2 TAWARIKH 34 - Allah Wene Fano Wene Hupla Inane

It afuni Yehuda mene inobaget Yosia raja menlagaikhe wene

¹ At Yosia re ebe umur 8 tahun were'ma it afuni Yehuda mene inobaget raja menlagaikhesik he o Yerusalem oba andoma 31 tahun logolik melalinafu welagaikhe.

² At he at ambu raja Daud obabut hilingiti lagaikhe higithogo hilingiti logolik he, Allah wene melalek werek mene a'nogo mondogat hologo nek hilingiti lagaikhe. Aren he Tuhan endawimo agaiyek anggikherek mene nek hilingiti lagaikhe.

Afuni nen tugwi kembu fogerati lagaukwa a'nogo at Yosia nen mondok leget fisilik lagaikhe wene

³ At Yosia ebe mondok yenggerek engge nen, raja menlagaikhesik a'nogo 8 tahun logolik oba aremnogo re at ambu Daud en fogerati lagaikhe mene eisena Tuhan a'nogoba endawinggen tipsek logolik fogeratu welagaikhe. Nen 4 tahun ambolkweba re aren he kembu wuti lagaukwa kwe inom, kembu he mene dewi Asyera a'nogo alik hilingik werek kwe inom, kembu fena amu mene ekhe kwe welagaikhe mene inom, omanogo mondok halik-halokhogo hilingfilik lagaikhe.

⁴ At Yosua agoromi nen he kembu ilirengge hilingik mene omanogo wolelenggen hogo liak fesikhesik he, iren a'nogo hilingfesukwa mene oak-oagengge omanogo re it ap kembu andoma faget wam warogo noli laga lagaukwa inap wa'lagaukwama salinafukwa kwe inamik kwe omanogo folik lagaukwa. Baal faget iluk mezbah wurik mene inom, amben fanongge dupa a'nogo nolhukwe iluk mezbah wurik welagaikhe mene omanogo inom he, mondogat meisalisasikhe.

⁵ A'nogo hilingfuluk he, it imam ap hareise inap kembu andoma faget hilingiti logolik welagaukwa mene omanogo inoak siling omanogo re at Yosia nen he mezbah omanogo amboloba nolhikhe. A'nogo hilingitikhe andiba re aren it afuni Yehuda mene inom, Yerusalem mene inom, en Tuhan fogeratu mene a'nogo kwe hutfesikhe andi.

⁶ Andi nen mondok weak arik lagaikhe kwe wilayah Manasye mene werek kwe inom, nen Efraim mene werek kwe inom, Simeon mene werek kwe inom, Naftali mene welagaukwa kwe abel utara fikhit andoma inom, omanogo mondogat a'nogo nek hilingirik lagaikhe.

⁷ At Yosia nen he it kerajaan utara fikhit welagaukwa mene nen kembu obaget mezbah wurik welagaikhe mene inom, Asyera a'nogo alik waganek welagaikhe mene inom he, mondogat halokhogo lakfisasukwasik he, mezbah inom, kembu alik waganek inom, amben engge nolhi lagaukwaba mezbah a'nogo mondogat omanogo re halik-halokhogo hilingfisasikhe. A'nogo hilingfuluk enek he at a'nogo o Yerusalem wagaikhe.

Buku Tuhan awene melalek palek engge a'nogo nekhengge heratukwa wene

⁸ At Yosia nen he o Tuhan Awi wuri'mo inom, o it afuni Yehuda mene werek kwe omanogo inom, kembu apne wanhukwe omanogo mondogat legaphogo fisasikhesik he, at Yosia ebe raja menlagaikhesik a'nogo melalinafu werek kwelek enek he 18 tahun asi lagaikheba re, o Tuhan Awi wurik a'nogo pugunesuageluk he, ap inebe henagan mene lakfisasikhe. Ap henagan lakfisasikhe mene andem inenu re: hun Azalya amlogo Safan a'nogo inom, Maaseya o Yerusalem oba andoma gubernur welagaikhe agun a'nogo inom, hun Yoahas amlogo Yoah pegawai lego mene welagaikhe agun a'nogo inom, lakfisasikhe.

⁹ It Lewi inap o Tuhan Awi wuri'mo a'nogo solombonma kagalek welagaukwa inap omanogo nen he, it afuni Efraim mene inom, Manasye mene inom, it afuni kerajaan utara fikhit welagaukwa mene nen inom, it afuni Yehuda, Benyamin mene nen inom, it afuni Yerusalem mene nen inom, uang fesukwama iren kabogetukwa mene omanogo hun Imam Agung Hilkia a'nogo wogosi wagaukwa.

