2 TAWARIKH 5 - Allah Wene Fano Wene Hupla Inane

¹ At raja Salomo nen Tuhan Awi a'nogo mondogat wut fesikhesik he, senggelek ekhe sunggwe fuguba omanogo, perak, emas inom yi mene ti mene amu mene ekhe inom eisena Daud en Tuhan obaget fesikhe mene omanogo waganogo fei kwisikhe.

Peti Tuhan nen wene warogo wo'ninafikhe mene a'nogo waluk Awi wuri'mo fei kwisukwa wene.

² A'nogo mondogat hilingfuluk he, at raja Salomo nen it afuni Israel mene inogogwi inunggulenu lombok melalinafu mene inom, it ekhe ineisok erokwe mene inogogwi melalinafi lagaukwa mene omanogo inom, peti Tuhan en wene warogo wo'ninafikhe mene a'nogo o hun Daud awi kota Sion omanogo nen waganogo o Tuhan awi wuri'mo a'nogo fei logoin iluk, o Yerusalem kabogesi wesuageluk yagaisasikhe.

³ A'nogo yagaisasikhemo re it ap mondogat omanogo linggene O Sabu wurogo welagaukwa mene oba ebetu sambul a'nogo re andogosi wagaukwa.

⁴ It afuni melalinafu inap a'nogo mondogat andogosi wagaukwama re, it Lewi inaben peti wene warek a'nogo waluk Tuhan Awi wuri'mo fei kwisukwa.

⁵ A'nogo fei kwikhi logolik he, it Lewi inap inom, it imam inom omanogo nen he, Tuhan Awi Sabu salek mene a'nogo inom, O Sabu andiba yi mene ti mene welagaikhe omanogo inom, mondogat Tuhan Awi wuri'mo omanogo nek fei lagaukwa.

⁶ A'nogo fei lagaukwama re, at raja Salomo inom it afuni Israel mene mondogat inom, peti Wene warek a'nogo elokhoma kaboget fesukwasik he, wam domba inom sapi inom mondok wenasu elo'lekhogo omanogo re Tuhan faget warogo noletukwa.

⁷ Andi mondogat hilingitukwasik he, it imam omanogo nen, peti wene warek a'nogo pia'luk he, Tuhan Awi wuri'mo kwisukwasik, o Senggelek Mondok Horek oba a'nogo no kerub alik ilirengge hilingik were'ma a'ma aremnogo fei kwisukwa.

⁸ A'nogo fei kwisukwama peti a'nogo inom, e pia a'nogo inom he, no kerub aremnogo inagerabul wuri'logo were'ma a'ma fesukwama welagaikhe.

⁹ E pia andem he mondok uansek ma re, o enda'ma nen he wurep weinamhogo welagaikhe lek, oba nen he, o Senggelek Horek Meneba a'nogo fikhiren enek he wurep weinam welagaikhe. (E andem he yogondak huli nen ogo andomaat werek.)

¹⁰ Peti Wene Warek andiba re, amu mene ekhe kwalek welagaikhe lek, we helep kagalek pire, it afuni Israel mene o Mesir en Kanaan logoin iluk ebe khalem lagunem en Tuhan en it inom wene wat-wat agaukwa mene a'nogo, Tom Sinaiba a'nogo nen at Musa nen helep kwalfesikhe mene andem enek kwalek welagaikhe.

Tuhan Along werek mene a'nogo weinam agaikhe wene

^11-14 Iren a'nogo hilingitukwasik he, it imam mondogat andoma welagaukwa mene omanogo kabogesugun nen iluk inebe fik-fouk etukwa. Nen, it inunggulenu Lewi meneba nen, wuni wulafik, pinggong watik, hilingiti lagaukwa mene, hun Asaf, Heman, Yedutun inom, it ineisok erokwe mondogat inom he inasu eil sakorek meneba ugu mene labetukwa. A'nogo labetukwasik he, it Lewi inap andi re nolhungge obalik mezbah were'ma nen abel timur fikhit aremnogo pinggong simbal inom kecapi inom, senegeisogo mendek welagaukwa. It a'nogo mendek welagaukwa mene andi inom he, it imam a'nogo inebe 120 nen, trompet futi lagaukwa inap inom mendek welagaukwa. It mendek logolik he, wuni inane lambulogo wulafik, pinggong trompet inom, simbal inom, pinggong amu mene inom, watunem he mondok misik seberek welagaikhe. Nen, iren Tuhan fogerati logolik wuni inaneba wulafi lagaukwa mene re yi'nogo: ”Tuhan andi re mondok fano. Aren endawi hundik hilinginaferek mene andi re, mondok-mondok faget hilingi'mo re, Tuhan enek fogeratu mondok logogun,” iluk ikhi lagaukwa. It a'nogo ugu kwelek it imam omanogo Tuhan Awi wuri'mo nen wulibi wagunem en he ferekhogo aremnogoat O a'nogo Tuhan ombakbagen enekhogo isikhemo re, it wene kabogeti lagaukwa mene a'nogo ekhe inom hilingirik la elo'lek hogo hilinglagaikhe.