2 TAWARIKH 36 - Allah Wene Fano Wene Hupla Inane

It afuni Yehuda mene faget Yoahas raja menlagaikhe wene

¹ At Yosia a'nogo wa'lagaikhemo at obali'mo re it afuni Yehuda mene nen at Yoahas a'nogo heragaisogo o Yerusalem oba andoma raja logouwageluk menfesukwa.

² At Yoahas ebe umur 23 tahun werek kwelek raja it afuni Yehuda mene faget menlagaikhesik tugi henagan enek o Yerusalem oba andoma melalinafu welagaikhe.

^3-4 Ap raja Mesir mene Nekho a'nogo nen he Yoahas ebe fakfesikhesik, hele warogo waluk o Mesir lagaikhesik he it afuni Yehuda mene omanogo ogore at oba onggo perak mene enggin 3.400 kilogram hilingik engge inom, nen emas mene enggin 34 kilogram en hilingik engge inom, fouwageluk yagaisasikhe. A'nogo yagaisasikhesik he, aren he hun Yoahas agailak Elyakim a'nogo enu agamhogo Yoyakim salogo re, at ebe raja logouwageluk menfesikhe. Nen, at Yoahas re' hele warogo waluk o Mesir lagaikhe.

It afuni Yehuda mene faget Yoyakim raja menlagaikhe wene

⁵ At Yoyakim ebe umur 25 tahun werek kwelek raja it afuni Yehuda mene inobaget menlagaikhesik he, o Yerusalem oba andoma 11 tahun logolik melalinafu welagaikhe. Aren he eisena Tuhan Allah a'nogoba weak hilingitu welagaikhe.

⁶ A'nogo hilingitunem he at raja Babel mene Nebukadnezar a'nogo o it afuni Yehuda mene were'ma omanogo mikha kwi wagaikhesik he, at Yoyakim a'nogo enggi hele warogo waluk he o Babel lagaikhe.

⁷ At Nebukadnezar en he yi mene ti mene mondok fano mene o Tuhan Awi wuri'mo werek mene omanogo fenakwe helaluk lagaikhesik he at onggwarek ebe were'ma o istana Babel oba omanogo fei lagaikhe.

⁸ At Yoyakim obabut mondok weak hilingiti lagaikhe mene inom, kwanirogo hilingiti lagaikhe mene inom he, buku it raja-raja Yehuda inom, Israel mene inom, en hilingiti lagaukwa mene tindelogo palek mene a'nogoba mondogat palogo fesukwama werek. At obali'mo re at amlogo Yoyakhin a'nogo raja menlagaikhe.

It afuni Yehuda mene faget Yoyakhin raja menlagaikhe wene

⁹ At Yoyakhin ebe umur 18 tahun logolik afuni Yehuda mene inobaget raja menlagaikhesik he, aren o Yerusalem oba andoma tugi henagan inukhogo re enggi 10 hari ekhe inom melalinafu welagaikhe. Aren ogo nekhe aple Tuhan oba weak hilingiti lagaikheat.

¹⁰ Tahun ket mene kugu kwelek he, at raja Nebukadnezar en he Yoyakhin a'nogo hele warogo waluk o Babel laga logolik he, o Tuhan Awi wuri'mo yi mene ti mene onggo mondok hokho mene welagaikhe mene omanogo inom mondogat waluk lagaikhe. At Nebukadnezar en he Zedekia Yoyakhin oe a'nogo it afuni Yehuda mene inom, Yerusalem mene inom, inobaget raja menfesikhe.

It afuni Yehuda mene inobaget Zedekia raja menlagaikhe wene

¹¹ At Zedekia ebe umur 21 tahun were'ma it afuni Yehuda mene inobaget raja menlagaikhesik he o Yerusalem oba andoma 11 tahun logolik melalinafu welagaikhe.

¹² Aren ogore, eisena Tuhan Allahba weak hilingiti lagaikheat. Nen aren he Tuhan nen ugu mene nabi Yeremia nen yagasi waga lagaikhe mene omanogoba furogo hilingiti'lek, endawimo sebel fakhigi'lek hilingitu welagaikhe.

Yerusalem ap amu mene inenggiba agaikhe wene

¹³ At raja Nebukadnezar en Zedekia ba limiti logolik he, ”Hat hoba tiphogo hilingiti logogin, iluk Allah enuba hombuk palin o,” iluk yagatikhe. Oba nen he at Zedekia nen he Nebukadnezar ane oak sagal fuluk hilingiti lagaikhe. At Zedekia nen ogore aweak omanogo herakfuluk ambotkwe sugulogo Tuhan ambit wagi'lek enggere, aren afuni Israel mene ineisena Tuhan Allah a'nogoba wesu re mondok elo'legat welagaikhe.

