2 YOHANES 1 - Allah Wene Fano Wene Hupla Inane

Hai warinafikhe wene

^1-2 An hinoe Allah againafuri kwelakhinarek logouwageluk aren mennobagasikhe mene a'nogo nen, hit Allah againafuri takhinafikhe mene halok hinebe re, he misik ekhe ebe Allah nen wenatikhe mene eagwi inom wene yi hai warogo lisu palogo hinoba lakfei wagi o. Hinebe eberogoat nendawi o. An nalegat hinebe nendawi welagi fuk. We, it ekhe ninom ebe wene yogondak inendawimo wanhasik hobuk inom mondok-mondogat logogin mene andi inelu agaukwa mene nen ogo re inendawithinafa aro.

³ Andi nen, nerugwi nagaila'lak. Nit ebe wene wanimbik, nit-nit nendawi-hendawirogo were'ma, nineisena Allah amlogo Yesus Kristus emberek inobabut fano a'nogo nen fano mene wo'nisigik, inendawitninafik, ninendawinggen hambugetninafik, ikhi logouwago.

”Yesus nen wene eroba yaganisasikhe wene oba louksek hilingitu mondok logogun,” iluk yagaisasikhe wene

⁴ Hit hinebe re, he misigat mene eagwi hangge logolik, hinebe ekhe nineisena Allah nen ebe wene komotninafikhe a'nogo higithogoat hilingiti lagep mene hinobabut palhirik, nendawimo nagaiyek hokhorogo hikhi lagi o.

⁵ Andi nen he, nerei e. Wene ket mene lisu palogo heagwi hinomat were'ma hinoba lakfei wagi fuk. Lego. We, nit ebe wene andi futfesugumo at Allah nen nit-nit nendawi-hendawirogo logouwageluk eroba nenat komotninafikhemo ninelu mene a'nogo lisu palogo hinoba lakfei wagi andi o.

⁶ Nit-nit nendawi-hendawirogo logogun andi ebe re, wene Allah nen komotninafikhe wene a'nogo higithogo hilingiti logogun andi aro. Wene komotninafikhe andi re, ebe yi: ”Hit-hit nendawi-hendawirogo hilingiti logoino,” iluk eroba nen komotninafikhemo holhugu andi hagat hilingiti logoguno.

⁷ A'nogo hilingiti logogun andi re, it afuni inebe hokhorogoaren, ”Yesus Kristus andi abat ta'lasi wagi'lek,” iluk, lalinafarek mene inebe weinam agaikhasik kweangma o yi awi ti awi mondogat sagarek andi nen, nendawi-hendawirogo hilingiti logogun igi andi o. It andi inebe re, Kristus inom mondok weak logolik afuni lalinafarek mene a'nogo aro.

⁸ Nen, niren hit hilinghinobagakhi lagagu a'nogo faget, hit ekhe onggo wanhi'lek nong asinogo iluk, mondogat wanubagaigen he, hinobabut hebelogo logoino. Logolik he, Allah nen, ”Hit onggo wokhisagain,” iluk wene wa'nisasikhe a'nogo, hit ekhe nong agi'lek mondogat helobagaigen he, hinomamerogo hilingiti logoino o.

⁹ Ap sa nen wene Kristus nen yaganisasikhe wene andiba louksek hilingitu welagi'lek, hunogoat mene hilingiterek halok he, Allah ebe eisewerek agi'lek werego. A'nogo meneat he, ap sa nen wene Kristus nen yaganisasikhe wene andiba louksek hilingitu logogin halok he, nineisena Allah inom, amlogo Yesus inom, emberek eisewerek agaikhasik werego.

^10-11 Afuni ekhe nen wene Kristus nen yaganisasikhe wene lek, we, hunogoat wene yagahisa wagunem, ap sa nen afuni inobabut ariginik mene hai warogo aiba wanhunem he, at obabut weak hilingiterek mene andi obabut helikherek andi nen he, hiren afuni inobabut ariginik mene hai warogo hinaiba woginabugun mondok lego.

Wene wurep kobokhogo hai warinafikhe wene

¹² Wene hokhorogoat hinoba lakfei wesu mene werek meneat he, suesingga lisu amusuba palu re, nabiro. We, ninendawimo ninagaiyek hikhi lago mene andi ebenagaik ninagaiyek houwogeluk he, ninom misi'mo weneane ninelhaba yet-yet uogeluk, an nebe hinoba wesigin anggikhi lagi o.

¹³ He ekhe Allah nen wenatikhe mene, eagwi nen inagaisahe ebe hai wasu hak, it Allah againafuri yoma mene nen he, hit hai wathinafa o.