¹⁰ At wogosi wagaukwama re at Hilkia nen he uang omanogo re, it ap inebe henagan aremnogo Tuhan Awi a'nogo pugunetunem ineilenggen logouwageluk ap inebe henagan menfisasikhe mene aremnogo wogisasikhe. Wogisasikhemo re iren he uang a'nogo waganogo re,

¹¹ it ap raja Yehuda inap omanogo nen o Tuhan Awi a'nogo weak aga logouwageluk herak fesukwasik welagaukwa mene omanogo pugun esuogeluk, it o eba wutu inap inom, o ebe wutu inap inom, helep onggo palugun mene inom, e onggo palugun mene inom, omanogo mondogat he it tukang omanogo wogisoageluk inenggiba fesikhe.

¹² Ap o weak agaikhemo pugunetukwa inap andem he mondok higithogo nek hilingiti lagaukwa inap. It inebe yabu hilingitunem melalinafi logouwageluk he it ap Lewi mene inebe enggaminogo mene (kepala) menfisasikhe. It Lewi inap andem he: It inunggulenu Merari mene nen he, Yahat inom, Obaja inom, nen it inunggulenu Kehat mene nen he, Zakharia inom, Mesulam inom, andem menfisasikhe. It ap Lewi inap pinggong watu mene mondok inelu-pinelu inap omanogo re,

¹³ afuni nen ongge salma'luk wagu mene inom, it ap leberisugu mene yabu ekhekwe-ekhekwe hilingiti lagaukwa mene omanogo inom, yi mene ti mene faget wenagaisogo enu lisu palhigik hilingitu mene faget inom, ebekhalem kagalek werek mene inom, faget ineil logolik kagalinarek logouwageluk menfisilik lagaikhe.

¹⁴ A'nogo hilingfuluk at Hilkia nen he uang kabogetukwa mene omanogo obali'mo fisogo werek oba omanogo nen wulakfei wagunem en he, buku Tuhan Awene melalek palek mene, At Allah nen wene yi'nogo hilingi'no ti'nogo hilingi'no iluk palogo at Musa wogetikhe mene a'nogo were'ma heratikhe.

¹⁵ A'nogo heratikhesik he, at Hilkia nen Safan oba ikhi logolik he, ”Buku Tuhan awene melalek palek a'nogo an nen o Tuhan Awi wuri'mo yoma nogo nen herati o,” iluk yagatikhe. Andi yagatikhesik he buku a'nogo at Safan enggimo wogetikhe.

¹⁶ Wogetikhemo re at Safan nen buku a'nogo enggimo waluk he at raja ambit lagaikhesik ikhi logolik he, ”Nit he nineisena hun haren melalninobagegen a'nogo higithogo re mondogat hilingito o.

¹⁷ Uang o Tuhan Awi wuri'mo werek mene a'nogo re mondogat wanhosik he it yabu hilingiri'lagwi mene inom, it ineilenggen logolik kagalinarek werek inap omanogo inenggiba mondogat fogo o,” iluk yagatukwa.

¹⁸ A'nogo yagatikhesigen he, ekhe inom ikhi logolik he, ”Buku yire at Hilkia nen an wo'nete o,” iluk yagatikhesik buku a'nogo at Safan nen raja elokhoma aremnogo nen enu salhikhe.

¹⁹ Enu salhikhe mene a'nogo at raja esanggo holhikhesik he, endawinggen mondok heiselhu nen he at asu laberek welagaikhe mene a'nogo tilip-talaphogo lakfisasikhesik welagaikhe.

²⁰ A'nogo logolik he, at raja nen it Hilkia inom, hun Safan amlogo Ahikam a'nogo inom, hun Mikha amlogo Abdon a'nogo inom, negara andiba faget lisu palhi lagaikhe mene Safan a'nogo inom, at raja onggwarek along palogo lagu mene Asaya a'nogo inom, inoba ikhi logolik he,

²¹ ”Nit ninambu-ninomba nen he wene melalek yi'nogo hilingi'no ti'nogo hilingi'no iluk buku yiba palek mene a'nogo higithogo hilingiti lagagu le'ma re Tuhan nen a'mage nit ninoba fikhi laga. Enggere hiren he an nobaget inom, it afuni Israel mene inom, Yehuda mene inom, inobaget he, buku yiba re ninggi'nogo palek werek? Iluk Tuhan oba heinok wani lani o,” iluk lakfisasikhe.

²² A'nogo lakfisasikhemo re, it Hilkia inom, Ahikam inom, Abdon inom, Safan inom, Asaya inom andem he, wene ebe yi'nogo werek a'nogo yaganisoageluk he, he mene ekhe enu Hulda andi ambit lagaukwa. He andi ebe re nabi, at awi re o Yerusalem ket halogo kwisukwaba andoma welagaikhe. (Nen he andi agun enu re Salum, Tikwa amlogo, hun Harhas omba. At eabu re, su o Tuhan Awi wuri'mo wene kabogetuba omanogo yabu hilingiti logolik labetu mene omanogo eiserogo welagaikhe.) At he Hulda a'nogo nen he iren yi'nogo ti'nogo iluk isukwa mene omanogo esanggo holhikhesik he,

