2 TESALONIKA 1 - Allah Wene Fano Wene Hupla Inane

Hai warinafikhe wene

¹ Hit Allah againafuri o Tesalonika andogoti logolik, nineisena Allah inom, ninoe Enupogot Yesus Kristus inom, hinom hundik welagep mene nerugwi nagaila'lak. An Paulus, Silas, Timotius inom, ninomen wene yi lisu palogo hinoba lakfei wago andi.

² Nineisena Allah, ninoe Enupogot Yesus Kristus emberek inobabut fano a'nogo nen, fano mene wokhisigik, hinenda winggen hambugethinafik, ikhi logouwago.

Kristus nen wene inoba figik, kotik, i wesigin wene

³ Nerugwi nagaila'lak. Hit hinendawinggen Kristus oba himbirik welagep mene andi, ekhe inom hokhorogo himbiret figik, hit-hit hinebe lombok nendawi-hendawirogo hilingiti lagep mene andi, ekhe inom hokhorogoat hinendawirinafik, ikhi lagep andi nen, niren hit faget Allah fogerati lago meneat fogeratu mondok welago.

⁴ Afuni nen yi enggin ti enggin hilinghinafu kwelegat he, hinafe morogo logolik, hinendawinggen Kristus oba a'nogo himbirik welagep andi nen, niren Allah againafuri o yi awi ti awi andogotarek mene hinabok yagaisikhi logolik ninalong ari'logo o.

⁵ Allah nen afuni wene inoba figik kotik higithogoat ikherek iluk enegat asigin. Hit yogondak Allah awe a'ma kuluk ane hologo welagep andi faget, afuni nen yi enggin ti enggin hilinghinafu kwelek a'nogo welagep andi nen, aren hobuk he: ”Hit an nawe a'ma kwi wesimbik hinawiwerek mondok logoino o,” iluk, yagahisagain andi.

^6-8 Ninoe Enupogot Yesus agoromi malaikat yonggo nikharek mene inom pogoroba nen inomamerogo weinam hogoat endu amulok anggele'ma pi wagunem he, Allah nen wene afuni inoba higithogo fikhi logolik, it hit yi enggin ti enggin hilinghinabi'lagwi mene, onggo higithogoat weagerinafik, nen hit yi enggin ti enggin hikhi lagep mene andi, nit ninomat ninendawimo fanotninafik, igino. A'nogo ikhi logolik he, it afuni Allah ebe inelu asu inabit logolik, ninoe Enupogot Yesus hilingitikhe wene fano wene a'nogo wanhi'lek herakfisili'lagwi mene wene inoba fagaino.

⁹ It a'nogo wene inoba fuluk he, ninoe Enupogot omame hokho mene andi nen fogeratu mondok welagaikhare'ma eilhanem andoma nenat wea'ma andoma mondogat logouwageluk lak fisagaino.

¹⁰ At wesigin andi sambul ebe wagunem he, onggwarek againafuri inendawinggen at oba eberogoat himbiret fuluk welagaikharek mene nen, at ebe fogeratik, agaugweratik, uageluk wesigin andi. Nen, niren wene andi ninelu mene fakhogo yagahisa wagagumo re, hiren: ”Eberogo aro,” iluk wanhigip andi nen, hit ninomenat, at fogerasuguno.

¹¹ At Allah nen he: ”Hit a'nogo hilingiti logoino o,” iluk, hinayonggo fesikhe hagat higithogo hilingiti logobagaigeluk, niren hit faget samban ugu mondok welago. Hit hinendawimo nen he: ”Nit fano hilingiti logoilo e,” iluk, anggikhi lagep mene andi, Allah nen a'nogo hilinghinafik, nen, hinendawinggen at oba himbiret fuluk logolik hilingiti lagep mene andi, arenat hinendawinggen wurigethinafik, at omame andiba hilinghinafi logouwago.

¹² Nineisena Allah, ninoe Enupogot Yesus Kristus emberek inobabut fano a'nogo nen hilinghinafunem a'nogo hilingiti logogun andi nen, hiren he, ninoe Enupogot Yesus enu hombuk palogo agaugweratik, aren he hit agaugwet hinafik ugun andi.