebe nabi menlagaikhe. Menlagaikhesik tahun pire wela'luk o lugul oan langhigi'lek werek kwelek, At Allah nen he Amos oba afuni Israel mene inobaget wene yagatikhe.

² A'nogo yagatikhemo, at Amos nen isikhe mene re yi, ”Nineisena Tuhan ebe andom Sion oba logolik, ane kweri'lago. Nen o Yerusalem logolik, ane unggunggu ane hangge pak ili'lago. A'nogo ugunem, o leimo wam fisogo welagaikharek oba engga mondogat puk agik, engga tom Karmel oba welagarek mene mondogat sawet agik, ikhe o,” iluk isikhe.

Allah nen it afuni Israel meneba nen it o amu-amukwe welagaukwa mene wene inoba fagain iluk yagaisasikhe wene Siria inap faget isikhe wene

³ Nineisena Tuhan a'nogo isikhesik, ekhe afuni Siria mene faget mel isikhe: ”It afuni o Damsyik welagaikharek mene, hundik-handik weak hilingitu werek andi nen he, An nen kamo igi'lek eberogoat wene inoba fagain o. Iren he, afuni Gilead mene inebe inendawirinafi'lek inoba enggin-fenggin fisugu mondok werek,

⁴ andi nen he ap raja Hasael aiba andoma endu lakfei wagik, nen raja Benhadad en aleget pa'leget waganek mene andoma endu fatik, igin o.

⁵ O Damsyik kwe ambe palek hokho mene andoma An nen mondogat weaget fisigik, afuni o Awen tonggoma welagaikharek mene andoma, inebe werek oba andoma nen felelenghogo mugusogo wulakfisigik, igin o. At Bet-Eden along welagarek agun andi re at ebe hurek welagarek oba nen An nen pelabi wagik, nen afuni o Siria welagaikharek mene hele warogo woginarek o Kir kweang oba andoma loageluk hilinginafik, igin o,” ikhe isikhe.

Filistin inap faget isikhe wene

⁶ Tuhan nen ikhi logolik he: ”It afuni o Gaza werek mene nen he hundik-handik weak enek hilingitu weregen he, ibi-eberogo nen An nen unggum inoba fagain o. Iren he afuni inunggulenu misik mene ekhe inebe felelenghogo woginarek lagaikhasik he inamingmingengge mene hakhogo afuni Edom mene inoba onggo palaga.

⁷ A'nogo hilingita andiba re, An nen endu o Gasa leget pa'leget wurik oba lakfei wagik, nen himbirengge wurik mene andomaba lakfei wagik umo re endu nen mondogat nagain o.

⁸ Afuni o kota Asdod mene inom, inoe kain enu werek mene inom nen Askelon mene inom he, An nen higilogo ale'ma fisagain. Nen, kota Ekron he An nen wene inoba fikhi logolik, afuni Filistin mene fena ineluk werek mene andi mondogat, inebe legetfisigik, igin o,” iluk ikhe isikhe.

Tirus inap faget isikhe wene

⁹ Tuhan nen ikhi logolik he, ”It afuni o Tirus inap he hundik-handik weagenek hilingitu weregen he, eberogo An nen unggum wogisagain o. Iren he, afuni inunggulenu misik mene ekhe hele warinarek lagaukwasik he afuni Edom mene inoba wogisasukwa, iren he wene inom inane misik wata mene a'nogo taganhogo hilingita andi.

¹⁰ Andiba re, An nen he, o Tirus leget pa'leget waganek mene andoma bene endu lakfei wagik, iren himbirengge wurik mene andoma endu nolhik, igin o,” iluk ikhe isikhe.

Edom inap faget isikhe wene

¹¹ A'nogo isikhesik Tuhan nen ikhi logolik he, ”It afuni o Edom inap he hundik-handik weagenek hilingitu weragen he, eberogoat An nen unggum wogisagain o. Iren he inendawirinafi'lek engge it inagaila'lak Israel mene a'nogo inoasi kwisukwa. A'nogo hilinginafukwasik he iren ina'mage inoba fikhi logolik inendawirinafi'lek sebelinarek welagaikha andi.

¹² A'nogo hilingitukwa andi nen he, An nen endu o kota Teman lakfei wagik, nen o Bozra leget himbirengge waganek mene omanogo bene lakfei wagik umo, endu nen nagain o,” iluk ikhe, isikhe.

Amon inap faget isikhe wene

¹³ Tuhan nen ikhi logolik he, ”It afuni inunggulenu Amon mene re hundik-handik weagenek hilingitu weregen he, eberogoat An nen wene inoba fagain o. Iren it inaiba wilayah omanogo hokhorogo wialasuageluk hilingiti logolik, iren hemi o Gilead hemi ineagwi ina'ma mene inalabut pelanghigik inoata andi.

¹⁴ A'nogo hilingita andiba re, An nen endu o kota Raba leget pa'leget waganek meneba lakfei wagik, iren himbirengge wurik mene andoma endu fatik igin o. Andem sambul he, ap weim yafi logolik inane hokhorogo sup ugunem inane inesanggo holhik, weim sogoi hokhorogo funha wagarek andi hak anini weak mondok yafunem isigik, ugun o.

¹⁵ A'nogo yafi logolik, it inoe raja inom, agoromi kaindek inom, inenggi hele warogo fisa lagaikharek oba andoma woginarek logoin o, iluk An Tuhan nen nane arat igi o,” iluk isikhe.