2 TESALONIKA 3 - Allah Wene Fano Wene Hupla Inane

”Samban nit faget ikhi logoino,” iluk yagaisasikhe wene

¹ Nerugwi nagaila'lak. Wene wurep oba ekhe yi yagahisak. Ninoe Enupogot ane weak-weak wialagasik hit were'ma andoma wagaikhemo fano wanhigip hak, a'nogoat wialarik lagunem it ekhe nen fano wanuageluk, nit faget samban ikhi logoino.

² It afuni mondogaren: ”Wene andi eberogoat,” iluk wanha mene nek werek fuk. We, it ekhe wanhi'lek mene inobabut kwanirogo hilingitik inobabut weak hilingitik, ili'lagwi mene nen, weaget ninabuogeluk ugunem Allah nen telninafi logouwagen he, nit faget samban ikhi logoino aro.

³ Menere, ninendawinggen ninoe Enupogot oba himbiret fugunem, ninane hologo hilingiterek mene a'nogo nen hinendawinggen wuriget hinafi logolik, at obabut mondok weak mene a'nogo nen weaget hinabigeluk ugunem fethinarek logogin andi nen, hinendawinggen at oba himbiret fuluk logoino o.

⁴ Fethinarek were'ma, nit ninendawimo nen he: ”Iren he, niren it komorinafi lagagu mene a'nogo, yogondak higithogo hilingitik, hobuk a'nogo hilingitik, ikhi logoguno,” iluk ninoe Enupogot ninom hundik logolik, eberogoat anggikhi lago.

⁵ Hit hinendawimo nen he: ”At Allah nen he nit ninebe endawi hundik werego,” iluk fut figik, hinobabut Kristus ebe hombunhogo hilingiti lagaikhe hak, obabut waganogo ekhe inomat hokhorogo hilingiti logobagaigen, ninoe Enupogot ebe hinendawirogo logolik, hinendawimo ebethisikhi logouwago.

Inonggwarek ineabu inenggi nenat waganogo ninggi logouwageluk yagaisasikhe wene.

⁶ Nerugwi nagaila'lak. Hit hinerugwi hinagaila'lak ekhe Allah amlogomi meneat he, wene niren komothinafugu a'nogo hologo hilingiti'lek herakfisaluk inenggi wanhi'lek winikwonokhogo nikho mene andi hinom hundik logogubo.

⁷ Nit he, hit ninom logolik ninenggi weat welagi'lek, ninaberali weak ekhe hilingiti'lek ikhi lagagu a'nogo, hiren nit ninobabut waganogo hilingisugun andi re hinonggwarek hinelu o.

⁸ Niren he, sumburu hit hinoba ekhe onggo palhi'lek weat ninggi lagagu legaro. We, hit ekhe hinoba seget weak hikhi logoinogo iluk, nit linggene hubanggo nen mondok set kwil-kwalhogo ninonggwaregenat ninomamerogo hilingfuluk onggo palogo ninggi lagagu andi.

⁹ Niren hit hinoba kino yagahisa higit meneat he, hiren nit ninobabut wanubagaigen iluk, kino igi'lek ninonggwaregen a'nogo hilingiti lagagu andi.

¹⁰ Nit attak ninom logolik yagahisikhi logolik he: ”Hit ekhe yabu wanhi'lek inobabut winik-wonok nikho mene andi, sumburu ninggi'lek weat logouwak,” iluk, yagahisikhi lagaguat anggigi.

¹¹ Wene a'nogo yagahisasugu meneat he, it ekhe nen he: ”Afuni it mene ekhe inonggwarek ineabu meneat heligi'lek logolik, it ekhe inawene meneat talombogenggerogo ilik nikho,” iluk yaganisagama ninesanggo holhosigen yagahisogo andi.

¹² Niren he, afuni hit mene inobabut a'nogo hilingiri'lagwi mene andi, ineil lomborogo logolik, inonggwarek inenggi nenat yabu waganogo inamburu meneat ninggi logouwageluk ninoe Enupogot Yesus Kristus ninom hundik logolik, aren ikherek mene inendawimo kagalogo komorinafo andi.

¹³ Nerugwi nagaila'lak. Fano mene hilingiti logolik, hinaberali agi'lek hilingiti logoino o.

¹⁴ Wene lisu palogo hinoba lakfei wago mene andi, it ekhe nen inesanggo hologo hilingisu inabit mene andi, inenggali asuageluk it inobabut a'nogo hilingiri'lagwi mene andi futfuluk he, hinom hunetfuluk logogubo.

¹⁵ A'nogo meneat he, hinom weim kagalek hak hilingiti logogubo. ”We. Ninerugwi ninagaila'lak Allah amlogomi meneat,” iluk, fanorogo komorinafi logoino o.

Wene wurep kobokhogo hai warinafikhe wene

¹⁶ Ninoe Enupogot ninendawinggen hambuget ninaferek mene a'nogo onggwaregen yi mene ti mene faget hinendawinggen hambuget hinafu mondok logolik he, hinebe mondogat fethinarek logouwago.

¹⁷ An nen wene mondogat lisu palhi logolik: ”At Paulus nen palhemo higi,” iluk, enegat fut fouwageluk, wene wurep kobokhogo hai wathinafi logolik he, nonggwarek nenggi nenat palhirek a'nogo hak, yogondak yi hai wathinafi logolik palhi mene nenggi enegat andio.

¹⁸ Ninoe Enupogot Yesus Kristus obabut fano a'nogo nen, hit mondogat fanorogo fethinarek logouwago.