2 TESALONIKA 2 - Allah Wene Fano Wene Hupla Inane

Kristus wagi'lek werek kwelek, at obabut mondok weak mene a'nogo weinam asigin oba hilingisugun wene

¹ Nerugwi nagaila'lak. Ninoe Enupogot Yesus Kristus ebe wesimbik he, at ninom misi'mo logouwogeluk andogetninabi wesigin andi faget, ekhe inom komothinabik.

² Ninoe Enupogot wesigin andi sambul arat hilinglagama iluk, it afuni ekhe nen he: ”Allah Areagun en yi'nogo yaganete meneat,” iluk yagahisigik, it ekhe nen: ”Wene ebe yi'nogo meneat,” iluk yagahisigik, it ekhe nen, wene niren lisu palho mene faget: ”Ebe yi'nogo meneat,” iluk yagahisigik ili'lagwi andiba, hinendawinggen weak-weak nonghong imbik leil watep hanogoluk yagahisigi andi.

³ Afuni ekhe nen: ”Allah ninabit,” iluk, herakfisaluk wulipluk at obabut mondok weak mene hobuk Allah nen endumo lakfisagain mene a'nogo weinam agik, a'nogo tak hilingisugun andi nen he, it ekhe nen yi'nogo igik, ti'nogo igik, ikhi logolik, lalhinabugun he, nabit.

⁴ At andi ebe weinam asimbik, Allah awi wuri'mo menlasi kwimbik he, onggwaregen fogerakhikhi logolik yi'nogo igin: ”Afuni nen, yi mene ti mene oba himbirik logolik fogeratarek mene inom, hineisena ebe yi, iluk agarek mene andi mondogat inom, elo'lek enek meneat he, esin allah nebe an aro,” iluk ikhi logogin andi.

⁵ Mondogat a'nogo hilinglasigin andi faget, an hit ninom logolik yagahisikhi lagagi a'nogo hinendawimo eberek lek welagep nogo? Eberegat welagep anggikhi lagi.

⁶ At obabut weak mene ebe wagi'lek werek andi, ekhe mene nen sebelek werek, iluk hineluaro. Sebelek were'ma, at Allah nenat: ”Weinam asuak,” iluk igin higithogoat weinam asigin aro.

⁷ Menere afuni ekhe nen: ”Allah ninabiro,” iluk herakfisaluk wilibimbik inobabut weak hilingisugun mene, yogondak hinagaisogo hilingiri'lagwi aro. Menere at ekhe nen, at ekhe nen fetaluk werek mene andi Allah nen wokhamo re,

⁸ at obabut mondok weak mene a'nogo weinamhogo wesigin. Wesimbik he, weak hilingitu were'ma, ninoe Enupogot Yesus fogeratu kwelek hobuk waga logolik eleage nen furogo ebe warogo mondok leget fisagain.

⁹ A'nogo leget fisagain mene oan werek kwelek he, at obabut mondok weak mene a'nogo, Iblis nen omame wogosumo afuni nen fogeratik, at oba ebetik, uageluk, yi mene ti mene hilingisu lek mene eberogoat iluk elalinat hilingiti logogin.

¹⁰ A'nogo hilingiti logolik he, ebe wene andi afuni inamolo nen wanumo Allah nen telinabu meneat he, at obabut weak mene a'nogo nen lalfalhogo hilinginafunem, iren he: ”Ebe wene andi ninabiro,” iluk, ikhi logogun andiba weagerinabigino.

^11-12 It afuni andi nen ebe wene eberogoat iluk wanhi'lek logolik: ”Weak mene andiat ninamolo,” iluk hilingiti logogun mene andi, inebe mondogat Allah nen wene inoba fuluk weagerinabigeluk he, nongerinaferek mene omame werek mene ekhe lakfei wesigin. Lakfei wesumo, eranen igin meneat he, eberogoat iluk wanugun andi.

”Hit Allah nen telhinabigeluk wenakhinafikhe,” iluk yagaisasikhe wene

¹³ Nerugwi nagaila'lak. Hinebe ninoe Enupogoren endawi werego. Eroba Allah nen hinebe telhinabigeluk wenak hinafikhemo, hiren ebe wene andi eberogoat iluk wanhik, nen, hinebe Allah Areagun en Allah onggwarek faget fakhaluk tegelogo hinobagagik ikhi logogun andiba telhinabigin andi nen, nit Allah hai wasugun higithogoat hit faget hai watu mondok welago.

¹⁴ Ninoe Enupogot Yesus Kristus fogeratu mondok welagaikharek hak, hit a'nogo hinom fogethinabuageluk, Allah nen fano wene niren yagahisa wagagu andiba hinayonggo fesikhemo welagep.

¹⁵ Andi nen, nerugwi nagaila'lak. Wene niren yagahisikhi logolik ninaneba nen yagahisigik, lisu palogo hinoba lakfei wagik, isugu mene andi, hinenggi ninghogo fisogo logolik he, hinomamerogo mendegat logoino.

¹⁶ At ninoe Enupogot Yesus Kristus, nineisena Allah inom inobabut fano a'nogo nen, inendawit ninafukwasik, ninendawinggen abolok lek mondok logouwageluk ago watninobagagik, fano asigin iluk oba eberek logouwageluk ninendawimo kagalhik, agarek.

¹⁷ A'nogo agarek mene a'nogo nenat, hit hinenggi nen fano mene hilingitik, hinaneba fano mene yagaisigik, ikhi logobagaigen iluk, hinendawimo fanothinafik, hinendawinggen wurigethinafik, ikhi logouwago.