2 TAWARIKH 32 - Allah Wene Fano Wene Hupla Inane

Afuni Asyur mene nen it Yerusalem mene inoasugun iluk inabok palhukwa wene

¹ At raja Hizkia nen Tuhan oba tiphogo hilingiti logolik werek mene a'nogo mondogat hilingfesikhesik were'ma nen he, at raja Asyur mene Sanherib a'nogo nen he, o it afuni Yehuda mene were'ma kota leget pa'leget omamerogo waganek kwe omanogo mondogat teligin iluk he, o ebe mondogat walingisi kwi wagaikhesik he agoromi tentara esa logalek a'nogo inoba re teli kwini iluk yagaisasikhe.

² Sanherib en o Yerusalem sebeli kwigin iluk hilingiti lagaikhe mene a'nogo at Hizkia mondogat elu agaikhesik he,

^3-4 it ap Asyur inap andoma o Yerusalem horokhogo andoma kwi wesimbik i o andoma agai ekhe nanogo iluk he, at inom, agoromi it sikhe fisogo mene inogogwi perwira omanogo inomen he, i o kota andiba lagu agai omanogo mondogat to'morik loageluk wene lenggalhikhe. A'nogo lenggalhikhemo re i o kota endakwe fikhit wulibi lagarek agai omanogo to'morik loageluk he, afuni mondok hokhorogo inayonggo fesukwa.

⁵ A'nogo hilingfuluk he, o kota a'nogo omamerek logouwageluk he at raja a'nogo nen pa'leget a'nogo pugunhogo omameratik, karoba ap kagalek logogun oba iluk leget esia'le bene o wurik lagalik, leget abel endakwe fikhit ogo o wutik hilingitikhe. A'nogo hilingi'luk he, aren he o kota Yerusalem attak-attak welagaikheba omanogo o hokho mene kweang oba punurogo liabik lagasukwasik wurik welagaikhe mene a'nogo pugunetik, nen sige kabelek inom, tok ma'mungge inom hokhorogo wusuageluk yagaisigik, isikhe.

⁶ A'nogo hilingitikhesik he ap mene nek o kota ba omanogo werek mene inobaget kepala hakhogo logouwageluk he ap tentara inogogwi perwira omanogo menfisilik lagaikhe. Menfisilik lagaikhesik he, it a'nogo kwe ambe o kota elonggoma kwi lagu mene werek fikhit omanogo kweang wagane'ma kabogesi wesuageluk yagaisasukwama re, it a'nogo kabogesi wagaukwama, aren it yagaisikhi logolik he,

⁷ ”At raja Asyur mene andi ebikhit he omame we mabet hak oba nen he, nit ninebikhit enek he ninomame hokhorogo hilingik enggere, at raja Asyur mene andi inom, agoromi tentara esa logalek andi inoba inom hinailo su fuk. Hit he hinendawinggen hambuget haluk he, hinailo legengge lano.

⁸ At ebikhit omame werek andi re afuni inomameba hilingik werek, oba nen he, nit lebetninabuageluk inom, nen ninobaget weim yabuageluk inom he, Nineisena Tuhan Allah werego,” iluk yagaisasikhe. It ineisena raja ane isikhe mene a'nogo inesanggo holhukwasik he, it afuni a'nogo mondogat inambong se agaukwa.

⁹ A'nogo hilingitukwasik we endep ekhe welagaukwasigen he at Sanherib inom agoromi tentara esa logalek inom o Lakhis logolik he, aren hun Hizkia inom, againafuri Yehuda inap holhu mene o Yerusalem oba werek mene omanogo inoba inom wene aren yi'nogo ikhe iluk, yagaisa lani, iluk ap yonggo lakfisa waga logolik he yi'nogo isikhe,

¹⁰ ”An Sanherib o Asyur oba raja mendek welagi mene a'nogo nen heinok wokhisikhi lagi, o Yerusalem he mondogat ap hinaselei mene nen hobet hisa kwi wagu kwelek hinailo legengge welagep oma re nenahalok?

¹¹ Hit welagep oma re at Hizkia nen yagahisikhi logolik, ”Nit inenggi omameba nen, hit nineisena Tuhan Allah nen lologo wulak hinobagagin iluk welageba? Aren he hit hinamburu inom, hinagai inom, nele nen wa'lasuageluk hesanggema linet hisageluk hilingiri'lago o. Andi nen he, at oba tibet fugu lek.

