2 TAWARIKH 35 - Allah Wene Fano Wene Hupla Inane

Yosia nen Paskah seni isatikhe wene

¹ At Yosia nen Tuhan Along anggaluk legeisogo fikhi logolik iluk he, o Yerusalem oba omanogo Paskah seni isatikhe. Linggene andi sambul pesta andi hilingisugun mene faget he, tanggal 14 bulan misik oba werek kwelek wam domba watikhe.

² A'nogo hilingisuogeluk andi re at Yosia nen it ap imam o Tuhan Awi wuri'mo omanogo yabu hilingisuageluk sumburogo wogisikhi logolik he, ”Yabu re fanorogo nek hilingi'no,” iluk komorogo yagaisasikhe.

³ At Yosia nen it ap Lewi mene Tuhan obaget iluk enogo fakhasukwa inap inom, it Israel mene yagaisugu mene guru welagaukwa mene inom, inoba yagaisikhi logolik he, ”Peti Tuhan nen wene warogo wo'ninafikhe mene andi re, hiren higilogo ekhema ya figik, ta figik hilingisu fuk. We o Tuhan obaget Daud amlogo Salomo a'nogo nen wutikheba omanogo fei kwi'no. Hiren he At hineisena Tuhan Allah a'nogo obaget yabu hilingitik, At againafuri afuni inunggulenu Israel mene a'nogo inobaget ineabu hilingitik, ino.

⁴ At hun raja Daud inom at amlogo raja Salomo inomen hinebe wenagaisogo hinobagagik, hineabu hulirogo wokhisigik, isukwa mene a'nogo higithogo hilingisugun iluk o Tuhan Awiba andoma fik-foukhogo logoino.

⁵ Hit hinebe kaboksek welagep mene andi nen, o Tuhan Awiba omanogo it afuni Israel mene kabokhigik weri'lagwi mene omanogo lombok leberinafi logogun nen he hiren fanorogo halino.

⁶ It afuni Israel mene nen he, At Tuhan nen wene melalek Musa bene nen wo'nisasikhe mene a'nogo higithogo hilingisuageluk he, wam Tuhan obaget warogo fugu mene hiren fougeratik, hit hinonggwarek hinebe faget an he Tuhan apne wanigiluk welagi, iluk enogo fakhigik, ino. Nen, hiren he domba Paskah isatu mene a'nogo ogo wasugun hilingi'mo re,” iluk yagaisasikhe.

⁷ At raja Yosia nen he it afuni seni Paskah isasuogeluk kabogesi wagaukwa mene omanogo nen wam warogo Paskah hilingisuageluk he, aren wam onggwaregen mene domba re 30.000 nen inom, domba eagwi inom, kambing kotorek mene inom, sapi ai mene 3.000 nen inom wogisasikhe.

⁸ Nen, it Yosia agoromi pegawai omanogo nen ogore it ap Lewi inap inom, imam inap inom, it afuni holhu mene inom faget wam kabokhogo wogisasukwa. It pegawai o Tuhan Aiba a'nogo yabu hilingisuageluk fisasikhe inap he, Imam Agung Hilkia a'nogo inom, Zakharia inom, Yeiel inom andem fisasikhe. It inebe henagan arem nogo nen he wam domba eagwi inom, kambing ket kotorek mene inom he, ebe 2.600 nen inom, sapi ai mene 300 nen inom, seni a'nogo isati logolik wasuageluk it imam omanogo wogisasukwa.

⁹ Nen, it Lewi inap inogogwi melalinafu mene menfisasukwama welagaukwa mene hun Konanya inom, Yeiel inom, Yozabad inom, aremnogo nen he wam domba eagwi inom, kambing ket kotorek mene re 5.000 nen inom, sapi ai mene re 500 nen inom, Paskah isatunem a'nogo warogo isasuageluk it Lewi inap omanogo wogisasukwa.

¹⁰ A'nogo mondogat hilingfuluk he, at raja nen melalinafikhe hakhogo re, it imam inom, it ap Lewi inap inebe kaboget higik welagaukwa mene omanogo inom he, Paskah a'nogo isasuogeluk inobalik lombok tugerarik lagaukwa.

¹¹ A'nogo hilingfuluk he, iren wam Paskah faget hilingiti logolik isatu mene omanogo warik lagaukwama re it ap Lewi inaben he wam omanogo agap nonggolik lagu kwelek he it imam omanogo re, amep omanogo wokhigik he mezbah a'nogo bene kweisalik lagaukwa.

¹² Wam warogo Tuhan wogetu mene faget wene melalek buku Musa weneba palek werek mene a'nogo higithogo hilingisuageluk he it afuni andoma kabogesi wagaukwa mene omanogo, it ap misik inagainafuri inom faget he, wam warogo nolengge noluageluk, wam ebe misikdek higik wogisilik lagaukwa.

¹³ A'nogo hilingitukwasik he, wene melalek oba werek mene higithogo re, it ap Lewi inaben he wam Paskah faget mene omanogo endumo weratik, wam amu enogo fesukwa mene omanogo kuali, belanga, cerek oba isatik, hilingitukwasik he wam palek omanogo re weak-weak it afuni omanogo sumburinabik lagukwa.

¹⁴ It ap imam inap andi re wam noletu mene omanogo faget inom, asei noletu mene omanogo faget inom hilingitu kwelek enek he inoba nen o hubaga lagaikhe. A'nogo hilingitu logolik it ap Lewi inap andi nen wam it inonggwarek faget mene inom, it ap imam Harun nen tagongge omanogo faget mene inom, fougerati lagaukwa.

