2 TAWARIKH 33 - Allah Wene Fano Wene Hupla Inane

It afuni Yehuda mene faget Manasye raja menlagaikhe wene

¹ At Manasye re ebe umur 12 tahun werek kwelek it afuni Yehuda mene faget raja menlagaikhesik he o Yerusalem oba andoma 55 tahun logolik melalinafu welagaikhe.

² At menlagaikhesik logolik he, it afuni Israel mene o kweang andiba oan kwi lagi'lek logolik afuni inunggulenu Kanaan inap omanogo inobabut kwanirogo hilingiti lagaukwa mene omanogo higithogo hilingiti logolik he, aren Tuhan elokhoma weak mene nek hilingiti lagaikhe.

³ Afuni nen kembu fogerati lagaukwa kwe inom, kembu Baal faget hilingiti logolik wam warogo nolhi lagaukwa mene (mezbah) omanogo inom, at eisena Hizkia nen mondok halik-halokhogo hugisasikhe mene omanogo re aren nekhengge wutik, kembu he mene (Dewi) Asyera a'nogo alik waganogo wutik, hesagalenggen fogeratik, ikhi lagaikhe.

⁴ At Tuhan nen he o Yerusalem andi re mondok-mondok andoma an nobaget enek hilingiti logogun oba logogin, iluk isikheba nen he, at Manasye nen he o Tuhan Awi wuri'mo omanogo kembu dewa omanogo faget wam warogo nolhuba mezbah wurik lagaikhe.

⁵ O Tuhan Awi wurik mene a'nogo elokhoma fena-fena aremnogo re hesagalenggen faget wam warogo noletuba iluk mezbah ekhe wutikhe.

⁶ At onggwarek omalik meneba nen ogore nolengge nolhu mene iluk he o Lembah Hinom omanogo warogo noli lagaikhe. Nen ekhe nekherogoat he it ap hareise inaben hilingitarek mene omanogo hilingitik, heinogengge heinok wanhik, afuni wa'lagu mene inaheimeba yaganesuageluk heinok wani lagik, hilingiti lagaikhe. Aren a'nogo weak mondok hilingiti lagaikhe andi oba Tuhan a'mage kwelafi lagaikhe andi.

⁷ At Tuhan nen Awi wuri'mo a'nogo faget it Daud inom, Salomo inom inoba ikhi logolik he, ”It afuni inunggulenu Israel mene werekwe 12 wilayah omanogo inanggele'ma nen he o An nawi Yerusalem andi, An nobaget inenggi hundik-handik andoma kabogeti logogun oba iluk esin anggigirik wenagaisogo figi o.

⁸ It an nagainafuri Israel mene a'nogo nen ambi An nawene melalek werek mene a'nogo hologo hilingitik, wene yi'nogo hilingi'no ti'nogo hilingi'no iluk An namingmingengge Musa a'nogo nen it wogisasikhe mene a'nogo futfuluk hilingitik, hilingitu halok he, o kweang An nen it inambu-inomba inoba wogisigiba oma nen mugusogo wulaginabi loageluk herak fisagain lego,” iluk yagaisasikhe. Oba nen he aren kembu alik waganek a'nogo waluk Tuhan Awi wuri'mo omanogo fei kwisikhe.

⁹ At Manasye nen hilingik oba nen he it afuni Yehuda mene ogo, it afuni inunggulenu inap o Kanaan oba andoma were'ma it Tuhan againafuri a'nogo o andiba kwi laga logolik Tuhan nen mugusogo wulak fisasikhe mene a'nogo nen weak hilingiti lagaukwa mene andi re we endebat hak oba nen he, iren enek he weak mondok hokho mene hilingiti lagaukwa.

Manasye obabut hebelhikhe wene

¹⁰ A'nogo nek hilingitunem he Tuhan nen afuni Yehuda mene inom, at Manasye inom, it hilingiti lagaukwa mene a'nogo faget wenagisasikhe oba nen he, it a'nogo holhi lek weak mondok hilingitu welagaukwa.

¹¹ Andiba re it afuni Yehuda mene were'ma omanogo pin kwi wesuageluk he Tuhan nen it Asyur mene tentara ineisena panglima a'nogo lakfei wagaikhemo re, at Manasye a'nogo kombi heleba kelogo li'luk he o Babel lagaukwa.

¹² A'nogo waluk fei lagaukwama oba enggin-fenggin hiki logolik he, aren Tuhan Allah oba endawinggen sebe isikhesik, lebetneoageluk samban isikhe.

¹³ A'nogo samban isikhe mene a'nogo At Allah nen esanggo holhikhesik he, at Manasye a'nogo ekhe inom melalinafi logouwageluk he o Yerusalem nekhengge lakfei wagaikhe. Andi hilinglagaikhe andiba nen he, Tuhan andi re eberogo nen at Allah, iluk at Manasye a'nogo endawinggen At oba tibet fesikhe.

