2 TAWARIKH 4 - Allah Wene Fano Wene Hupla Inane

Tuhan Awi wuri'mo a'nogo faget fougetukwa wene

¹ Raja Salomo nen he it ap yabu hilingitu inap omanogo nen warogo nolhuba obalik mezbah a'nogo no perunggu meneba ebe uanhogo ilirenggeti logolik he nunggulik mene re 9 meter oba, nen ligabek menere 4,5 meter oba wusuageluk yagaisasikhe.

² A'nogo yagaisasikhesik he aren nekhengge waruk kweang tangge meneba pugun sek engge hak misik ekhe perunggu ba ubung-abangengge ilirengge higithogo wutikhe mene re yi, elonggo agauwele a'nogo re 2,2 meter nen, huli-huli tulem warek welagaikhe mene andi re 4,4 meter, nen ebe maserogo kwelabek welagaikhe menere 13,2 meter wutukwa.

³ Agap endakwe maserogo re no sapi ilirengge rek mene pirengge erarogo waruk ebe a'nogo inom to'mot higik wutukwa.

⁴ Waruk tangge meneba wurik engge a'nogo re, wam sapi ebe 12 nen mene, no perunggu ba wutfesukwasik, ebe henagan he elokhe utara fikhit halogo fesukwa, nen henagan ekhere selatan fikhit fesukwa, nen henagan ekhere barat fikhit, henagan ekhe re timor fikhit halogo were'ma inandugun oba hut fisasukwa.

⁵ Waruk kweang tangge meneba takhogo wurik mene andi re, ela'lagat wulimhogo wutukwa mene re 75 milimeter. Nen, agap endakwe fikhit he waruk i isatu mene punurogo wulibik hak hilingi'mo re owil-owilengge ket mumungse'ma hak hilingik welagaikhe. Waruk andiba, i re 60.000 liter nen keralasu hak hilingik welagaikhe.

⁶ At raja Salomo nen he waruk earek engge baskom hokho mene ebe 10 nen wutikhesik he, fuaben he o Tuhan Awi wuri'mo a'nogo nen abel selatan fikhit fugu mene faget, nen fuaben ekhere utara fikhit fugu mene faget wutikhe. Waruk ebe wam warogo nolengge noluogeluk senggel higik, werek mene omanogo i sobalhu mene faget hilingitikhe. Nen, i waruk tangge meneba ebe hokho mene hilingik a'nogo re it imam omanogo inebene pugun erugu mene faget fouget fesikhe.

^7-8 Andi nen he, ekhe lampu oak emas meneba inom, e meja 10 nen inom, wusugun iluk wenggelhikhe mene higithogo hilingitukwa. A'nogo hilingfesukwasik he, lampu oak emas meneba inom, meja omanogo inom he, o Tuhan Awi senggelek ekhe hokho mene a'nogoba ebe fuaben mene re, hare fikhit he fuaben nen pikhit fikhit he fuabenat fesukwa. Andi nen i nunggu mene mangkok emas mene ebe 100 nen inom hilingisogo fesukwaat.

⁹ At raja Salomo nen ogore it ap imam inobaget ambe elokhoma elonggo fikhit ekhe, endakwe fikhit ekhe hilingitikheat. Kwe sou ebe ambe pire andem oba ekhe hilingi'luk ekhe hilingi'luk welagaikhe mene andi re no perunggu ba to'morogo wutikhe.

¹⁰ Waruk kweang tangge meneba takhogo wurik mene hangge a'nogo re o Tuhan Awi wuri'mo nen abel pikhit kwe unggut tenggara fikhit andoma fesikhe.

^11-16 Hun Huram it yi mene ti mene elalhu mene faget kepala welagaikhe mene a'nogo re, aren raja Salomo inom wene watukwa aple higithogo, o Tuhan Awi faget yi mene ti mene mondok fik-foukhogo hilingfesikhe. Aren wutikhe mene andi re, kuali inom, sekop inom, mangkok inom, hilingitikhe. Nen, aren hilingitikhesik mondok fik-fouget fesikhe mene andoma ebe re yi: Timuk hokho mene ebe pire Timuk andem amboloba hut fugu mene faget obabut mangkok hak mene ebe pire wutikhe. Posiemanggen mene sep hun-hun elangegengge engge timuk andi ambisangma igisogo fesukwa. E delima enggen perunggu meneba ebe 400 erathigik mindagongge a'nogo re timuk pire aremnogo ebe lombok wurep oba masethigik fesikhe. Kereta 10 nen wutikhe Earek mene baskom hokho mene 10 nen wutikheat. Waruk tangge meneba taksek mene hangge bejana perunggu mene ekhe bejana a'nogo lego logouwageluk sapi perunggu mene ebe 12 nen wutikhe. kuali, sekop, garpu inom wutikheat. At Salomo nen wene melalfesikhe mene higithogo, at Huram en Tuhan Awi a'nogoba logogin mene iluk no perunggu meneba, yugulhigik fesikhe.

¹⁷ Yi mene ti mene andoma re o Sukot hilingi'luk Zedera hilingi'luk tulem o Yordan tonggoma andoma kweang lou lagengge hilingitunem andoma nen wusuageluk raja nen miming inafikhe.

¹⁸ Yi mene ti mene andoma re mondok hokho-pokhorogo hilingi'mo re perunggu andoma ebe enggin ti nen hakhogoba wuto, iluk ap misigen ogo ekhe inelu welagaukwa lek.

^19-22 Raja Salomo nen ogore o Tuhan Awi a'nogo faget hilingitungge elokhe amu mene emas mondok pugunsek meneba wusuageluk yagaisasikheat. A'nogo yagaisasikhemo wutukwa mene andi ebe re yi: Wam warogo nolhuba obalik mezbah inom roti enu warek fei waguba faget meja a'nogo. A'nogo hilingisugun iluk wenggelhukwa higithogo, o Tuhan Awi Senggelek Mondok Hore'ma a'nogoba elokhoma ombak bageti logouwageluk lampu posiemanggen emas mondok wuri weak meneba pugunsek mene ebe a'nogo. O elonggokwe alilingge owil-owilengge ilirenggerek mene omanogo inom, Lampu omanogo inom, fa hambongge omanogo inom, Lampu yo nunggu mene a'nogo pugun etu mene inom, mangkok inom Piring amben fano mene dupa a'nogo nolhu mene faget inom piring endu enggen kabogetu mene inom, kwe sou o Tuhan Awi wuri'mo kwi lagu mene inom, kwe sou ekhe O Senggelek Mondok Hore'ma a'nogo kwi laguba faget inom he emas oba nek to'mothigik wutikhe.