¹⁴ Andi mene werek kwelegat he, it afuni Yehuda mene inogogwi melalinafu mene omanogo inom, it imam omanogo inom, it afuni holhu mene inom, omanogo nen he it afuni inunggulenu amu mene it horok-horokwe werek mene nen hilingiti lagaukwa mene omanogo hilingitik, kembu apne wanhik, hilingiti logolik he o Tuhan Awiba At Tuhan onggwaregen enogo fakhasikheba a'nogo alomat fikhi lagaukwa.

¹⁵ It inambu inomba ineisena Tuhan Allah a'nogo nen he it inoba inom, At awi wurik a'nogoba inom, endawi hundik hilinginafu logolik he, it At againafuri omanogo ineluerinabi loageluk he Aren hundik-hundik inayonggo fuluk lakfisikhi lagaikhe.

¹⁶ Oba nen he At Tuhan ane ugu mene omanogo puliabet fuluk he it nabi omanogo endo yaginafik, it Allah nen lakfisa wagu mene omanogo lalfalhogo hilinginafik ikhi lagaukwa. A'nogo hilingiti lagaukwa andiba re, At Tuhan anini inoba fikhe mene andiba nen lologo wulibi la re mondok elo'lek welagaikhe.

¹⁷ Andi nen he Tuhan nen at raja Babel mene a'nogo nen it omanogo inoasi wesuageluk endawimo kagalhikhemo re, at raja a'nogo nen he it afuni Yehuda mene omanogo it inebe alage mene inom, it ap o Tuhan Awi wuri'mo werek mene omanogo inom, mondogat inoatikhe. At Allah nen he it andi inebe mondogat yaman mene inom souge mene inom, ap inom, hemi inom, inoba ou mene inom, inoba fano mene inom, Aren endawirinafi'lek it inebe mondogat felelenghogo at raja Babel mene andi enggiba fesikhe andi.

¹⁸ At raja Babel mene andi nen he o Tuhan Awi wuri'mo yi mene ti mene wene kabogeti logolik wanhungge omanogo inom, yi mene ti mene onggo hokho mene omanogo inom, at raja onggwarek angge omanogo inom, it agoromi pegawai inangge omanogo inom, mondogat telaluk he o Babel lagaikhe.

¹⁹ Aren he o kota Yerusalem leget pa' leget waganek mene a'nogo molulukhogo pelafik, o kota a'nogo endu fatik, hilingiti logolik he, o Tuhan Awi wurik a'nogo inom, at raja awi sili a'nogo inom, yi mene ti mene o andoma elonggoma werek engge omanogo inom, mondogat nolhikhe.

²⁰ It afuni holhu mene linet lagaukwa mene omanogo re felelenghogo woginarek he, o Babel lagaukwa. Oba nen he it a'nogo re at inom, it at ambisangma nen ta'lagaukwa mene omanogo inom, inamingmingengge a'luk werek kwelek enek he hun raja Persia mene nen kerajaan a'nogo omame agaikhe huliba asi lagaikhe.

²¹ At Tuhan nen nabi Yeremia bene nen wene ikhi logolik he, ”Iren he tahun-tahun Sabat a'nogoba fogerati legengge nek hilingitu nen he o Yerusalem oba inom, Yehudaba inom andoma 70 tahun andi re kweang iringik mondok logogin,” iluk isikhe aple a'nogo higithogo hilinglagaikhe.

It afuni Yehuda mene inaiba loageluk Kores nen yagaisasikhe wene

²² At Tuhan nen hilingiri'lago mene iluk nabi Yeremia bene nen isikhe mene a'nogo hilingisigin iluk he, at Kores a'nogo it afuni Persia mene faget raja menlagaikhesik, melalinafu welagaikhe huli tahun attak meneba re at Kores nen wene melalek ekhe wulabuageluk Tuhan nen endawimo hilingitikhemo, wene melalek a'nogo it afuni aren melalinafukwe werek mene omanogo melalogo wulafikhe mene re yi'nogo:

²³ ”An Kores it afuni Persia mene inobaget raja mendek welagi mene a'nogo nen nawene melalek he yi! At Tuhan Allah ebe pogoroba legoma werek mene a'nogo nen yi afuni ti afuni o kweangma yoma werek mene inobaget nalong logolik lego logouwageluk an raja mennobagaikhesik he, o At Awiba o Yerusalem o wilayah Yehuda a'nogo wusuageluk nobagaikhe. Enggere hit Allah againafuri welagep mene andi re hinebe mondogat hinambotkwe o Yerusalem logoin o! We hit hineisena Tuhan Allah nen enek halhinafi logouwak,” iluk wene wulafikhe.