¹⁴ A'nogo hilingitikhesik hobugen he at Manasye nen o kota Daud awi a'nogo abel timur fikhit leget pa' leget endakwe mene a'nogo ekhe inom uan hogoat ambotkwe wutikhe. Aren he obalik ekhe misi'mo i Gihon elesi horokhogo tonggoma aremnogo nen eroratikhesik he liabik laga lagaikhesik liabek mene re utara fikhit kwe hokho mene enu Pintu Gerbang Ikan ikhi lagaukwa mene andiba nen he, o kota ebe fikhit he o Ofel agarek oba andoma huli fei wagaikhe. O it afuni Yehuda mene welagaukwa kwe nen leget omamerogo waganek welagaukwa kwe andoma re ap panglima mene inebe misik-misik fisilik lagaikhe.

¹⁵ Aren he afuni inunggulenu amu mene nen inanggembu dewa alik waganek omanogo inom, kembu amu mene o Tuhan Awi wuri'mo fei kwisukwa mene omanogo inom, waganogo wulak fisigik, kembu obaget wam warogo nolhu mene mezbah wurik o Tuhan Awi wuri'mo punukwe welagaikhe mene omanogo inom, o Yerusalem oba andoma nen alekwe welagaikhe mene inom, mondok meisak langkukhogo hilingfisigik, hilingitikhesik he abirengge omanogo waluk o kota endakwe fikhit wulibi lagaikhesik hugesi lagaikhe.

¹⁶ A'nogo hilingfuluk, aren he Tuhan obaget hilingiti logolik wam warogo nolhuba mezbah a'nogo pugunetikhesik he, omanogo wam seberogo ninobagauwageluk mene inom, Tuhan Hai wati logolik iluk mene inom warogo nolhikhe. A'nogo hilingiti logolik he, it afuni Yehuda mene mondogat omanogo nen Tuhan Allah it afuni Israel mene ineisena a'nogo obaget hilingisuageluk yagaisasikhe.

¹⁷ It afuni nen he obalik alekwe omanogo ogore wam warogo nolhi lagaukwaba nen he, mondogat andoma re, Tuhan obaget enek hilingiti lagaukwa.

At Manasye nen melalinafi lagaikhe mene a'nogo wurep oba asi lagaikhe wene

¹⁸ At Manasye nen hilingiti lagaikhe mene fena inom, Tuhan Allahba samban ikhi lagaikhe mene inom, it afuni Israel mene ineisena Tuhan Allah a'nogo enuba it nabi nen yi'nogo ti'nogo iluk yagasi waga lagaukwa mene inom, mondogat he buku it ap raja-raja Israel mene nen hilingiti lagaukwa mene palek mene a'nogoba tindelogo palek werek.

¹⁹ A'nogo at Manasye nen samban isikhemo Allah nen onggo yagatikhe mene inom, at ebe endawinggen hebelhi le'ma aweak hilingiti lagaikhe mene inom, kembu fogerati lagaikhe kwe inom, kembu he mene dewi Asyera alik waganek welagaikhe mene inom, aren tugwi kembu ekhe mene ekhe mene fogerati lagaikhe mene inom, omanogo mondogat he buku it nabi nen hilingiti lagaukwa mene tindelogo palek mene a'nogoba mondogat palogo fesukwa.

²⁰ At Manasye ebe wa'lagaikhemo re at ebe welagaikheba o it ap raja-raja werek oba iluk wurik oba omanogo salhukwa. Salfuluk he at amlogo Amon a'nogo raja at obali'mo menlagaikhe.

Amon it afuni Yehuda mene faget inoe raja menlagaikhe wene

²¹ At Amon he ebe umur 22 tahun logolik it afuni Yehuda mene faget raja menlagaikhesik he, o Yerusalem oba andoma 2 tahun logolik melalinafu welagaikhe.

²² At eisena nen hilingiti lagaikhe hakhogore, aren ogo kembu eisena nen apne wanhi lagaikhe mene omanogo fogeratik, kembu omanogo inobaget wam warogo noletik, hilingiti lagaikhe andiba re aren Tuhan elokhoma weagerogo fikhi lagaikhe.

²³ Oba nen he at eisena nen endawinggen sebel fakhaluk hebekhogo Tuhan ambit wagaikhe hakhogo re, hilingiti'lek weak enek hokhorogo hilingiti lagaikhe andiba re, at eisena nen hilingiti lagaikhe mene inom he higitsek lek welagaikhe.

²⁴ A'nogo hilingitu were'ma re at raja Amon agoromi pegawai omanogo nen abok palhukwasik he, at ebe ailoba omanogo were'ma ebe pinggi wasi kwisukwa.

²⁵ Oba nen he it afuni Yehuda mene wulifi logolik he, it ap raja Amon watukwa mene omanogo pinggi inoatukwasik he, at raja amlogo Yosia a'nogo ebe raja menfesukwa.