¹² Aren at he, Tuhan obaget wam warogo nolhuba mezbah omanogo molulukhogo hilingfigik, wene kabogetukwe omanogo weagerogo figik, hilingfikhesik he we mezbah misik meneba amben fanongge a'nogo nolhik, wene kabogetik, hilingiti logoni,” iluk afuni Yehuda mene inom, Yerusalem mene inom yagaisikhe.

¹³ A'nogo yagaisikhi logolik he, ”Raja Asyur mene enggi omame a'ma nen he, it afuni inunggulenu amu mene inanggembu dewa nen ogo lologo ekhe wilak fisasikhe mene ekhe werek lek. Nen an nen inom, an nambu-nomba nen inom, it afuni inunggulenu amu meneba hilingiti lagagu mene omanogore hit he hinonggora?

¹⁴ It sani nen a'nogo ekhe hilingitukwa mene werek nogo? Hit hinanggembu dewa andi nen telhinabigin he elo'lek!

¹⁵ Raja Asyur mene enggi omame mene a'ma nen he it inunggulenu amu mene inanggembu dewa nen ekhe lologo wulakfisasikhe mene ekhe werek lek. Enggere hirogo hinanggembu dewa andi nen lologo wilak hinabigin he elo'legat. Hit hineisena raja andi nen lalhinafik, kembuet hinafik, hilinghinabuageluk hilingiti logou fuk, Aren ili'lago mene andomaba eberogo anggaluk hilingiti logou fuk!” iluk wene warogo lakfesikhe.

¹⁶ At raja Asyur mene nen agoromi a'nogo lakfisasikhemo lagaukwa mene omanogo nen he, inane amu mene hokhorogo ikhi logolik he, Tuhan Allah enu weagerogo figik, At Tuhan amingmingengge Hizkia a'nogo enu weagerogo figik, isukwa.

¹⁷ Raja Asyur mene a'nogo nen Tuhan it afuni israel mene nen apne wanhi lagaukwa mene a'nogo ane sagalogo iluk he surat palhikhe mene yi'nogo palek welagaikhe, ”It afuni inunggulenu amu mene inanggembu dewa andi nen he at againafuri andoma an nenggi omame a'ma nen lologo wulaginabu lek hak, nen at Hizkia anggembu dewa andi nen he ebenagaik,” iluk palhikhe.

¹⁸ It ap raja Asyur en lakfisasikhemo lagaukwa mene omanogo nen he it inebe selekhogo o kota Yerusalem a'nogo mikha kugun iluk he it ap Yerusalem mene leget pa' leget waganek mene ambolkwe werek mene omanogo inailo asuageluk youk kwelafik, inagaiyek werek mene andi legasuwageluk hilingitik, hilingiti logolik he, mondogat andoma Ibrani mene inane unggut waganogo ikhi logolik he, ngai-wai engge kwelafi lagaukwa.

¹⁹ Iren he afuni Yerusalem mene nen Allah apne wanharek mene a'nogo re it afuni inunggulenu amukwe nen inanggembu dewa ap inenggi nen hilingfuluk apne wanharek mene hak hilingik iluk ikhi lagaukwa.

²⁰ A'nogo ugu aple nen he raja Hizkia inom, nabi Yesaya hun Amos amlogo a'nogo inomen he Tuhan nen lebetninabuageluk samban isukwa.

²¹ A'nogo samban isukwama re linggene misik sambul he, Tuhan nen it afuni Asyur mene inogogwi perwira omanogo inoasuageluk malaikat misik ekhe lakfei wagaikhemo re, mondagat inoasi wagaikhe. It a'nogo inoarik lagunem he hun raja a'nogo enggali mondok hokho mene agaikhesik he, aiba o Asyur omanogo ambotkwe lagaikhe. Oba nen he linggene misik sambul ekhe re at alegenek anggembu aiba omanogo kwisikhesik were'ma nen he, at onggwarek againafuri inebe fenakwe ekhe wagaukwasik he at ebe karok oba pinggi watukwa.

²² A'nogo watukwa andiba re at Hizkia inom, it afuni Yerusalem mene inom at Sanherib raja Asyur mene a'nogo, inenggi omame a'ma nen Tuhan nen fikhalogo wilak fisasikhe andi. Andi hilingfuluk he At Tuhan nen he it afuni Yerusalem mene a'nogo inailo lek engge wonghogo logouwageluk hilingfisasikhemo re, it ekhe o negara horok-horokwe werek mene nen ogo lalinabi kwi wagi'lek fanorogo welagaukwa.