¹⁵ It inunggulenu Lewi mene nen inunggulenu akhogo hun Asaf ambisangma mene pinggong watu mene faget mondok inelu-pinelu inap omanogo re, at raja Daud en ineabu fisasikhe mene higithogo ineabumo inobalik lombok welagaukwa. It ap andi inenu re yi: Asaf, Heman, Yedutun, at ebe re nabi oba nen at raja obaget yabu hilingiti lagaikhe mene a'nogo inom. It ap kwe kuguba kagalek werek mene omanogo faget ogore it ap Lewi mene fenakwe nen leberinafunem, it ineabu were'ma omanogo nen herakfuluk lagi'lek we omanogo nen enek Paskah a'nogo hilingiti lagaukwa.

¹⁶ Linggene a'nogo sambul he at raja Yosia nen Paskah isatu aple faget yagaisasikhe higithogo re, wam mezbah oba nolhu mene inom, yi'nogo ti'nogo hilingitu mene faget inom, omanogo hilingitukwa.

¹⁷ Afuni Israel mene mondogat andoma kabogesi lagaukwa mene a'nogo re linggene sabiren andi inukhogo a'nogo re, seni Paskah a'nogo isatik, Seni Roti Fitungge Oba Legengge werago mene nunggu sambul iluk mene a'nogo faget ebeti logolik, kabogetik isukwa.

^18-19 At Yosia raja menlagaikhe huli nen tahun 8 mene andiba re, at inom, it imam inom, it Lewi inap inom, it afuni Yehuda mene inom, Israel mene inom, it afuni Yerusalem mene inom, en, Paskah isatukwa mene andi re it ap raja at menlagi'le'ma welagaukwa mene andoma misigen ogo, at nabi Samuel welagaikhe huli nen ogo, a'nogo ekhe hilingitukwa mondok lek mene isatukwa.

At Yosia nen melalinafi lagaikhe mene a'nogo wurep kobok ilagaikhe wene

²⁰ O Tuhan Awi wurik a'nogo faget at raja Yosia nen a'nogo hilingitikhesik hilingitunemen he, at Nekho raja Mesir mene a'nogo agoromi woginarek he o Karkemis I Efrat horokhogo andoma weim yabugun iluk wagaukwa. A'nogo wagu mene nen he at Yosia nen kwe paligin iluk hilingitikhe,

²¹ Oba nen he at Nekho nen Yosiaba wene warek lak fei waga logolik he yi'nogo isikhe, ”Afuni Yehuda mene inoe raja ahwi! Weim yi re hat ninom yabugun mene re fuk. An he we Allah nen miming nafi logolik weak-weak hilingisin iluk yaganetemo it an naselei mene ninom yabuogeluk waga lagi o, nen hat ninom yabugun nen iluk he lego. Allah re an nebikhit werek enggere haren an kwe palnabu fuk. Nen kwe palnabigin halok he At Allah nen hat mondok wolelenggen habigiluk werek,” iluk wene warogo lakfesikhe.

²² Oba nen he at Yosia re Allah nen raja Nekho bene nen isikhe mene a'nogo hol figi'legengge re, a'nogo omame agaikhesik ninom walhogoin iluk hilingiti lagaikhe. A'nogo hilingiti logolik he, at Yosia a'nogo afuni nen fu'nobagai nogoluk elokhe kwe munenogo hilingfesikhesik weim yabigin iluk yandalonhogo o Megido tonggoma andoma kwi lagaikhe.

²³ Yabi lagaikheba nen he weim yafunem a'nogo nen at raja Yosia a'nogo tok watukwa. A'nogo wat fesukwama ebe tok waregengge a'nogo enggin agaikhemo re, ”Weim yafunem omanogo nen wo'narek wulibi lani,” iluk amingmingengge omanogo yagaisasikhe.

²⁴ A'nogo yagaisasikhemo re it amingmingengge omanogo nen he kereta aren mene a'nogoba nen hambokhogo kereta ekhe amu mene andem welagaikhe meneba liak fesukwasik he waluk o Yerusalem wagaukwa. Waluk wagaukwama nen he omanogo nen wa'lagaikhe mo re, it ap raja salinafi lagaukwaba omanogo salhukwa. Nen, at wa'lagaikhe mene a'nogo faget he it afuni Yehuda mene inom, Yerusalem mene inom fong wati logolik welagaukwa.

²⁵ At Yosia wa'lagaikhe mene andi faget he nabi Yeremia nen le wuni misik ekhe felalhikhe mo re, yogondak huli nen he wuni andi at Yosia wa'lagaikhe wuni a'nogo faget ebetu sambul he ap inom, hemi inom, it afuni Israel mene andoma wuni wulafarek inaben wuni andi wulafu mondok werek. Wuni andi re iren buku le wuni andogorogo palogo fesukwa mene a'nogoba kwelakfesukwama werek.

²⁶ At Yosia nen hilingiti lagaikhe mene inom, aren Tuhan oba endawi hundik hilingiti lagaikhe mene faget inom, Tuhan Awene melalek werek mene a'nogo hologo hilingiti lagaikhe mene inom,

²⁷ wene horokhogo re, we aren hilingiti lagaikhe mene eroma nen wurep huliba re, buku it ap raja-raja Israel mene inom, Yehuda mene inomen, hilingiti lagaukwa mene tindelogo palek mene a'nogoba mondogat palogo fesukwa ma werek.