²³ ”Hit he hinaiba nekhengge laluk he at raja ba re yi'nogo ikhe iluk yagasi lano: It afuni Israel mene nen apne wanharek mene Tuhan Allah a'nogo nen ikhi logolik he,

^24-25 It afuni Yerusalem mene inom, it mondogat inomen he, An inambothan linet nobagaluk he, iren wam warogo ap Allah inonggot mene fogerati lagaukwa kwe omanogo nobagai lagik, ikhi lagaikha. Iren a'nogo mondok hilingiti lagaukwa mene andoma oba re An na'mage kwelafi lagaukwama re An nen Yerusalem mene inoba na'mage figirik he, An na'mage lagaikhe mene andi re sebel ha mondok elo'lego, Enggere buku andiba senggerogo palek were'ma at raja oba pilingisogo yagate mene andiba an nen Yerusalem oba inom, it afuni andoma werek mene inoba inom, homan igisogo wene palek mene a'nogo higithogo unggum inoba fisagain o.

²⁶ Oba nen he at raja Yosia faget enek he, An Tuhan Allah it afuni Israel mene ineisena a'nogo nen he wene yi oba fikhi lagi o: Buku andiba palek mene a'nogo pilingitunem hat hesanggo holhendik,

²⁷ haren hendawimo waregendik, hendawimo sebel fakhegendik welagen. An nen he o Yerusalem inom, it afuni o andoma werek mene inom mondogat inoasigin iluk arat nane walhogo figirik welagi oba nen he, An nen a'nogo hilingisigin iluk hilingitigi mene a'nogo re hat hesanggo mondogat holhendik, fong warikhi logolik hakhogo re le yagaisogo hasu tilip-talaphogo lakfisegendik, welagen. Andiba re haren samban egen mene andi re An arat nesanggo holhigi o,

²⁸ hat hebe heluk werek oba andoma re unggum andi it afuni Yerusalem mene inoba pelabi wesigin mondok lek. Nen, hat hebe ogore mondok fani-fanorogo wa'la'nogen hilinghobagagin ikhe, iluk yaga'no,” iluk yagaisasikhe. A'nogo yagaisilik lagunem he it hun raja nen lakfisasikhe mene aremnogo wene a'nogo waluk inambotkwe yagasi wagaukwa.

Tuhan ane hologo hilingiti logogun iluk at Yosia nen wene watikhe wene.

²⁹ A'nogo yagasi lagaukwama re at raja Yosia a'nogo nen he it afuni Yehuda mene inoba inom, Yerusalem mene inoba inom, inogogwi melalinafi lagaukwa mene omanogo mondogat wolinafukwasik he,

^30-31 at inom seberogo re o Tuhan Awi wuri'mo omanogo lagaukwa. It lagunem andi inom he it Lewi inap inom, imam inom, it afuni holhu mene mondogat inenggi werek mene inom, inenggi lek mene inom, mondogat lagaukwa. Lagaukwasik he it inera'lu at raja a'nogo onggwarek obali'mo omanogo nen at raja a'nogo menlagaikhesik he, Buku wene wat-wat agaukwa mene o Tuhan Awi wuri'mo nen heratukwa mene a'nogo mondogat ane hokhoba enu salhikhe. Enu a'nogo salhikhesik he, Allah nen he buku andiba wene wati logolik, hiren yi'nogo hilingitu halok An nen yi'nogo hilinghinobagakhi logogin, iluk Tuhan inom it againafuri inom wene watukwa mene a'nogo buku andiba mondogat palek werek mene omanogo tiphogo hilingitik, At Tuhan Awene melalek werek mene inom, wene yi'nogo hilingiti logoino ti'nogo hilingiti logoino iluk isikhe mene palek werek mene inom, omanogo ninendawinggen nen inom ninebe nen inom abirenggeba hilingiti logogun iluk igik, At Tuhan ebe ane hologo nek hilingiti logogun iluk inom, at raja nen Tuhan inom wene watukwa.

³² Afuni Benyamin mene inom nen it amu mene inom o Yerusalem werek mene omanogo nen ogore, ”Wene melalek andi hologo hilingiti logogun iluk wene wa'ni, andi re wene it inombawi inom, Allah inom watukwa mene a'nogo,” iluk yagaisasikhe.

³³ At raja Yosia nen he kembu mondok hebak inafe mene ekhe kwe ekhe kwe werek mene inom, it afuni Israel mene werek kwe welagaikhe mene inom, omanogo mondogat weak-beakhogo hilingfesikhe. A'nogo hilingfuluk he, aren he afuni holhu mene inoba yagaisikhi logolik he, it inambu-inomba ineisena Tuhan Allah andi obaget enek hilingiti logouwageluk yagaisasikhe. A'nogo yagaisasikhemo re at Yosia ebe eluk logolik oba re it afuni a'nogo re Tuhan oba tiphogo nek hilingiti lagaukwa.