²³ Andi huli nen it afuni inunggulenu amu mene nen at raja a'nogo along anggaluk enu legeisogo fikhi logolik he, afuni hokhorogo o Yerusalem wagu mene nen he yi mene ti mene Tuhan obaget fugu mene iluk inom, at Hizkia agaiyekhogo wogetu mene iluk inom, waluk waga lagaukwa.

At Hizkia ebe ou agik wonoget fakhigik isikhe wene

²⁴ Andem oba re at Hizkia a'nogo ou oba agaikhesik he, ou mondok enggin mene wanhi logolik at ebe wa'lasu hak agaikhe. A'nogo logolik he samban isikhemo At Tuhan nen at oba ou andi fano asigin mene faget enegengge ekhe inukhasikhe.

²⁵ At oba ou a'nogo Tuhan nen fano hilingfesikheba nen he at wonoget fakhikhi logolik he, Tuhan oba hai wati'lek hilingitikhe. Andiba re At Tuhan nen it afuni Yehuda mene inom, Yerusalem mene inom, inoba a'mage fesikhe.

²⁶ Oba nen he it afuni Yerusalem mene a'nogo inom, at Hizkia inom, Tuhan a'ma sebeluk sebel fakhasukwama re, at Hizkia ebe eluk logolik oba re unggum wene a'nogo it inoba fikhi lagaikhe lek.

Hizkia enggi werek welagaikhe mene inom enu werek welagaikhe mene inom faget isikhe wene

²⁷ At raja Hizkia re mondok enggi werek agun hilingi'mo re, yi afuni ti afuni nen along anggaluk legeisogo fikhi lagaukwa. Aren angge yi mene ti mene emas, perak inom, helep permata mene inom, amben-amben engge inom, tok kwepalengge inom, yi mene ti mene onggo werek engge fena omanogo inom, omanogo fuguba iluk he, obalik senggelek-senggelek engge wurilik lagaikhe.

²⁸ Aren he angge yi mene ti mene kweangma mene enggen ugu palek mene gandum, anggur, zaitun, amusu hangge inom, faget he o gudang sunggwe fuguba omanogo wurik lagik, wam sapi, domba inom faget wam aiba hokhorogo wurik lagik, isikhe.

²⁹ At Allah nen yi mene ti mene tuget fesikhe mene andoma re hokhorogo hilingi'mo re aren, o kota ogo hokhorogoat wurik lagaikhe.

³⁰ At raja Hizkia andi nen i Gihon elesi wulipluk wagu agai a'nogo yagatikhesik he, kweang a'makwe nen anggwe halogore o kota Yerusalem a'nogo elonggo fikhit kwelabi lagaikhe agun. At Hizkia nen ekhe mene ekhe mene hilingiti lagaikhe mene andoma re ambisangma mondok hilinglagu nek welagaikhe.

³¹ Nen at oba ou were'ma, ap o Babylonia mene nen oba heinok wanuogeluk wagaukwama re, At Tuhan nen he at endawinggen hilingik aple obabut paligin iluk he, Hizkia onggwaregen onggo uageluk eil fesikhe.

At Hizkia nen melalinafi lagaikhe mene a'nogo ambisangma asi lagaikhe wene

³² At raja Hizkia nen ikhi lagaikhe mene fenakwe inom, aren Tuhan oba endawi hundik welagaikhe mene inom, he buku Allah nen Wahyu Nabi Yesaya hun Amos amlogo a'nogo wogetikhe mene a'nogo palek mene andiba inom, it Yehuda mene nen inom, Israel mene nen inom, hilingiti lagaukwa mene tindelogo palek mene andiba inom, palek werek.

³³ At Hizkia ebe wa'lagaikhe mo re it raja-raja salinafi lagaukwaba nen kweang yegek-yege'ma aremnogo salhukwa. Nen, at ebe wa'lagaikhe mo andi re it afuni Yehuda mene inom, Yerusalem mene inom, mondogaren he at ebe along anggaluk legeisogo fikhi logolik salhukwa. At obali'mo re amlogo Manasye a'nogo raja lagasikhe.